Gastiʼ zanda gucueeza «Dios ni riníʼ ni dxandíʼ» guni ni maʼ gudixhe ique

1. Casi ná Salmo 31:2-5, ¿xiñee zanda gápanu confianza Jehová?

NABÁNINU ndaaniʼ guidxilayú ni runi mandar Binidxabaʼ, nga runi nabé ridúʼyanu rusiguii binni ne runi traicionarcaʼ xcaadxi. Nuu biaje zándaca gaca nagana para laanu gápanu confianza tuuxa. Nuu empresa rúnicaʼ trampa para cadi guni ganar xcaadxi empresa laacaʼ. Nuu de ca ni napa negocio rusiguiicaʼ para ganda gutoocaʼ. Ne nuu tu laa maʼ bidiicaʼ cuenta qué zanda gápacaʼ confianza ca xhamígucaʼ purtiʼ qué rúnicaʼ ni riniʼcaʼ. ¡Peru maʼ gadxé si Jehová! Purtiʼ laabe nga «Dios ni riníʼ ni dxandíʼ», nga runi zanda gápanu confianza laabe (biindaʼ Salmo 31:2-5). Qué rusiguii Jehová, guiráʼ ni riniʼbe ne ni rúnibe dxandíʼ cani. Nga runi zanda gápanu confianza laabe purtiʼ siempre rúnibe ni riniʼbe.

2. ¿Xi zadúʼyanu lu artículo riʼ?

² Lu artículo riʼ zadúʼyanu caadxi razón ni zacané laanu gápanu confianza Jehová de guidubi ladxidoʼno. Despué zadúʼyanu xi zuni Dios ni riníʼ ni dxandíʼ para gunduuxeʼ Binidxabaʼ ne guidxilayú malu riʼ, ne xi cayúnibe ca dxi nabáninu riʼ para ganda guni cumplirbe ni maʼ gudixhe íquebe gúnibe. Guiráʼ ca ndiʼ zacanécani laanu gácanu binni nadxibalú ne guininu ni dxandíʼ sin guidxíbinu.

CAADXI RAZÓN NI NÁPANU PARA GÁPANU CONFIANZA DIOS NI RINÍʼ NI DXANDÍʼ

3. ¿Xiñee zanda gápanu confianza Jehová de guidubi ladxidoʼno?

³ Zanda gápanu confianza Jehová purtiʼ laa bizáʼ guiráʼ cosa. Laabe bizaʼbe guibáʼ, guidxilayú ne guiráʼ ni nabani ndaanini (Gén. 1:1; Sal. 36:9; Apoc. 4:11). Bizaʼbe guidxilayú riʼ ne guiráʼ ni caquiiñeni para ganda chuʼ guendanabani ndaanini. Nánnabe xi gúnibe intiica si cosa guizaaca. Cumu guizáʼ nuu xpiaaniʼ Jehová ne qué rirá poder stibe la? zanda gápanu confianza laabe ne gusaananu guendanabani stinu lu nabe ne chuʼnu seguru zacanebe laanu guibáninu galán.

4. ¿Ximodo nánnanu nadxii Jehová laanu?

⁴ Zanda gápanu confianza Jehová purtiʼ nadxii laanu. Bizaʼbe binni purtiʼ racaláʼdxibe gudiibe laacaʼ ti regalu sicarú, guendanabani. Laaca bizaʼbe laanu casi laabe ne modo nácabe (Gén. 1:26). Bizaʼbe laanu para ganda cuinu xi gúninu ne bidiibe laanu ti lugar sicarú ra cuézanu (Sal. 115:16). Gúdxibe Adán ne Eva gusiroobacaʼ Paraísu que (Gén. 1:28; 2:15). Gúdxibe laacaʼ zanda iquiiñecaʼ guiráʼ ni nuu lu guidxilayú para guibánicaʼ nayecheʼ. Rihuinni dxíchica «guendarannaxhii ni napa Jehová [ . . . ] qué ziuu dxi guirá ni» (Sal. 103:17).

5. a) ¿Ximodo biʼniʼ Jehová ni maʼ guníʼ neca bichee Adán ne Eva? b) ¿Gunáʼ nga caadxi de ca promesa ni maʼ biʼniʼ cumplir Jehová? (Biiyaʼ cuadru ni láʼ «Runi Jehová ni maʼ guníʼ»).

