Chinándanu ejemplu stiʼ Dios ni «riguixhedxí ladxidoʼno»

1. ¿Xiñee caquiiñeʼ quixhedxinu ladxidóʼ xcaadxi?

GUIRANU caquíʼñenu quixhedxícabe ladxidoʼno purtiʼ cadídinu lu gadxé gadxé guendanagana (1 Ped. 1:6). Guiranu riuʼnu nayecheʼ cúʼcabe gana laanu ora cadídinu lu xiixa guendanagana, nga runi laaca galán cuʼnu gana xcaadxi (Mat. 7:12). Jehová nga Dios ni riguixhedxí ladxidoʼno ne «riguixhedxibe ladxidoʼno» ora cadídinu «lu intiica guendanagana». Zacá rusiidibe laanu quixhedxinu ladxidóʼ xcaadxi (2 Cor. 1:3, 4; 1 Tes. 4:18). Rúninu ni né stale guendanayecheʼ purtiʼ nadxiinu ca hermanu stinu ne cadi purtiʼ cayuni obligárcabe laanu. Lu artículo riʼ zadúʼyanu, primé, xipeʼ nga caníʼ Biblia ora ruzeeteʼ quixhedxinu ladxidóʼ xcaadxi. Guiropa, ximodo zanda gúninu ni. Ne guionna, xi caquiiñeʼ gúninu ora laapenu nga caquíʼñenu quixhedxícabe ladxidoʼno.

XI RINÍʼ «QUIXHEDXINU LADXIDÓʼ» XCAADXI

2. Lu Biblia, ¿xi riníʼ diidxaʼ griegu ni guca traducir «quixhedxinu ladxidóʼ»?

² Diidxaʼ griegu ni guca traducir «quixhedxinu ladxidóʼ» gadxé gadxé ni riniʼni lu Biblia. Zanda guiénenu ni casi «cuʼnu gana», «uguu jnézanu» ne «gudiʼnu conseju» (Rom. 12:8; biiyaʼ nota de estudiu «el que anima»). Diidxaʼ «quixhedxinu ladxidóʼ» ca riniʼni «guchíñaluʼ tuuxa cueʼluʼ». Guiníʼ íquenu ti binni ni ziguxooñeʼ ra nuu xhamigu ni cayacaná ne rudiibe laa guiráʼ ni caquiiñeʼ para gacanebe laa. Intiica si gúnibe pur xhamígube, zaguube gana laa ne zacanebe laa guni sentir galán.

3. ¿Xi ejemplu galán bisaana Bernabé para laanu? (Laaca zanda gúʼyaluʼ imagen ca).

³ Lu Biblia riete de ti hombre ni nabé gunna quixhedxí ladxidóʼ xcaadxi. Laabe nga José, peru ca apóstol que runibiaʼcaʼ laabe casi Bernabé, ni raca significar «tobi ni riguixhedxí ladxidóʼ binni» (Hech. 4:36). Biaʼsi peʼ ngue modo runibiáʼcabe laabe que purtiʼ dede lu Biblia maʼ qué riete labe casi José, sínuque Bernabé. Lu Biblia riete stale biaje gucané Bernabé ca hermanu ne ca hermana que ora peʼ caquiiñecaʼ ni. Cadi xadxí de guca Saulo xpinni Cristu, guyebe Jerusalén para guidxagalube ca discípulo. Peru guizáʼ cadxíbicaʼ Saulo purtiʼ nabé feu modo guzanándabe ca xpinni Cristu. ¿Xi biʼniʼ Bernabé yaʼ? Gúpabe confianza Saulo ne biʼniʼ presentarbe laa ca apóstol que (Hech. 9:26-28).

XIMODO ZANDA QUIXHEDXINU LADXIDÓʼ XCAADXI

4. ¿Gunáʼ nga tobi de ca modo jma galán zanda quixhedxinu ladxidóʼ xcaadxi? (Romanos 1:11, 12).

