Biiyaʼ ca guendanagana gápaluʼ modo ruuyaʼ Jehová cani

1, 2. ¿Xi caquiiñeʼ gúninu para guni huantarnu ca guendanagana gápanu? (Laaca zanda gúʼyaluʼ imagen ca).

¿ÑEE cadíʼdiluʼ lu xiixa injusticia, cucaalú familia stiluʼ lii o canazanándacabe lii pur ni runi creluʼ la? ¿Ñee huaraluʼ o maʼ nápaluʼ ca guendanagana o ca yuubaʼ rapa binni ora maʼ huaniisi la? ¿O naná nuuluʼ purtiʼ gutiʼ tuuxa ni nadxiiluʼ la? Neca nánnanu nabé nadxii Jehová ca xpinni, zándaca nápanu stale «guendananá ne yuubaʼ» (Sal. 90:10).

² Para ganda guni huantarnu ca guendanagana stinu, caquiiñeʼ guidúʼyanu cani modo ruuyaʼ Jehová cani. ¿Xiñee nabé risaca gúninu nga yaʼ? Para ganda guiénenu ni caninu ca guníʼ ique ndiʼ. Zeeda gaca ca guendanagana stinu casi ca cosa o ca bache ni nuu neza ra zigusá tuuxa carru. Ora ridúʼyanu xiixa lu carretera riníʼ íquenu pa zanda tídinu cueeni, chuunu jma chaahuiʼ o cuezadxinu ti ratu. Peru para ganna chaahuinu xi caquiiñeʼ gúninu, nabé risaca guʼyaʼ chaahuinu xi peʼ nexheʼ lu carretera ca. Peru pa nabiidiʼ parabrisa stinu, qué zanda guiduʼyaʼ chaahuinu ni. Zaqueca nga laanu, para ganda guni huantarnu ca guendanagana stinu, risaca guidúʼyanu cani modo ruuyaʼ Jehová cani. Lu artículo riʼ, zadúʼyanu chonna cosa, primé, ximodo nga jma jneza guidúʼyanu ca guendanagana stinu. Guiropaʼ, xi zanda guizaacanu pa qué guidúʼyanu cani modo ruuyaʼ Jehová cani. Ne guionnaʼ, xi zanda gúninu para cadi guireʼnu gana ora tídinu lu guendanagana.

MODO NAQUIIÑEʼ GUIDÚʼYANU CA GUENDANAGANA STINU

3. ¿Xiñee nánnanu zápanu guendanagana lu guidxilayú malu riʼ?

³ Zápanu guendanagana lu guidxilayú malu riʼ. Cumu nácanu binni ruchee ne Binidxabaʼ nga cayuni mandar guidxilayú riʼ la? záparunu guendanagana. Ne ra jma mayaca guinitilú guidxilayú malu riʼ, jma nagana modo zabani binni, zándaca pur ca desastre natural ni rizaaca o pur ca cosa ni runi ca binni malu (Mat. 24:8; 2 Tim. 3:13). Pa ñuni chaahuiʼ Jehová guiráʼ ca guendanagana ca yanna la? zándaca nihuinni cayacanebe Binidxabaʼ guni mandar. Casi maʼ bidúʼyanu, lu guidxilayú malu riʼ napa xidé tídinu lu xiixa guendanagana (Ecl. 9:12).

4. ¿Gunáʼ nga stiʼ razón pur nápanu guendanagana?

⁴ Laaca rapanu guendanagana purtiʼ nácanu xpinni Cristu. Stale biaje gudxi Jesús ca discípulo stiʼ zazanándacabe laacaʼ pur ni runi crecaʼ (Mat. 24:9; Juan 16:2). Ra gánnanu ndiʼ racaneni laanu para cadi guirá fe stinu ora sanándacabe laanu (1 Tes. 3:3, 4). Ra guzuhuaʼnu dxiichiʼ neca nápanu guendanagana, nánnanu cadi cusaana de sanu lu neza ni ziné laanu lu guendanabani ni qué zaluxe. Laaca rusihuínninu maʼ gulinu guni adorarnu Jehová purtiʼ laa nga ni jma jneza runi mandar, ne rusihuínninu rusiguii Binidxabaʼ. Tobi de ca cosa ni cadi dxandíʼ ni maʼ guníʼ Binidxabaʼ nga: runi adorar binni Jehová purtiʼ si rudiibe laacaʼ ni caquiiñecaʼ. Ne para gusihuínnibe nápabe razón, nabé feu modo rucaalube ca xpinni Dios (Job 1:9-11). ¡Guizáʼ rusiéchenu ladxidóʼ Jehová ora qué rixélenu de laa pur nadxiinu laa! (Prov. 27:11).