⁵ Zanda gápanu confianza Jehová purtiʼ siempre runi ni riníʼ. Dxi bizaʼbe guidxilayú, bíʼnibe ni para cueza binni ndaanini; ne cadi pur gana si bizaʼbe ni (Is. 45:18, 19). Peru cumu bicheené Adán ne Eva Dios la? gupa xidé gúticabe. ¿Xi zazaaca né ni gudixhe ique Dios guni yaʼ? ¿Maʼ qué zaca ni la? Gastiʼ zanda gucueeza Jehová para guni ni maʼ gudixhe ique (Is. 46:10, 11). Qué nuchaa ni naguixhe íquebe gúnibe lu guidxilayú: racaláʼdxibe guibani puru si binni nachaʼhuiʼ ndaanini. Nga runi bidiibe lugar gapa Adán ne Eva xiiñicaʼ ne biseendabe Jesús para gulá ca ni za de Adán ti ganda guibánicaʼ sin qué chuʼ dxi gáticaʼ (Juan 3:16).

RUUYAʼ DIOS NI RINÍʼ NI DXANDÍʼ GACA NI MAʼ GUNÍʼ

6. ¿Xi guníʼ Jehová zazaaca despué de bicaalúcabe laa ndaaniʼ jardín de Edén que?

⁶ ¿Tu bicaa Adán ne Eva gudxiidéchecaʼ Dios? «Beendaʼ yooxhoʼ ni láʼ Diablu ne Binidxabaʼ» (Apoc. 12:9; Gén. 3:4, 5; Juan 8:44).a Ora bizeeteʼ Jehová xi chiguizaacabe guníʼ zanitilube (Gén. 3:15). Laaca bizeeteʼ ante guizaaca nga, stale binni zinanda Binidxabaʼ ne zúnicaʼ ni rúnibe. Peru ziuu tu laa zuzuubaʼ stiidxaʼ Jehová ne qué zaxélecaʼ de laabe.

7. ¿Tuu ndiʼ ca ni rinanda Binidxabaʼ, ne xi zazaacacabe?

⁷ ¿Tuu ndiʼ ca ni rinanda Binidxabaʼ yaʼ? Ca ángel ni bicaalú Jehová ne ca binni ni qué ruzuubaʼ diidxaʼ. Cásica Binidxabaʼ, laaca rucaalúcabe Dios ne ni naguixhe ique guni, ne pur nga zanda peʼ guininu zácabe de Binidxabaʼ. Peru maʼ gudixhe Jehová padxí gunduuxeʼ Binidxabaʼ ne guiráʼ ca ni racané laa (Dan. 2:44; Rom. 16:20).

8. ¿Xi biʼniʼ Jesús lu iza 1914? (Laaca zanda gúʼyaluʼ ca imagen ca).

⁸ ¿Xiñee nuunu seguru zunduuxeʼ Jehová Binidxabaʼ ne ca ni racané laa yaʼ? Guiníʼ íquenu ndiʼ. Lu iza 1914, gulí Jehová Jesús para gaca Rey, ne bizulú Jesús cadindené Binidxabaʼ ne ca demonio stiʼ. Cumu biníticabe la? bilaa Jesús laacabe lu guidxilayú (Apoc. 12:7-9). Neca guibáʼ nga guca guerra riʼ, peru rihuínnica laaca cayuninani guidxilayú riʼ. Dede lu iza 1914, cayuni Binidxabaʼ guiráʼ ni nuu lu náʼ para gucaa stale binni chinanda laa. Ne pur nga jma feu modo nabani binni. Nga huaʼ runi ná Biblia: «¡Gapagá si guidxilayú ne nisadóʼ laa! Purtiʼ maʼ biete Binidxabaʼ ra nuutu ne guizáʼ cadxiichi, purtiʼ nanna maʼ huaxiéʼ tiempu napa» (Apoc. 12:12). Peru maʼ cadi candaa zunduuxeʼ Jesús guerra ni bizulú lu iza 1914 que ne zuni ganar guiráʼ ca enemigu stiʼ. Zunduuxebe Binidxabaʼ ne guiráʼ ca ni racané laa (Apoc. 6:2). Zusiabe lá Jehová tobi si tiru ne zahuinni dxíchica Jehová nga Dios ni riníʼ ni dxandíʼ (Sal. 45:4-6; Ezeq. 38:23).