⁴ Chigánnanu laacabe. Riquiiñeʼ Jehová ca xpinni para quixhedxí ladxidóʼ xcaadxi. Guzéʼtenu ti ejemplu. Dxi nutaabi ique profeta Elías purtiʼ nabé nuu triste, biseendaʼ Jehová ti ángel para cuʼ gana laabe (1 Rey. 19:4-7). Laaca biiyaʼ apóstol Pablo pabiáʼ galán nga cheʼ ra nuu ca hermanu stiʼ para cuʼ gana laacabe (biindaʼ Romanos 1:11, 12). Ora chigánnanu tuuxa para quixhedxinu ladxidóʼ cadi caquiiñeʼ si ugapadiúxinu ne guireʼnu chibiʼnu, sínuque riquiiñeʼ cueenu tiempu para binni ca (1 Cor. 16:7). Peru ¿pa qué ganda chuunu ra nuucabe yaʼ? Cadi guiaandaʼ laanu zanda cuʼnu gana tuuxa pa guséʼndanu ti mensaje ra nuu, pa guinínenu laa pur teléfono o pa gucaʼnu ti carta para laa. ¿Ñee zudiiluʼ lugar iquiiñeʼ Jehová lii para quixhedxí ladxidóʼ xcaadxi la?

5. ¿Xi cabézanu guizaaca lu guidxilayú malu riʼ?

⁵ Cada dxi zidiʼdiʼ jma nagana modo nabáninu lu guidxilayú riʼ, pur nga laaca nagana zaca para laanu chuunu ra nuu ca hermanu stinu para quixhedxinu ladxidoʼcaʼ. Dxi biseguyoocabe Pablo ndaaniʼ guidxi Roma, ti xpinni Cristu de Éfeso ni láʼ Onesíforo guyé yeyubi laabe neca nanna laaca zanda guseguyoocabe o guuticabe laa (2 Tim. 1:16-18). Nabé jneza modo zinanda ca hermanu de Rusia ejemplu stibe. Ora runi juzgárcabe ti Testigu pur ni runi cré, stale hermanu riecaʼ ra tribunal para gacanecaʼ laabe neca nánnacaʼ laaca zanda guseguyoocabe laacaʼ. ¿Ñee maʼ nuuluʼ listu para gusihuínniluʼ nadxibaluluʼ cásica ca hermanu ca la? Biʼniʼ stipa gúʼndaluʼ ejemplu stiʼ ca xpinni Dios ni bibani dxiqué ne ni nabani yanna, ni huaguucaʼ gana xcaadxi ne nuucaʼ nayecheʼ neca canazanándacabe laacaʼ.

6. ¿Ximodo zanda chinándanu ejemplu stiʼ Jehová ora quixhedxinu ladxidóʼ xcaadxi? (Laaca zanda gúʼyaluʼ imagen ca).

⁶ Gucaʼdiáganu laacabe. Ora biʼniʼ sentir profeta Elías nuu xquendanabani ra naxoo, bixhélebe ladxidoʼbe nezalú Jehová ne laa bicaadiaga chaahuiʼ laabe né stale cariñu neca maca nanna xi cazaacabe. Neca ngueca ca ngueca caníʼ profeta riʼ, qué niree Jehová gana ne bicaadiaga chaahuiʼ ni caniʼbe (1 Rey. 19:9, 10, 14). Laaca galán gúninu guiníʼ íquenu ni bizaaca profeta Habacuc. Ti biaje gúdxibe Jehová xi naguu xizaa laabe ne ruluíʼ huaxiéʼ galán modo gúdxibe ni laa. Peru qué nidxiichiné diʼ Dios laabe (Hab. 1:2, 3). Ca dxi riʼ laaca rucaadiaga chaahuiʼ Jehová laanu neca maʼ nanna xi caquíʼñenu. ¿Ximodo zanda chinándanu ejemplu stibe yaʼ? Ra gucaadiaga chaahuinu ca hermanu stinu ne gúninu ni né respetu. Ora maʼ cayábicabe laanu xiixa, naquiiñeʼ chuʼnu listu para gucaʼdiáganu laacabe (Sant. 1:19). Cadi gucueezanu laacabe ora maʼ caníʼcabe ne cadi guidxiichinu pa guiníʼcabe xiixa ni qué chuuláʼdxinu o pa ngueca ca ngueca maʼ caníʼcabe (Ecl. 7:9).

