Xiñee nabáninu nayecheʼ neca nanalaʼdxiʼ binni laanu

1. ¿Xi guníʼ Jesús zazaaca ca xpinni?

LU SERMÓN del Monte, guníʼ Jesús: «Dichoso laatu ora gacananalaʼdxiʼ binni laatu» (Luc. 6:22). Guizáʼ bidxagayaa ca ni binadiaga laabe. Dxandíʼ guirutiʼ racalaʼdxiʼ gaca nanaláʼdxicabe laa. Yanna, ¿xiñee guníʼ Jesús ca diidxaʼ riʼ yaʼ? Laanu, ca xpinni Cristu, racaláʼdxinu gánnanu ni purtiʼ stale binni nanalaʼdxiʼ laanu. Lu artículo riʼ zadúʼyanu xiñee nanalaʼdxiʼ binni laanu ne ximodo zanda guibáninu nayecheʼ neca gaca nanaláʼdxicabe laanu.

XIÑEE NANALAʼDXIʼ BINNI LAANU

2, 3. a) ¿Gunáʼ nga tobi de ca razón pur rizananda binni laanu? (Juan 16:2, 3). b) ¿Xi runi sentirnu ora gánnanu tu cucaalú laanu?

² Zacananalaʼdxiʼ binni laanu purtiʼ runi adorarnu Jehová. Sicaríʼ guníʼ Jesús de ca binni ni zazananda o zuuti ca xpínnibe: «caʼruʼ gunibiáʼcabe Bixhozeʼ ne caʼruʼ gunibiáʼcabe naa» (biindaʼ Juan 16:2, 3). ¿Tuu nga rucaa binni gacananalaʼdxiʼ ca xpinni Dios yaʼ? Binidxabaʼ, «dios stiʼ guidxilayú riʼ» (2 Cor. 4:3, 4). Maʼ biseegube xquendabiaaniʼ binni para cadi guiziidicaʼ de Jehová ne rucaabe laacaʼ gucaalucaʼ ca binni ni runibiáʼ ne nadxii Dios (Juan 8:42-44). Ra gánnanu ni, ¿ximodo racaneni laanu yaʼ? Racaneni laanu cadi gaca nanaláʼdxinu ca binni ni rucaalú laanu purtiʼ nánnanu Binidxabaʼ nga caguite laacabe.

³ Guidúʼyanu ni bizaaca Pável,a ni nabeza ndaaniʼ ti guidxi ra rucueeza gobiernu xhiiñaʼ Reinu. Cumu qué nusaana de ñúnibe xhiiñaʼ Jehová, gunaazecabe laabe, guizáʼ feu modo gudíñecabe laabe ne biseguyoocabe laabe ndaaniʼ ti cuartu ra qué zanda gúʼyabe binni. Laabe guniʼbe: «Nannaʼ dxicheʼ Binidxabaʼ ne ca demonio nga rizanándacaʼ laanu purtiʼ qué racaláʼdxicaʼ guni adorarnu Dios jneza. Maʼ biiyaʼ stale de ca binni ni runi dxiiñaʼ ndaaniʼ cárcel cadi nanaláʼdxicaʼ ca Testigu, sínuque cayúnicaʼ xhiiñacaʼ». Ne ti hermanu de guidxi Croacia ni bicaalú bixhoze ne jñaa laa, guníʼ: «Cadi bixhozeʼ ne jñaaʼ nga enemigu stinneʼ, sínuque Binidxabaʼ» (Efes. 6:12).

4. ¿Xi rizíʼdinu de ejemplu stiʼ Jesús ne stiʼ Esteban? (Laaca zanda gúʼyaluʼ imagen ca).

⁴ Laanu, ca xpinni Cristu, qué raca nanaláʼdxinu ca ni rizananda laanu. Ni rúninu nga runi orarnu pur laacabe (Mat. 5:44). Guidúʼyanu ejemplu stiʼ Jesús ne stiʼ discípulo Esteban. Despué si de bicaa ca soldadu que Jesús lu yaga, sicaríʼ biʼniʼ orarbe: «Bixhozeʼ, biʼniʼ perdonar laacabe» (Luc. 23:34). Gunábabe Jehová guni perdonar ca soldadu que, zándaca laaca guníʼ íquebe ca binni ni canabaʼ gátibe que ne cayúnicaʼ ni purtiʼ zinándacaʼ ni ná ca xaíque yuʼduʼ que, ca enemigu stibe. Ne nánnabe qué ganna ca binni que xi cayúnicaʼ. Zacagá bizaaca Esteban, gunábabe Dios guni perdonar ca ni cuchá guié laabe (Hech. 7:58-60). ¿Ñee bicabi Jehová oración stiʼ Jesús ne stiʼ Esteban la? Bicábibe pue. Stale de ca ni gunabaʼ gatiʼ Jesús despué guca arrepentircaʼ, gúpacaʼ fe laabe ne guyuunísacaʼ (Hech. 2:36-41). Ne zanda guzéʼtenu tobi de ca binni ni gucané para gatiʼ Esteban nga, Saulo de Tarso, despué guca ti xpinni Cristu ne guizáʼ biuubaʼ ladxidóʼ pur ca cosa feu ni biʼniʼ purtiʼ qué ganna xi cayuni (1 Tim. 1:13).

