Bicaanáʼ ca cosa ni zanda gucueeza lii de gúniluʼ ni ná Jehová

1, 2. ¿Xi caquiiñeʼ gúninu nuu biaje neca risaca ca cosa ni chigúninu?

GUNÍʼ ique zigusaluʼ carru stiluʼ ne málasi bizulú cayuu ti llamada lu teléfono stiluʼ. Zándaca cabézaluʼ llamada que, peru nánnaluʼ caquiiñeʼ gúʼyaluʼ ra zigusaluʼ ne cadi chuʼ xiixa ni guchiiñaʼ lii. Ngue runi, gudixhe íqueluʼ gúʼyaluʼ ra zigusaluʼ purtiʼ para lii ngue nga ni jma risaca óraque. Racá ridúʼyanu nuu biaje caquiiñeʼ gucáʼnanu o gusaana de gúninu xiixa para ganda gúninu ca cosa ni jma risaca.

² Guiráʼ dxi rúninu stale cosa risaca. Peru laanu nánnanu ca cosa ni jma risaca para laanu nga guiráʼ ni rúninu para ganda chuʼnu gaxha de Dios (Mat. 6:33).a Laanu, ca xpinni Jehová zeeda gácanu casi binni ni nanna gusá carru stiʼ purtiʼ rúninu stipa cadi chuʼ xiixa ni gucaa laanu guidúʼyadxinu sti ladu laga ziuunu lu neza stinu (Prov. 4:25; Mat. 6:22).

3. ¿Ximodo zacané artículo riʼ laanu?

³ Dxandíʼ, nin tobi de laanu nga qué racaláʼdxinu chuʼ xiixa ni gucueeza laanu lu xhiiñaʼ Jehová. Peru guiranu ridxaagalunu xiixa cosa ni zándaca gucueeza laanu de gúninu xhiiñaʼ Jehová (Luc. 21:34-36). Para ganda gúninu xhiiñaʼ Jehová ne cadi chuʼ xiixa ni gucueeza laanu la? zadúʼyanu: 1) xii nga ca cosa ni zándaca gucueeza laanu, 2) xi biʼniʼ Jesús para cadi chuʼ xiixa ni gucueeza laa ne 3) ximodo zanda chinándanu ejemplu stibe.

¿XI ZÁNDACA GUCUEEZA LAANU?

4-6. ¿Gunáʼ nga ca cosa ni zanda cuʼ xizaa laanu o cuee tiempu stinu sin gudiʼnu cuenta?

⁴ Stale cosa nga rúninu ne caquiiñeʼ cueenu tiempu para laacani, casi caquiiñeʼ chuunu ra nuu doctor, caquiiñeʼ guidúʼyanu ximodo nuu familia stinu o gúninu ca cosa stinu. Risaca guiráʼ cosa riʼ ne caquiiñeʼ cueenu tiempu para laacani. ¿Peru ñee zanda gucueezacani laanu de gúninu ni jma risaca la? Zanda pue, purtiʼ pa nisi laacani gúninu la? maʼ qué zápanu tiempu para xcaadxi cosa ne zusidxaga cani laanu.

⁵ Ne lu guidxilayú riʼ, stale de laanu cayacananu purtiʼ nabé rucaalú binni gobiernu, huaxiéʼ bueltu nuu, nuu pandemia ne guiráʼ ladu cadinde binni (2 Tim. 3:1). Ne pur guiráʼ cosa riʼ, zándaca jma maʼ chuʼnu xizaa ne nisi ca guendanagana stinu maʼ cá íquenu.

⁶ Zándaca runibiaʼnu tuuxa binni ni maʼ bichaa pur guiráʼ guendanagana nuu lu guidxilayú riʼ. Ne pa cayacanácabe pur laacani la? riénenu modo nuucabe, purtiʼ binni laanu ne cadi bizáʼ diʼ Dios laanu para gacananu guiráʼ dxi. Qué ridxagayaanu nuu tu laa runi sentir maʼ cadi guendanabani nga ni napa pur guiráʼ ca cosa ni cazaaca riʼ. Nga runi nuu tu laa, para ganda gusiaandaʼ guiráʼ yuubaʼ stiʼ ne guiráʼ ni cazaaca la? ribeecaʼ stale tiempu para chizacaʼ o gúnicaʼ stale cosa para ganda chuʼcaʼ nayecheʼ. Yanna, ¿xi zanda gúninu pa runi sentirnu zacá yaʼ? Guidúʼyanu xi biʼniʼ Jesús para cadi chuʼ xiixa ni gucueeza laa de guni ni ná Jehová.