7. ¿Ximodo zanda gánnanu xi peʼ caquiiñeʼ tuuxa ni cayacaná?

⁷ Guiduʼyaʼ chaahuinu xi peʼ caquiiñecabe. Jehová la? randa ruuyaʼ xi nuu ndaaniʼ ladxidóʼ binni, peru laanu coʼ. Nga runi, para ganda gánnanu xi peʼ caquiiñeʼ tuuxa para quixhedxinu ladxidóʼ caquiiñeʼ gucaadiaga chaahuinu laa. Zándaca guiníʼ íquenu xi niquíʼñenu pa laanu nga cadídinu lu ni cadíʼdibe ca ne guiníʼ íquenu laaca ngueca nga ni caquiiñebe. Peru cadi guiaandaʼ laanu gadxé gadxé nga ni caquiiñeʼ cada binni. Ni jma galán zanda gúninu nga cueenu tiempu para gucaadiaga chaahuinu tuuxa ne gúninu laa pregunta sin guninanu laa para gánnanu xi peʼ caquiiñeʼ ne xi cayuni sentir (Prov. 20:5).

8. ¿Ximodo gudixhedxí Jesús ladxidóʼ Marta ne María, ne xi rusiidini laanu? (Laaca zanda gúʼyaluʼ ca imagen ca).

⁸ Guiníʼ íquenu ximodo gudixhedxí Jesús ladxidóʼ Marta ne María dxi guti Lázaro, bizáʼnacaʼ. Neca ngueca yuubaʼ cadíʼdicabe, peru gadxé gadxé modo gucané Jesús laacabe. Despué de guniʼné Marta Jesús, gudxi Jesús laabe caadxi cosa ni caníʼ de dxi guiasa ca gueʼtuʼ ne nga nabé gucaneni Marta gapa jma fe dxandíʼ ziasa ca binni ni maʼ guti. Peru ora bidxagalú María Jesús ne cayuunaʼ, ruluíʼ si qué ñabi Jesús laabe gastiʼ de dxi guiasa ca gueʼtuʼ. Biinané laabe ne gunabadiidxaʼ laabe paraa nuu Lázaro (Juan 11:20-35). ¿Xi rusiidiʼ ndiʼ laanu yaʼ? Rusiidini laanu cadi nexheʼ diʼ ti modo para quixhedxinu ladxidóʼ xcaadxi, sínuque caquiiñeʼ guyúbinu xi peʼ nga ni caquiiñeʼ cada binni.

9. ¿Ximodo racané Biblia laanu quixhedxinu ladxidóʼ xcaadxi? (Romanos 15:4, 5).

⁹ Iquíʼñenu Biblia. Ora ridúʼndanenu binni ti textu ni zeeda lu Biblia, ratadxí ladxidóʼ ne riguidxi esperanza ni napa (biindaʼ Romanos 15:4, 5). Ne esperanza ca riguuni gana laa ne riguixhedxini ladxidóʼ (Is. 40:31). ¿Xi zanda gúninu para gánnanu xi versículo guidúʼndanenu binni yaʼ? Ni racané caadxi hermanu nga gápacaʼ ti lista ra cá caadxi textu ni zanda cuʼ gana xcaadxi, casi ni zeeda lu diidxaʼ «Consuelo» lu publicación ni láʼ Textos bíblicos para la vida cristiana. Laaca nabé galán guinábanu Jehová gacané laanu iquíʼñenu Stiidxaʼ jneza. Zanda gacané espíritu stibe laanu guietenaláʼdxinu textu ni gacané xcaadxi (Juan 14:26).

10. ¿Xiñee nabé risaca guininu né diidxaʼ nadóʼ ora quixhedxinu ladxidóʼ xcaadxi?