5. ¿Xi rusiidiʼ ni bizaaca César laanu?

⁵ Tiempu riʼ, laaca ricabi Jehová ca oración ni rúninu pur ca ni rizananda laanu. Guidúʼyanu ni bizaaca César, ni nabeza ndaaniʼ guidxi Venezuela. Nabé bicaalú bixhózecabe laacabe pur nácacabe Testigu. Sicaríʼ guníʼ César: «Biʼniʼ jñaaʼ guiráʼ ni nuu lu náʼ para gapa laadu ne gudii ni caquiiñeʼ bixhozeʼ. Neca riguixhe íquebe gúnibe ni ná Reinu primé lu xquendanabánibe, qué ñuu dxi ñuuyaʼ jñaaʼ nusaana de ñuni tender bixhozeʼ. Bisiidiʼ jñaaʼ laadu, ca bicheʼ ne ca bizaʼnaʼ, guni respetardu ne guzúʼbadu stiidxaʼ bixhozeʼ, peru pa guinábabe laadu gúnidu xiixa ni qué riuulaʼdxiʼ Jehová la? qué zúnidu ni». Despué chaahuiʼ chaahuiʼ bichaa bixhózebe modo naca. César guníʼ: «Ti biaje bineʼ orar Jehová de guidubi ladxiduáʼ ne despué gunabadiidxaʼ bixhozeʼ pa racalaʼdxiʼ guundaniáʼ laa Biblia. Dede qué zanda gusieneʼ pabiáʼ nayecheʼ guyuaaʼ ora gúdxibe naa zuundanebe naa». Despué guyuunisa bixhózebe. Cadi guiráʼ diʼ ca ni rucaalú laanu ruchaacaʼ modo nácacaʼ, peru nuu tu laa runi ni purtiʼ ruuyacaʼ nácanu binni nachaʼhuiʼ ne rininu né respetu. ¡Ne guizáʼ rusiécheni laanu! Racaláʼdxinu gacané Jehová, Dios ni riá ne «Juez stiʼ guidubi guidxilayú» laacabe guidxíñacabe ra nuu (Gén. 18:25).

6. Casi riete lu Marcos 13:13, ¿gunáʼ nga sti razón pur nanalaʼdxiʼ binni laanu?

⁶ Nanalaʼdxiʼ binni laanu purtiʼ rúninu ni ná Jesús. Ti biaje gudxi Jesús ca discípulo stiʼ: «Zaca nanalaʼdxiʼ guiráʼ binni laatu purtiʼ xpinneʼ laatu». Ndiʼ riníʼ zuni respetarcaʼ laabe né autoridad ni nápabe casi Rey lu Reinu stiʼ Dios (biindaʼ Marcos 13:13). Ca binni ni napa confianza ca gobiernu ni nuu lu guidxilayú riʼ ne cadi Rey ni maʼ gulí Jehová, nanaláʼdxicaʼ ca ni dxandíʼ xpinni Cristu. Bizulú cayuni mandar Jesús lu iza 1914, ne maʼ cadi candaa zunduuxebe guiráʼ ca gobiernu ni gucaanáʼ autoridad ni nápabe.

7, 8. ¿Xiñee runi burla binni ca xpinni Jehová? (Juan 15:18-20; laaca zanda gúʼyaluʼ ca imagen ca).