¿XI BIʼNIʼ JESÚS PARA CADI CHUʼ XIIXA NI GUCUEEZA LAA?

7. ¿Xi ñándaca nucueeza Jesús de ñuni ni ná Jehová?

⁷ Laaca bidxaagalú Jesús stale guendanagana ni ñándaca nucueeza laa de ñuni xhiiñaʼ Dios. Dxiqué nabé ridinde binni pur raza, ne laaca ridinde ca políticu de tiempu que. Laaca biiyabe nuu stale binni pobre ne stale guendahuará ni cayuniná binni (Mat. 14:14; Mar. 14:7). Nabé runiná ca judíu ne ca romanu que stale binni. Ora biʼyaʼ ca binni que napa Jesús poder para guni milagru, nuu de laacaʼ gucaláʼdxicaʼ ñúnicaʼ laabe rey sticaʼ (Juan 6:14, 15). Despué, gucalaʼdxiʼ Binidxabaʼ nusaba laabe ne gudxi laabe zanda gácabe rey stiʼ guidxilayú riʼ sin gacanabe (Mat. 4:8, 9). Ne apóstol Pedro, tobi de ca ni jma xhamígube, rabi laabe ti dxi cadi tan gacanabe ne sicaríʼ gudxi laabe: «¡Biá lii, Señor!» (Mat. 16:21, 22).

8. ¿Xi biʼniʼ Jesús para cadi chuʼ xiixa ni gucueeza laa de guni xhiiñaʼ Dios?

⁸ ¿Xi biʼniʼ Jesús para cadi chuʼ xiixa ni gucueeza laa de guni ni ná Dios yaʼ? Primé la? bíʼnibe stipa guiníʼ íquebe casi riníʼ ique Jehová (Juan 8:28; 14:9). Guiropa, biquiiñebe tiempu stibe para gúnibe xhiiñaʼ Jehová (Mat. 9:35). Ne, guionna, qué nusiaandabe xii nga ni jma risaca (Juan 4:34). Qué lica ñé ñeeda Jesús bicaanáʼ guiráʼ ni gudxi Binidxabaʼ laa ne qué ñúnibe ni ná conseju ni cadi jneza ni bidii Pedro laabe que (Mat. 4:10; 16:23). Qué nicá xpiaʼ ca binni de tiempu que Jesús, purtiʼ pa ñácani zacá la? nusaana de núnibe ni ná Dios. Zándaca cadi cadxaagalunu ca cosa ni ñándaca nucueeza Jesús de ñuni ni ná Dios, peru pa chinándanu ejemplu stibe zacaneni laanu para cadi chuʼ xiixa ni gucueeza laanu.

¿XI GÚNINU PARA CADI CHUʼ XIIXA NI GUCUEEZA LAANU DE GÚNINU NI NÁ DIOS?

9. Casi ná Efesios 5:17, ¿xi caquiiñeʼ gúninu?

⁹ Guizíʼdinu guiníʼ íquenu casi riníʼ ique Dios. Pa gúninu ni ziene chaahuinu «xii nga racalaʼdxiʼ Jehová» (biindaʼ Efesios 5:17). Pa guidúʼndanu Stiidxaʼ Dios ne guiníʼ íquenu ni nani la? zánnanu xii nga ni riuuláʼdxibe. Yanna, ¿ximodo zanda gánnanu xii nga ni riuulaʼdxiʼ Jehová ora guidxaagalunu ti guendanagana ne cadi caníʼ Biblia xi peʼ gúninu yaʼ? Ni zacané laanu nga guuyaʼ chaahuinu modo riníʼ ique Dios ne chinándanu ni.

10. ¿Ximodo zanda gunibiáʼ chaahuinu modo riníʼ ique Jehová?