5. ¿Xi zanda guizíʼdinu de ni riete lu Eclesiastés 7:13, 14? (Laaca zanda gúʼyaluʼ ca imagen ca).

⁵ Rudii Jehová lugar chuʼ ca guendanagana ca. Qué rúnibe laanu cosa malu ne qué rutiidibe laanu lu prueba (Sant. 1:13). Peru rey Salomón guníʼ dxi ridiʼdiʼ binni lu guendanagana nácani ti cosa ni runi Dios ni dxandíʼ (biindaʼ Eclesiastés 7:13, 14). Cadi caníʼdibe runi Jehová cosa malu, sínuque rudiibe lugar guizaaca cani. Yanna, ¿xi zanda guizíʼdinu de ni guníʼ Salomón yaʼ? Caquiiñeʼ gánnanu, laga nabáninu ndaaniʼ guidxilayú malu stiʼ Binidxabaʼ riʼ, zápanu dxi galán ne dxi feu. Ora gápanu ti dxi galán, guidúʼyanu ni casi ti regalu stiʼ Jehová ne gudiʼnu xquixe peʼ laabe. Ni guníʼ Salomón ca, laaca rusietenaláʼdxini laanu qué zanda ganna binni xi peʼ chiguizaaca de laa, ni caninu nga, qué zanda gánnanu pa zieni laanu galán o pa zápanu stale guendanagana. Nin ca binni nachaʼhuiʼ ne ca ni cadi nachaʼhuiʼ qué rilacaʼ de ca guendanagana ni málasi redandá.

6. ¿Xiñee rudii Jehová lugar tídinu lu prueba? (Hebreos 12:7, 11).

⁶ Pa guidúʼyanu ca guendanagana ca modo ruuyaʼ Jehová cani la? zudiʼnu cuenta cusiidiʼ Jehová laanu guyúbinu laa para gacané laanu ne cadi gápanu confianza laca laanu. Nánnabe xi rizaacanu ne riuubaʼ ladxidoʼbe gúʼyabe laanu cayacananu. Dede né ora rudiibe lugar «sanu lu ti neza nacahui», rábirube laanu xi gúninu, zacá rusihuínnibe nadxiibe laanu ne rudiibe laanu stipa para ganda guni huantarnu (Sal. 23:4). Laaca racané ca guendanagana ca laanu guidúʼyanu gunna nga ca cosa ni zanda gucaa laanu gucheʼnu ne guchaʼnu modo laanu ra gacané Jehová laanu (biindaʼ Hebreos 12:7, 11). Casi Job la? gupa xidé biziidibe gácabe humilde. Neca cadi Jehová nga bitiidiʼ laabe lu prueba, peru bidii lugar guizaacabe cani ne biquiiñeʼ cani para guiziidibe stale cosa risaca (Job 42:1-6). Intiica si guizaacanu, nánnanu qué zudii Jehová lugar guizaacanu xiixa ni maʼ qué zanda gaca chaahuiʼ. Pa guni huantarnu sin guixélenu de Jehová la? zuni ganarnu (Rom. 8:35-39).

7. ¿Xiñee zanda chuʼnu nayecheʼ ora sanándacabe laanu?

⁷ Zanda chuʼnu nayecheʼ ora sanándacabe laanu. Pa canazanándacabe lii pur ni runi creluʼ, cadi guiníʼ íqueluʼ maʼ cadi nadxii Jehová lii, sínuque rusihuínnini dxandíʼ peʼ nadxiibe lii (Mat. 5:10-12). Ora maʼ canazanándacabe lii, biiyaʼ guendanagana ca modo ruuyaʼ Jehová ni, nga zacané lii chuʼluʼ nayecheʼ ne guiníʼ íqueluʼ risácaluʼ cásica bizaaca ca apóstol que (Hech. 5:40-42). Ne pa qué guixéleluʼ de Dios, zanda gacaneluʼ xcaadxi guiziidicaʼ ni dxandíʼ ne «zacá gusisácabe Dios» (1 Ped. 2:12). Guníʼ ique ejemplu stiʼ José, guluu Jehová ndaayaʼ laabe laga cadíʼdibe lu guendanagana, ne cadi ora si biluxe gudíʼdibe lúcani. Ne ngueca nga ni zuni Jehová né lii (Gén. 39:3, 23).