⁷ Nanalaʼdxiʼ binni laanu purtiʼ rucáʼnanu guidxilayú stiʼ Binidxabaʼ. Bisiene Jesús zaca nanalaʼdxiʼ binni ca xpinni purtiʼ «cadi parte de guidxilayú riʼ» laacaʼ (biindaʼ Juan 15:18-20). Cásica ca xpinni Cristu de primé siglu que, rucáʼnanu modo riníʼ ique, ni runi ne modo riníʼ binni guidxilayú. Nga runi stale de ca hermanu stinu runi búrlacabe laacaʼ ra dxiiñaʼ o ra scuela (1 Ped. 4:3, 4). Peru ra tidiʼ tiempu, caadxi de ca binni ca ruchaacaʼ modo riníʼ íquecaʼ ne runi respetarcaʼ laanu ne guizáʼ rusiécheni laanu.

⁸ Guidúʼyanu ni bizaaca Ignacio, ti hermanuhuiiniʼ de Centroamérica. Biʼniʼ burla tobi de ca maestru ni bisiidiʼ laabe purtiʼ gulibe guibánibe modo ná Dios. Peru ante gunduuxebe scuela gunabadiidxaʼ maestru que laabe ximodo runi huantarbe guibánibe modo ná Dios pa stale tu runi burla laabe. Bisiene Ignacio laabe racané ca ley stiʼ Dios laa para cadi gacaná, ne biʼniʼ invitar laabe chebe ti reunión. Guizáʼ bidxagayaa Ignacio ora guyé maestru stiʼ ra Yoo stiʼ Reinu. Guizáʼ bidxagayaa maestru que ora biʼyaʼ nadxiisaa ca hermanu ne ngue bicaa laabe chebe sti reunión. Despué bizulú biʼniʼ estudiarbe Biblia ne laaca bicaalúcabe laabe pur laani. Peru bicaa íquebe guidxíñabe jma gaxha de Jehová ne guyuunísabe.

9, 10. a) ¿Gunáʼ nga sti razón ni runi laanu gadxé peʼ de binni guidxilayú? b) ¿Xi rusiidiʼ ejemplu stiʼ apóstol Pablo laanu?

⁹ Sti razón ni runi laanu gadxé de ca binni ni nuu ndaaniʼ guidxilayú stiʼ Binidxabaʼ nga purtiʼ qué riuʼnu lu política ne qué riuunu lu guerra (Juan 18:36). Peru rinándanu ni ná ley stiʼ guidxi ra nabézanu casi ná Romanos 13:1. Peru cumu qué riuʼnu lu política, qué riguítenu para gápanu xiixa puestu lu política ne laaca qué runi votarnu. Rinándanu ni ná Jehová ne Reinu ni cayuni mandar Cristu. Maʼ biseguyoocabe stale Testigu pur ni runi crecaʼ, peru cadi cusaanacaʼ de guni predicarcaʼ. Rinándacaʼ ejemplu stiʼ apóstol Pablo, purtiʼ laa qué nusaana de ñuni predicar biaʼ tiempu biseguyoocabe laa ndaaniʼ ti yoo ne ndaaniʼ cárcel (Hech. 24:27; 28:16, 30). Guníʼnebe ca binni ni racalaʼdxiʼ gucaadiaga de ca noticia galán, guníʼnebe ca ni rapa ra cárcel, ca ni runi xhiiñaʼ gobiernu, ca gobernador, ca rey ne zándaca guníʼnebe ca binni ni runi xhiiñaʼ emperador romanu, Nerón (Hech. 9:15).

¹⁰ Zacaca runi ca hermanu stinu ni nuu ndaaniʼ cárcel, runi predicarcaʼ guiráʼ tu racalaʼdxiʼ gucaadiaga laacaʼ, dede né ca juez, ca ni runi xhiiñaʼ gobiernu ne ca ni rapa laacabe. Ti hermanu ni guyuu jma de xhoopaʼ beeu ndaaniʼ cárcel purtiʼ qué riuu lu política guníʼ biaʼ tiempu bieguyoo qué ñuuyaʼ ni casi ti castigu, sínuque casi ti oportunidad ni bidii Jehová laa para guidxela ca binni ni nayá ladxidóʼ. Chuʼnu nayecheʼ pa iquiiñeʼ Jehová laanu para guni predicarnu clase binni riʼ (Col. 4:3). Peru cadi laasini nga razón ni nápanu para chuʼnu nayecheʼ neca nanalaʼdxiʼ binni laanu pur cayúninu ni ná Jehová. Guidúʼyanu xhupa xhonna de laacani.

XIÑEE ZANDA CHUʼNU NAYECHEʼ ORA GACA NANALÁʼDXICABE LAANU

11. ¿Xiñee riguidxi fe stinu ora sanándacabe laanu? Bizeeteʼ ti ejemplu.