Primera Guerra Mundial: U.S. National Archives photo; ti bomba: USAF photo; guendahuará: blvdone/stock.adobe.com; ra cadíndecabe: inhauscreative/E+ via Getty Images

CUTAGULISAA DIOS CA NI NADXII NI DXANDÍʼ

9. ¿Tuu nga ca ni cutagulisaa Jehová ca dxi stinu riʼ?

⁹ Cutagulisaa Jehová «guiráʼ cosa nezalú Cristu, ca cosa ni nuu guibáʼ ne ca cosa ni nuu lu guidxilayú» (Efes. 1:10). Diidxaʼ «ca cosa ni nuu guibáʼ» caniʼni de ca ungidu, ca ni maʼ gulí Jehová para guni mandarnecaʼ Cristu guibáʼ. Ne diidxaʼ «ca cosa ni nuu lu guidxilayú» caniʼni de ca binni ni chiguibani lu ti Paraísu ndaaniʼ guidxilayú riʼ sin qué chuʼ dxi gáticaʼ. Guizáʼ nuu xhiiñaʼ ca xpinni Jehová riʼ purtiʼ cayacanecaʼ xcaadxi guiziidicaʼ ni dxandíʼ ne cusihuínnicaʼ rusiguii Binidxabaʼ.

10. ¿Xi cayuni Jehová para cuee binni ndaaniʼ religión ni qué rusiidiʼ ni dxandíʼ? (Apocalipsis 14:6, 7).

¹⁰ ¿Ximodo cutagulisaa Jehová ca binni ni nadxii ni dxandíʼ yaʼ? Ra caquiiñebe xquídxibe para guni predicarcaʼ lu guidubi naca guidxilayú (biindaʼ Apocalipsis 14:6, 7). Neca riquiiñebe binni guidxilayú para chiné ca noticia galán ra nuu xcaadxi, laaca cayacané ca ángel para gutagulisaacaʼ ndaaniʼ congregación ca binni ni nayá ladxidóʼ. Cumu cayaca predicar la? rihuínnica cadi dxandíʼ guiráʼ ni maʼ bisiidiʼ Binidxabaʼ de Jehová ra riquiiñeʼ Babilonia guidxi roʼ, laani nga guiráʼ religión ni qué rusiidiʼ ni dxandíʼ ni nuu lu guidubi guidxilayú (Apoc. 18:2, 4). Maʼ cadi candaa zanitilú guiráʼ religión ni qué rusiidiʼ ni dxandíʼ ne ca ni nadxii Dios ni riníʼ ni dxandíʼ la? zusisácacaʼ laabe (Apoc. 17:16).

11. ¿Ximodo zanda gánnanu tuu nga ca ni dxandíʼ xpinni Jehová?

¹¹ Riguu Jehová ndaaniʼ xquidxi gadxé gadxé clase binni, gastiʼ naca padé laacaʼ, ximodo biniisicaʼ ne pa nápacaʼ o qué gápacaʼ bueltu (Apoc. 7:9, 10). Ora runadiágacabe «ca noticia galán», rudiicabe cuenta maʼ bidxélacabe ni dxandíʼ ne riuucabe ndaaniʼ xquidxi Dios né stale guendanayecheʼ (Mar. 13:10). Ne ra zidiʼdiʼ tiempu rihuinni dxíchica tuu nga ca ni runi ni ná Dios modo racalaʼdxiʼ ne tu laa coʼ. Profeta Malaquías guníʼ zazaaca ndiʼ: «Laatu zuuyatu sti biaje maʼ gadxé nga ti binni runi ni jneza ne maʼ gadxé nga ti binni malu, ti binni ni runi xhiiñaʼ Dios ne tobi ni qué runi xhiiñabe» (Mal. 3:18). Ca xpinni Jehová rusihuínnicaʼ runi adorarcaʼ Dios ni riníʼ ni dxandíʼ pur modo nácacaʼ ne pur modo runi predicarcaʼ.

12. Ora runi predicarnu, ¿ximodo racaneni gaca ni maʼ gudixhe ique Jehová guni?

¹² Ora runi predicarnu «ca noticia galán stiʼ Reinu», rusihuínninu cayúninu ni biʼniʼ mandar Jesús laanu gúninu ne cayacanenu gaca cumplir ti profecía (Mat. 24:14; 28:18-20). Pur dxiiñaʼ ni cayaca riʼ, stale hombre ne gunaa lu guidubi naca guidxilayú cayácacaʼ xpinni Jesús ne zanda guni adorarcaʼ Dios ni riníʼ ni dxandíʼ sin qué chuʼ dxi gáticaʼ. Zacá racanenu Jehová para gaca ni maʼ guníʼ. ¡Pabiáʼ naroʼbaʼ privilegiu nápanu!