8. ¿Xi sti razón nápanu para guni huantarnu ca prueba tídinu?

⁸ Mayaca guiree ca guendanagana stinu. Nga nga tobi de ca cosa ni rizíʼdinu de ni bizaaca Job. Lu relatu ca ná: «Guluu Jehová ndaayaʼ ra maʼ ziluxe xquendanabani Job jma qué dxi bizuluni» (Job 42:12). Ne ngueca nga ni cayabi Jehová laanu. Zaguube ndaayaʼ «ra maʼ ziluxe» xquendanabáninu, ni caninu nga dxi guibáninu sin qué chuʼ dxi gátinu, jma que dxi bizulú xquendanabáninu ra gúpanu stale yuubaʼ lu guidxilayú malu riʼ. ¿Cadi dxandíʼ nga nga tobi de ca razón jma risaca para guni huantarnu dede dxi gueeda fin stiʼ guidxilayú malu riʼ la? (Mat. 24:13).

PA QUÉ GUIDÚʼYANU CA GUENDANAGANA CA MODO RUUYAʼ JEHOVÁ CANI

9. ¿Ximodo zanda gusiróʼbanu xiixa guendanagana pa qué guidúʼyanu ni modo ruuyaʼ Jehová ni?

⁹ Ora cadídinu lu xiixa guendanagana, zanda gusiróʼbanu ni pa qué guidúʼyanu ni modo ruuyaʼ Jehová ni. Zándaca guiníʼ íquenu Jehová nga cutiidiʼ laanu lu guendanagana. Ne nga peʼ nga ni guníʼ ique Job ti tiempu, ne pur nga biyúbibe gusihuínnibe jma jneza ni rúnibe que Dios (Job 32:2). Ne zaqueca nga bizaaca Noemí, primeru ga que bigaanibe donda ique Jehová pur ni cazaacabe (Rut 1:13, 20, 21). Pa qué nusaana Job ne Noemí de niníʼ íquecaʼ zaqué la? nusaana de ñaca xhamígucaʼ Jehová (Prov. 19:3). Peru gucané Jehová laacabe gúʼyacabe ca guendanagana ca modo ruuyabe cani ne guluube ndaayaʼ laacaʼ purtiʼ qué nixélecaʼ de laabe.

10. ¿Xi zándaca guiníʼ íquenu ora tídinu lu xiixa guendanagana?

¹⁰ Neca nánnanu cadi Jehová nga cutiidiʼ laanu lu xiixa guendanagana, zándaca guzulú guiníʼ íquenu pa maʼ bisiaandabe laanu. Pa guiníʼ íquenu zacá zanda guirá stipa stinu (Prov. 24:10). Cásica rey David ne zaqueca profeta Habacuc gudíʼdicaʼ lu stale guendanagana ne guyuu biaje guníʼ íquecaʼ pa cucaadiaga Jehová laacaʼ (Sal. 10:1; Hab. 1:2). Neca zaqué qué nusaana de ñuni orárcabe. Bisihuinni Jehová qué zaxeleʼ de laacabe ne ngueca nga ni zúnibe pur laanu pa qué gusaana de guni orarnu laabe (Sal. 10:17).

11. ¿Xi zanda guizaacanu pa qué guidúʼyanu ca guendanagana ca modo ruuyaʼ Jehová cani?

¹¹ Pa qué guidúʼyanu ca guendanagana ca modo ruuyaʼ Jehová cani la? zándaca guidxagayaanu purtiʼ cadi cabézanu cani ne dede guiníʼ íquenu cadi laadinu nga ca ni caquiiñeʼ tídinu lu ca guendanagana ca (1 Ped. 4:12). Guiníʼ íquenu ni bizaaca ca discípulo stiʼ Jesús. Guca nagana para laacabe guiénecabe nabé feu modo zazanándacabe Jesús (Luc. 18:33, 34). Neca nayaʼniʼ modo bisiénebe laacaʼ ca guendanagana ni chiguidxaagalube, peru guníʼ ique apóstol Pedro qué zudii Dios lugar tídibe lúcani. Nanna Jesús voluntad stiʼ Jehová ngue gacanabe ne gátibe. Ne modo caníʼ ique Pedro que zanda gucaani Jesús cadi guni ni ná Jehová, ngue runi guluu jnézabe laa (Mar. 8:31-33). Gutiʼ si Jesús, gúcaruʼ nagana para ca discípulo stiʼ guiénecaʼ xiñee gucanabe ne gútibe. Peru qué niníʼ ique Jesús maʼ qué gápacabe remediu. Ora guníʼnebe laacaʼ biásasibe de lade gueʼtuʼ, gucanebe laacaʼ guiénecaʼ xiñee bizaaca ngue «ora bisiene chaahuibe» laacaʼ Stiidxaʼ Dios (Luc. 24:25-27, 32, 44-48). Ra guiníʼ íquecabe ni cusiidiʼ Jesús que zacaneni laacabe chúʼcabe listu para ora sánanda binni laacabe. Nabé risaca guiníʼ íquenu ni rusiidiʼ Biblia de ora sanándacabe laanu, nga zacané laanu chuʼnu listu para gudxíʼlunu ca guendanagana ni guidxaagalunu.