¹⁰ Guininu né diidxaʼ nadóʼ. Casi maʼ bidúʼyanu, diidxaʼ griegu ni guca traducir «quixhedxinu ladxidóʼ» laaca raca traducir ni casi «uguu jnézanu» ne «gudiʼnu conseju». Ne ziuu biaje nga peʼ nga ni caquiiñeʼ gúninu ora maʼ caguixhedxinu ladxidóʼ tuuxa para gacanenu laa guchaa modo riníʼ ique. Ne ora guizaaca nga, caquiiñeʼ guiníʼ ique chaahuinu ante guininu xiixa para gacanenu binni ca ne cadi guninanu laa (Prov. 12:18). Bisiidiʼ Jehová laanu ximodo gúninu ni ra guniʼné Elías. Guníʼ íquebe cadi jneza cayúnibe xhiiñabe casi profeta ne laaca guníʼ íquebe maʼ laasibe cayúnibe xhiiñaʼ Dios ndaaniʼ guidxi Israel. Peru né stale guendarannaxhii gucané Jehová laabe guchaabe modo riníʼ íquebe ne qué ñabi laabe cadi jneza nuube (1 Rey. 19:15-18). Laanu laaca zanda gacanenu ca hermanu stinu pa guinínenu laacaʼ né diidxaʼ nadóʼ ne guiníʼ ique chaahuinu xi chitídxinu laacaʼ. Gácanu nachaʼhuiʼ ne guininu diidxaʼ ni cuʼ gana ora gudiʼnu discursu ne ora gudiʼnu comentariu lu ca reunión stinu. Zacá zaguʼnu gana ca hermanu ne zacanenu laacaʼ iguidxi fe sticaʼ.

11. Stale biaje, ¿xii nga ni jma caquiiñeʼ ca ni cayacaná? (1 Juan 3:18).

¹¹ Gudiʼnu laacabe ni caquiiñecabe. Stale biaje cadi diidxaʼ si ni quixhedxí ladxidóʼ tuuxa nga ni caquiiñeʼ gábinu laa (biindaʼ 1 Juan 3:18). Bisaana Bernabé ti ejemplu galán para laanu. Bitoobe ti layú ni nápabe ne bidiibe bueltu que ca apóstol para gacanecaʼ caadxi hermanu pobre ni cadi xadxí de guyuunísacaʼ (Hech. 4:36, 37). Ca dxi riʼ, gadxé gadxé modo rusihuinni stale xpinni Cristu modo nadxiicaʼ xcaadxi. Ti hermana de Polonia láʼ Gabriela nabé triste biʼniʼ sentir dxi bilaahua neza ra nabeza ne gucaná lidxi. Laabe guniʼbe: «Nabezaniáʼ bixhozeʼ ne jñaaʼ ne guiradu nuudu xizaa ne cadxíbidu. Guníʼ iqueʼ ximodo gúnidu para guni chaahuidu lídxidu. Stale hermanu ni nuu ndaaniʼ ca congregación ni riaana gaxha de laadu beedacaʼ ra nuudu ne ti dxi si biʼniʼ chaahuicaʼ stale cosa. Ni bizaaca que gucaneni naa gannaʼ dxicheʼ cayabi Jehová xquidxi xi guni para quixhedxí ladxidóʼ ca ni cayacaná».

12. ¿Ximodo racanenu ca hermanu stinu ora runi huantarnu ca guendanagana ni rápanu?

¹² Guni huantarnu ca guendanagana gápanu. Gudxi Pablo ca xpinni Cristu de Tesalónica pur cayúnicaʼ huantar ne cadi caxélecaʼ de Jehová gucanecaʼ laabe gatadxí ladxidoʼbe ne guyuube gana. Biiyabe cadi pur gana si guiráʼ ni bíʼnibe pur laacaʼ (1 Tes. 3:5-8). Ne nánnabe laaca zanda cuʼbe gana ca hermanu, dede né ca ni qué runibiaʼbe, pa qué guixélebe de Jehová neca tídibe lu guendanagana (Col. 2:1, 2). Ngueca nga ni rizaaca ca hermanu stinu, nabé riuucabe gana ora gúʼyacabe ximodo cayacané Jehová laanu guni huantarnu ca guendanagana stinu.

13. ¿Xi caquiiñeʼ gúninu ora gacanenu tuuxa, ne xiñee?

