UmShumayeli
9 Ngakho ngakufaka enhliziyweni konke lokhu, ngaphetha ngokuthi abalungile nabahlakaniphile kanye nemisebenzi yabo basezandleni zikaNkulunkulu weqiniso. + Abantu abaluqapheli uthando nenzondo okwaba khona ngaphambi kwabo. 2 Bonke banesiphetho esifanayo, + olungile nomubi, + omuhle nohlanzekile nongahlanzekile, labo abenza umhlatshelo nalabo abangawenzi. Omuhle uyafana nesoni; owenza isifungo uyafana nalowo ongaxhamazeli ekwenzeni isifungo. 3 Lena yinto ecindezelayo eyenzeka phansi kwelanga: Ngenxa yokuthi bonke banesiphetho esifanayo, + izinhliziyo zabantu zigcwele ububi; kukhona ukuhlanya ezinhliziyweni zabo phakathi nokuphila kwabo, bese beyafa!
4 Kukhona ithemba nganoma ubani ophakathi kwabaphilayo, ngoba inja ephilayo ingcono kakhulu kunebhubesi elifile. + 5 Ngoba abaphilayo bayazi* ukuthi bayokufa, + kodwa abafile bona abazi lutho, + futhi abasenawo umvuzo, ngoba ukukhunjulwa kwabo sekulibalekile. + 6 Uthando lwabo nenzondo yabo nomhawu wabo sekushabalele kakade, abasenaso isabelo ezintweni ezenziwa phansi kwelanga. +
7 Hamba, udle ukudla kwakho ngokujabula, uphuze iwayini lakho ngenhliziyo ejabulayo, + ngoba kakade uNkulunkulu weqiniso uyijabulele imisebenzi yakho. + 8 Kwangathi izingubo zakho zingahlale zimhlophe,* ungayeki ukugcoba amafutha ekhanda lakho. + 9 Jabulela ukuphila nomfazi wakho omthandayo + zonke izinsuku zokuphila kwakho okuyize uNkulunkulu akunike zona phansi kwelanga, zonke izinsuku zakho eziyize, ngoba lowo umvuzo* wakho ekuphileni nasemsebenzini wakho onzima owenza kanzima phansi kwelanga. + 10 Noma yini okwazi ukuyenza, yenze ngawo wonke amandla akho, ngoba akukho msebenzi namacebo nalwazi nakuhlakanipha eThuneni, *+ indawo oya kuyo.
11 Kunokunye futhi engikubonile phansi kwelanga, ukuthi abanejubane abaphumeleli njalo emncintiswaneni, nabanamandla abanqobi njalo empini, + nabahlakaniphile ababi nokudla njalo, nongqondongqondo ababi nengcebo njalo, + nalabo abanolwazi abaphumeleli njalo + ngoba isikhathi nezenzakalo ezingalindelekile zibehlela bonke. 12 Ngoba umuntu akasazi isikhathi sakhe. + Njengoba nje izinhlanzi zibanjwa inethi elibi, nezinyoni zibanjwa isicupho, kanjalo namadodana abantu abanjwa isikhathi senhlekelele, lapho siwafica kungazelelwe.
13 Ngabona nalokhu ngokuqondene nokuhlakanipha phansi kwelanga—futhi kwangihlaba umxhwele: 14 Kwakukhona idolobha elincane elinamadoda ambalwa; kwafika inkosi enamandla yamelana nalo, yalihaqa yakha izinqaba ezinkulu ukuze ilwe nalo. 15 Kulo kwatholakala umuntu ohluphekayo kodwa ohlakaniphile, walisindisa idolobha ngokuhlakanipha kwakhe. Kodwa akukho muntu owamkhumbula lowo muntu ohluphekayo. + 16 Ngathi enhliziyweni yami: “Ukuhlakanipha kungcono kunamandla; + nokho ukuhlakanipha komuntu ohluphekayo kuyadelelwa, namazwi akhe awalalelwa.” +
17 Kungcono ukulalela amazwi azolile abahlakaniphile kunokulalela ukumemeza komuntu obusa phakathi kweziphukuphuku.
18 Ukuhlakanipha kungcono kunezikhali zempi, kodwa isoni esisodwa nje kuphela singenza umonakalo omkhulu kokuhle. +