¹¹ Guidúʼyanu ximodo cayaca cumplir ni ruzeeteʼ Biblia. Lu primé profecía ni zeeda lu Biblia, guníʼ Jehová Binidxabaʼ ne ca ni zá de laa, ni caninu raríʼ nga ca ni runi apoyar laa, zaca nanaláʼdxicaʼ ca binni ni nadxii Jehová ne ca ni cayuni ni nabe (Gén. 3:15). Ne casi ridúʼyanu lu guidapaʼ Evangeliu, stale biaje guníʼ Jesús zaca nanaláʼdxicabe ca xpinni Dios (Mat. 10:22; Mar. 13:9-12; Luc. 6:22, 23; Juan 15:20). Ne xcaadxi hombre ni bicaa Biblia laaca bizeetecaʼ de laani (2 Tim. 3:12; Sant. 1:2; 1 Ped. 4:12-14; Jud. 3, 17-19). Nga runi qué ridxagayaanu ora sanándacabe laanu. Riéchenu purtiʼ cadúʼyanu cayaca cumplir ca profecía ni zeeda lu Biblia, ne racaneni laanu chuʼnu seguru cayuni adorarnu Dios ni dxandíʼ. Ti hermana ni nabeza ndaaniʼ ti guidxi ra rucueeza gobiernu dxiiñaʼ stinu, guníʼ: «Ora bidieeʼ xquendanabaneʼ Jehová, gunnaʼ zedandá dxi zazanándacabe naa. Nga racané naa cadi guidxibeʼ diaʼ ne cadi guidxagayaaʼ ora guizaaca ni». Tobi de ca binni ni bicaalú laabe nga xheelabe, nabé feu modo biʼniʼ tratar laabe ne bizaaquiʼ Biblia ne ca publicación stibe. Peru qué nucueeza ngue laabe, sínuque gucaneni laabe gaca fe stibe jma naguidxi (Heb. 10:39). Sicaríʼ guniʼbe: «Nannaʼ maca cá zazanándacabe ca xpinni Cristu ne zedandá dxi zazaaca ni. Peru ra naa piaʼ bidxaagaluáʼ ni la? gucaneni naa chuaaʼ segura nuaaʼ ndaaniʼ religión ni rusiidiʼ ni dxandíʼ».

12. ¿Xi gucané ti hermanu guni huantar ora guzanándacabe laa?

¹² Neca nánnanu zazanándacabe laanu, peru zándaca gaca nagana para laanu guni huantarnu. Sicaríʼ bicaa ti hermanu ora cuzeetebe de tiempu guyuube ndaaniʼ cárcel: «Stale biaje runeʼ sentir maʼ qué zanda naa, guizáʼ riuaaʼ xizaa ne nisi maʼ cayuunaʼ». ¿Xi gucané laabe guni huantarbe yaʼ? Laabe guniʼbe: «Qué nusaanaʼ de ñuneʼ orar. Primeca ni runeʼ casi guiasa nga runeʼ orar. Ora ridxaagaluáʼ xiixa guendanagana, rinieniáʼ Jehová. Ne ora guni tratárcabe naa feu, riaaʼ ndaaniʼ bañu ne runeʼ orar». Ne sti cosa ni bíʼnibe nga guiníʼ íquebe ejemplu stiʼ ca xpinni Jehová ni bibani dxiqué ne ni nabani yanna ni qué nixeleʼ de laa. Ne ca cosa ni bizéʼtenu riʼ gucaneni laabe guni huantarbe ora guzanándacabe laabe ne biʼniʼ sentirbe paz ni biʼniʼ prometer Jesús ca discípulo stiʼ (Juan 14:27; 16:33).

13. ¿Xi zacané laanu cadi gaca nanaláʼdxinu?

¹³ Gannaxhiinu Jehová ne gannaxhiinu xcaadxi racaneni laanu cadi gaca nanaláʼdxinu. Bisihuinni Jesús guizáʼ nadxii Bixhoze de guidubi ladxidóʼ. Ne laaca gunnaxhiibe ca xhamígube dede dxi gútibe (Juan 13:1; 15:13). Pa cásica Jesús, gannaxhiinu Jehová ne gannaxhiinu ca hermanu, qué zaca nanaláʼdxinu. Para guiene chaahuinu ni la? guidúʼyanu ejemplu stiʼ apóstol Pablo.

14. ¿Xi gucané Pablo cadi guixeleʼ de Jehová ora bidxaagalú guendanagana ni guluu xquendanabani ra naxoo?