12. ¿Xi zándaca guiníʼ íquenu pa qué guidúʼyanu ca cosa ca modo ruuyaʼ Jehová cani?

¹² Pa qué guidúʼyanu ca cosa ca modo ruuyaʼ Jehová cani la? zaníʼ íquenu cadídinu lu xiixa injusticia o zadúʼyanu naroʼbaʼ peʼ guendanagana ra cadídinu neca cadi zacá ni. Zándaca nuu caadxi hermanu guiníʼ íquecaʼ cadíʼdicaʼ lu xiixa injusticia purtiʼ cadi cudiicabe laacaʼ xiixa dxiiñaʼ ndaaniʼ xquidxi Dios o purtiʼ caquiiñeʼ gusaanacaʼ xiixa privilegiu. Guiníʼ íquenu tobi de ca cosa ni bisiidiʼ Jesús lu parábola stiʼ ca hombre ni cayuni dxiiñaʼ lu layú ra ruzuhuaa lubáʼ uva. Bidxiichi caadxi de laacabe purtiʼ guníʼ íquecaʼ huaxiéʼ cayáxacaʼ, peru dueñu stiʼ layú lubáʼ uva qué gudxi tobi de laacabe: «Xhamiguaʼ, cadi cayacaʼ diaʼ malu né lii» (Mat. 20:10-13). Cadi cadiʼdiʼ ca hombre que lu xiixa injusticia; caguicheruaacabe purtiʼ cabézacabe guiáxacabe jma. ¿Cadi dxandíʼ qué racaláʼdxinu guizaacanu nga la? Yanna, guininu xi zanda gúninu para guidúʼyanu ca guendanagana ca modo ruuyaʼ Jehová cani.

XI ZANDA GÚNINU ORA TÍDINU LU GUENDANAGANA

13. ¿Xi zanda guizaaca ora tídinu lu guendanagana?

¹³ Nánnanu xi rusiidiʼ Biblia de ca guendanagana ca. Ne zándaca, ora cadiʼdiʼ xcaadxi lu guendanagana, stale biaje ridúʼndanenu laacaʼ textu ni cuʼ gana laacaʼ. Peru ora laapenu nápanu xiixa guendanagana, zándaca gaca nagana para laanu guidúʼyanu ca cosa ca modo ruuyaʼ Jehová cani. Zándaca guiníʼ íquenu cutiidiʼ Dios laanu lu castigu o cadi cucaadiaga ca oración stinu. ¿Xi zanda gúninu para guidúʼyanu ca guendanagana ca modo ruuyaʼ Jehová cani yaʼ?

14. ¿Xi zanda guinábanu lu ca oración stinu ora cadídinu lu xiixa guendanagana? (Filipenses 4:13).

¹⁴ Guinábanu Jehová gacané laanu. Gábinu Bixhózenu ni nuu guibáʼ xi cazaacanu ne ximodo cayuni sentirnu. Zanda gábinu laabe xi peʼ racaláʼdxinu gúnibe pur laanu. Laaca galán guinábanu laabe espíritu santu stibe para gudii laanu stipa ne gánnanu xi gúninu. Peru cadi guiaandaʼ laanu, zanda guicábibe laanu modo cadi cabézanu ni (Efes. 3:20). Zándaca gacanebe laanu ra iquiiñebe ca ángel o ca hermanu stinu (Sal. 34:7). Nga runi, chuʼnu listu para guidúʼyanu ximodo cayacané Jehová laanu ne gudiʼnu lugar gacanebe laanu. Ne chuʼnu seguru zudiibe laanu espíritu santu biaʼ peʼ ni caquíʼñenu para gudxíʼlunu ca guendanagana stinu (biindaʼ Filipenses 4:13).