¹³ Gápanu paciencia. Zándaca cadi nagueendaca zaguixhedxinu ladxidóʼ ti hermanu stinu. Nga runi cayabi Biblia laanu: «Lauguusaa gana laatu». Ca diidxaʼ ca caníʼcani de xiixa ni cadi lica naquiiñeʼ gusaana de gúninu (1 Tes. 5:11). Nga runi naquiiñeʼ gápanu paciencia ne cadi guireʼnu gana (1 Tes. 5:14). Yanna, ¿pa laanu nga ca ni caquiiñeʼ quixhedxícabe ladxidoʼno yaʼ? ¿Xi zanda gúninu?

XI CAQUIIÑEʼ GÚNINU ORA CAQUIIÑEʼ QUIXHEDXÍCABE LADXIDOʼNO

14, 15. ¿Xi caquiiñeʼ gúninu pa maʼ qué guidxélanu xi gúninu o pa nabé nuunu xizaa?

¹⁴ Guni orarnu Jehová. Pa maʼ qué guidxélanu xi gúninu o nabé nuunu xizaa, guinábanu Jehová quixhedxí ladxidoʼno (Sal. 94:19). Gábinu laabe xi peʼ caquíʼñenu ne ximodo peʼ cayuni sentirnu (Sal. 62:8). Dxandíʼ, maca nánnabe xi caquíʼñenu ante guinábanu ni laabe. Peru ora ruxhélenu ladxidoʼno nezalube, rusihuínninu nápanu fe laabe. Ne Jehová maʼ nanna ximodo guicabi ca ni runi orar laa né stale fe (Mar. 11:24). Filipenses 4:6, 7 cusietenalaʼdxiʼ laanu: «Lagabi Dios xi caquiiñetu, [ . . . ] óraque zudii Dios laatu paz stiʼ dede guirutiʼ zanda guiene ximodo ni, ne zápani ladxidoʼto ne xquendabiaanitu».

¹⁵ Guinábanu gacanécabe laanu. Gábinu ti xhamígunu o ti ancianu ni nápanu confianza ximodo cayuni sentirnu. Dxandíʼ peʼ zanda quixhedxí ca hermanu ladxidoʼno, peru qué zánnacabe xi peʼ cayuni sentirnu o xi caquíʼñenu pa qué gábinu ni laacabe (Prov. 14:10). Nga runi guinábanu laacabe gucaadiágacabe laanu o guluíʼcabe laanu ti textu ni zeeda lu Biblia o ti artículo ni huaguixhedxí ladxidóʼcabe.

16. ¿Xi zándaca guizaaca ora gacalaʼdxiʼ xcaadxi cuʼ gana laanu, ne xi cadi naquiiñeʼ guiaandaʼ laanu?

¹⁶ Gápanu paciencia ne guni perdonarnu. Zándaca ora maʼ caguu ca hermanu gana laanu gúnicaʼ xiixa ni qué chuuláʼdxinu. Zándaca gúnicabe o guiníʼcabe xiixa ni guniná laanu lugar de gacané laanu. Pa guizaaca nga la? gápanu paciencia laacabe (1 Cor. 13:4, 7). Cadi guiaandaʼ laanu ni ruzeeteʼ Santiago 3:2: «Pa nuu tuuxa qué ruchee ora riníʼ la? laa huaxa naca ti binni ni qué gapa pecadu». Nga runi, guidúʼyanu ni racalaʼdxiʼ ca hermanu nga gacanecaʼ laanu. Cadi guiaandaʼ laanu «neca racalaʼdxiʼ binni guni ni jneza, peru débil cuerpu stiʼ» (Mat. 26:41).

17. ¿Xi caquiiñeʼ gúninu?

¹⁷ Guiranu nga caquíʼñenu quixhedxícabe ladxidoʼno ne cúʼcabe gana laanu, ne jmaruʼ si zaquíʼñenu ni lu ca últimu dxi nagana ni zeeda ca ne ora jma feu modo gucaalú ca enemigu stiʼ Dios laanu. Nga runi, gúninu guiráʼ ni nuu lu nanu para quixhedxinu ladxidóʼ xcaadxi ne gudiʼnu lugar quixhedxícabe ladxidoʼno.