¹⁴ Ante guuticabe Pablo, sicaríʼ bicaabe ra nuu xhamígube Timoteo: «Bidii Dios laanu espíritu santu, cadi para gácanu cobarde, sínuque para gudiini laanu stipa, para gacaneni laanu gannaxhiinu binni ne gácanu binni nuu xpiaaniʼ» (2 Tim. 1:7). ¿Xi gucaláʼdxibe niniʼbe yaʼ? Pa guizáʼ nadxii ti xpinni Cristu Jehová la? zanda guni huantar ca guendanagana naroʼbaʼ guidxaagalú (2 Tim. 1:8). Pur guendarannaxhii ni gupa Pablo Jehová gucaneni laa gaca nadxibalú ne cadi guixeleʼ de laabe ora bidxaagalú guendanagana ni guluu xquendanabani ra naxoo (Hech. 20:22-24).

15. ¿Ximodo rusihuinni ca hermanu nadxiisaacaʼ? (Laaca zanda gúʼyaluʼ imagen ca).

¹⁵ Guizáʼ nadxiinu ca hermanu ni qué rucheené Jehová ora sanándacabe laacaʼ. Stale xpinni Cristu riguucaʼ xquendanabánicaʼ ra naxoo pur ca hermanu, cásica biʼniʼ Áquila ne Priscila ni pur Pablo (Rom. 16:3, 4). Casi ndaaniʼ guidxi Rusia, rié stale hermanu rinduucaʼ gana ca ni nuu nezalú tribunal. Ora gunaaze gobiernu ti hermana ne yenécabe laa ra nuu ti tribunal, guizáʼ bidxagayaabe dede qué ñanda niniʼbe ora bíʼyabe nuu stale hermanu raqué para cuʼcaʼ gana laabe. Ra bíʼyabe guendarannaxhii ni bisihuinni ca hermanu, ni zeeda gaca casi familia stibe, bidiini stipa laabe para guni huantarbe ora peʼ caquiiñebe ni. Cumu nadxiinu Jehová ne nadxiinu binni la? racaneni laanu cadi gaca nanaláʼdxinu ne nga rucaa laanu chuʼnu nayecheʼ.

16. ¿Xiñee guníʼ apóstol Pedro zanda chuʼ ti xpinni Cristu nayecheʼ neca gucaalúcabe laa? (1 Pedro 4:14).

¹⁶ Pa guni huantarnu neca gaca nanaláʼdxicabe laanu zusiéchenu ladxidóʼ Jehová (biindaʼ 1 Pedro 4:14). Guníʼ apóstol Pedro pa gacananu ora gucaalúcabe laanu pur cayúninu ni ná Dios, zanda chuʼnu nayecheʼ. ¿Xiñee yaʼ? Purtiʼ ora gucaalúcabe laanu zusihuínnini nuu espíritu stiʼ Dios luguianu. Gunna dxichi Pedro xi runi sentir tuuxa ora chuulaʼdxiʼ Jehová ni cayuni ne guni huantar ora sanándacabe laa. Despué de Pentecostés stiʼ iza 33, gunaaze ca policía ni nuu ra templu que Pedro ne ca apóstol purtiʼ cayuni predicarcaʼ. Peru né stale guendanadxibalú biʼniʼ defender Pedro ni runi cré (Hech. 5:24-29). Neca despué gudíñecabe laa ne xcaadxi apóstol que, peru qué nusaana de ñuni predicarcaʼ ne guyuucaʼ nayecheʼ «purtiʼ cudii Dios lugar laacaʼ guni sufrircaʼ pur lá Jesús». Laanu laaca zanda chuʼnu nayecheʼ ora gudxíʼlunu xiixa guendanagana (Hech. 5:40-42).

17. ¿Xi gudxi Jesús ca discípulo stiʼ gueelaʼ ante gatiʼ?

¹⁷ Gueelaʼ ante gatiʼ Jesús, gúdxibe ca discípulo stibe: «Tu nadxii naa la? laaca zannaxhii Bixhozeʼ laa, ne naa laaca zannaxhieeʼ laa» (Juan 14:21). Guizáʼ maʼ racaláʼdxinu guedandá dxi gannaxhii binni laanu pur cayúninu ni ná Jehová ne gusaana de gaca nanaláʼdxicaʼ laanu (2 Tes. 1:6-8). Laga guedandá dxi ca cadi guiaandaʼ laanu guiráʼ razón nápanu para chuʼnu nayecheʼ neca gaca nanalaʼdxiʼ binni laanu, ra gúninu ni zatadxí ladxidoʼno ne zudiini stipa laanu para guni huantarnu.