15. ¿Xi cadi naquiiñeʼ gusaana de gúninu ora cadídinu lu guendanagana? (Laaca zanda gúʼyaluʼ imagen ca).

¹⁵ Cadi gusaana de gúniluʼ ca cosa ni guchiña lii jma gaxha de Jehová. Zándaca maʼ qué rúninu biaʼ bíninu dxiqué, peru gúninu biaʼ nuu lu nanu. Ora chuʼnu xizaa ne gápanu guendanagana, óraca nga jma naquiiñeʼ guiníʼ íquenu modo riníʼ ique Jehová (Sal. 119:143). Nga runi, cadi gusaana de guidúʼndanu Biblia, guni estudiarnu ni ne guiníʼ íquenu lu ni cadúʼndanu. Guni predicarnu biaʼ gándatiʼ, cadi guiáʼdxanu ca reunión stinu ne guni comentarnu. Cadi guyúbinu chuʼnu, ni jma galán zanda gúninu nga chuʼnu gaxha de ca hermanu stinu (Prov. 18:1).

16. ¿Xi zanda guiníʼ íquenu ora tídinu lu xiixa desgracia, ni xi zanda gacané laanu para gusaana de guiníʼ íquenu zacá? (2 Corintios 10:4, 5).

¹⁶ Biindaʼ Biblia para guchaaluʼ modo riníʼ íqueluʼ. Ora rizaacanu xiixa ni cadi galán, zándaca guiníʼ íquenu cosa feu de laanu o de Jehová. Pa cazaacanu nga la? caquiiñeʼ gusábanu ca «cosa ni zuhuaa dxiichiʼ» ndaaniʼ íquenu (biindaʼ 2 Corintios 10:4, 5). ¿Ximodo zanda gúninu nga yaʼ? Ra iquíʼñenu ni runibiaʼnu de Dios, ni zeeda lu Biblia ne lu ca publicación stinu. Pa guiníʼ íquenu maʼ cadi nadxii Jehová laanu la? galán gúninu guidúʼndanu ni bizaaca apóstol Pablo. Biaʼ tiempu bíʼnibe xhiiñaʼ Dios bidxaagalube stale guendanagana. Peru guiráʼ ngue gucané laabe chuʼbe seguru nadxiiruʼ Jehová ne Jesús laabe (2 Cor. 11:23-27). Pa dede yanna riníʼ íquenu caʼruʼ guni perdonar Jehová laanu pur guiráʼ ni bíninu dxiqué, gucaʼnu ca textu ni rusihuinni maʼ biʼniʼ perdonarbe laanu (Is. 43:25). Despué guidúʼndanu cani ne guiníʼ ique chaahuinu xi nácani (Sal. 119:97). Ne pa bizaacanu ti desgracia ne rucaani laani guiníʼ íquenu pa dxandíʼ rapa Jehová ca xpinni la? galán guyúbinu información ni cusiene xiñee rudiibe lugar gacaná binni ne ximodo rápabe laanu intiica si guizaacanu (Sal. 91:9-12). Laaca zanda guidúʼndanu ni bizaaca ca hermanu ne ca hermana ni bidxagalucaʼ xiixa guendanagana ni nabé bininá laacaʼ.a

17. ¿Xi zanda gúninu ora guidxaagalunu xiixa guendanagana?

¹⁷ ¿Ñee nuuluʼ nayecheʼ yannadxí ne cadi cadíʼdiluʼ lu guendanagana naroʼbaʼ la? Pa zacá ni, bidii xquixe peʼ Jehová ne guníʼ ique guiráʼ cosa ni maʼ bidiibe ne maʼ bíʼnibe pur lii (Ecl. 7:14). Peru ora guidxaagaluluʼ ti guendanagana, biʼniʼ stipa gúʼyaluʼ ca cosa ca modo ruuyaʼ Jehová cani ne gupa confianza laabe de guidubi ladxidoʼloʼ. Cayabi Jehová laanu, ca xpinni, zacané cada tobi de laanu guni huantarnu ca guendanagana gápanu (1 Cor. 10:13). Yanna, ¿ximodo zanda gacanenu ca hermanu stinu ora cadíʼdicaʼ lu xiixa guendanagana yaʼ? Lu sti artículo ca zadúʼyanu ni.