CHUʼNU SEGURU ZUNI JEHOVÁ NI MAʼ GUNÍʼ

13. ¿Tuu nga ca ni jma cucaalú Binidxabaʼ, ne xiñee?

¹³ Guizáʼ cadxiichi Binidxabaʼ «purtiʼ nanna maʼ huaxiéʼ tiempu napa» para guinitilú guidxilayú malu stiʼ (Apoc. 12:12, 13). ¿Tuu nga ca ni jma cucaalú Binidxabaʼ yaʼ? Nabé cucaalube ca ungidu, «ca ni runi ni ná ca mandamientu stiʼ Dios ne biaananecaʼ dxiiñaʼ de gudiicaʼ testimonio de Jesús» (Apoc. 12:17; 14:12). Ne laaca cucaalú Binidxabaʼ ca ni racané laacabe.

14. ¿Xi zazaaca despué de gucaalú Binidxabaʼ xquidxi Dios? (Laaca zanda gúʼyaluʼ imagen ca).

¹⁴ Guinitilú si Babilonia guidxi roʼ, né stale gana zucaalú ca xpinni Binidxabaʼ xquidxi Dios. Ne racá nga guzulú guerra stiʼ Armagedón (Apoc. 16:13, 14, 16). Zulá Jesús ne ejércitu stiʼ ni nuu guibáʼ ca xpinni Jehová ne zunduuxecabe guidxilayú malu stiʼ Binidxabaʼ (Apoc. 19:19-21). Zanitilú guiráʼ xixé ca binni malu ne ca ni rusiguii (Apoc. 21:8). Racá nga zanna guiráʼ binni runi Dios ni jneza ne siempre riníʼ ni dxandíʼ.

15. ¿Xiñee nuunu seguru zuni Jehová ni guníʼ chiguni? (Isaías 65:16, 17; laaca zanda gúʼyaluʼ imagen ca).

¹⁵ Ca dxi riʼ, nabé nuudinde binni ne guizáʼ rusiguiicaʼ. Peru cumu racané Jehová ca xpinni la? nga runi nuucaʼ tobi si. Cutagulisaabe ca ni nadxii ni dxandíʼ ne gastiʼ qué zanda gucueeza laabe de cuʼbe ndaayaʼ xquídxibe ne dxiiñaʼ ni rúnicaʼ (biindaʼ Isaías 65:16, 17). Nánnanu zuni Jehová ni maʼ guníʼ chiguni. Ca diidxaʼ ni bicaa apóstol Pablo ni zeeda lu Romanos 8:38, 39 cayabi laanu: «Nin guendaguti, nin guendanabani, nin ca ángel, nin ca gobiernu, nin ca cosa ni nuu yanna, nin ca cosa ni gueedaruʼ, nin poder, nin ni nuu luguiáʼ, nin ni nuu xagueteʼ, ne ninruʼ sti creación qué zanda guxheleʼ laanu de guendarannaxhii stiʼ Dios ni rusihuinni Cristu Jesús Señor stinu».

16. ¿Xiñee nápanu confianza Jehová de guidubi ladxidoʼno?

¹⁶ Nápanu stale razón para gápanu confianza Jehová, Dios ni riníʼ ni dxandíʼ. Laabe bizaʼbe laanu. Guizáʼ nadxiibe laanu. Ruuyabe guiroobaʼ gran muchedumbre ne chuʼ jma binni ndaaniʼ xquídxibe para guni adorarcaʼ laabe jneza (Is. 60:22; Zac. 8:23). Ruuyaʼ Jehová gaca ni maʼ guníʼ ne nánnanu maʼ cadi candaa zunduuxebe Binidxabaʼ ne guiráʼ cosa ni cadi dxandíʼ ni maʼ guníʼ. Nga runi, guni stinu ca diidxaʼ ni guníʼ David: «Guisaca Jehová Dios, [ . . . ] laasi nga runi cosa ni ridxagayaa binni. Qué chuʼ dxi gusaana de guisaca labe purtiʼ nandxóʼ ni, ne guidxá tipa guidubi guidxilayú riʼ de guendanandxóʼ stibe» (Sal. 72:18, 19).