¹⁰ Jma zunibiáʼ chaahuinu modo riníʼ ique Jehová pa guni estudiarnu Biblia ne guidúʼyanu ximodo runi tratarbe binni ne ximodo racanebe laacaʼ (Jer. 45:5). Ora guidúʼndanu ti relatu zeeda lu Biblia, guiníʼ íquenu ca ndiʼ: «¿Xi cusiidiʼ ni naa de Jehová? ¿Ñee caquiiñeʼ guchaa modo riníʼ iqueʼ para guiníʼ iqueʼ casi laabe la?». Dxandíʼ, jma nuu xpiaaniʼ Dios que laanu (Is. 55:9). Nga runi, galán guinábanu laabe gusiidibe laanu gúninu ni nabe (Sal. 143:10). Laaca galán guinábanu laabe gacanebe laanu guiene chaahuinu modo riníʼ íquebe ne gúninu ni lu guendanabani stinu (1 Juan 5:14).

11. ¿Xi racalaʼdxiʼ Jehová?

¹¹ Ra guizíʼdinu guiníʼ íquenu casi riníʼ ique Jehová, ziénenu racaláʼdxibe cadi chuʼ diʼ xiixa ni gucueeza laanu de gúninu ni nabe purtiʼ zacá ziuʼnu listu para dxi gueeda fin stiʼ guidxilayú riʼ (Mat. 24:44). Laaca qué racaláʼdxibe gutabi íquenu pur guiráʼ cosa ni riguu xizaa binni (Mat. 6:31, 32). Nga runi rudiibe laanu caadxi conseju guizáʼ sicarú para gánnanu xi gúninu pa guzulú chuʼ xhaatapenu xizaa pur dxiiñaʼ stinu, pur xiixa guendahuará ni nápanu, pur familia stinu o pur sti cosa. Ne laapebe rábibe laanu guinábanu laabe gudiibe laanu guendabiaaniʼ stibe ne stipa para gudxíʼlunu ca guendanagana riʼ (Sal. 55:22; Prov. 3:5-7).

12. ¿Xi zacané laanu chuʼnu nayecheʼ neca cazaaca stale cosa malu lu guidxilayú riʼ? (Mateo 5:3).

¹² Gúninu xhiiñaʼ Jehová. Guiranu riuʼnu xizaa pur guiráʼ cosa malu ni cayaca lu guidxilayú riʼ. Ne qué zanda diʼ gucueezanu cani. Nga runi, pa maʼ qué zanda gaca chaahuiʼ ca cosa ca, cadi galán diʼ gucaa ique xhaatanu cani, ni jma galán gúninu nga gucaa íquenu gúninu xhiiñaʼ Jehová. Bizáʼ Jehová laanu para chuʼnu gaxha de laa ne ora rúninu ni jma nayecheʼ runi sentirnu (biindaʼ Mateo 5:3). Ne zanda chuʼnu nayecheʼ pa gunibiáʼ chaahuinu Jehová ra guidúʼndanu Stiidxabe ne ora rudiʼnu tiempu ne stipa stinu para gúninu xiixa dxiiñaʼ stibe para guni adorarnu laabe. Pa gúninu ndiʼ la? zusiéchenu Jehová ne zaquíʼñenu tiempu stinu jneza (Prov. 23:15).

13. ¿Ximodo iquíʼñenu «tiempu stinu jneza»?

¹³ Lu Efesios 5:15, 16 zeeda ti conseju para guiráʼ ca xpinni Cristu ne racaláʼdxinu chinándanu ni: iquíʼñenu «tiempu stitu jneza» (biiyaʼ nota de estudiu ni láʼ «aprovechando el tiempo de la mejor manera»). Cadi caníʼ si textu riʼ ximodo quixhe chaahuinu tiempu stinu para ca cosa si ni rúninu guiráʼ dxi, sínuque cayabi ni laanu guiduʼyaʼ chaahuinu ximodo caquíʼñenu tiempu stinu ca dxi riʼ ra mayaca gueeda fin stiʼ guidxilayú malu riʼ. Yanna, ¿ximodo iquíʼñenu tiempu stinu jma jneza yaʼ? Bueno, pa guidubi dxi maʼ cadúʼyanu guiráʼ ca noticia ni cadi galán ni caree la? zabee nga tiempu stinu, zabeeni gana laanu ne maʼ qué ziúʼpenu nayecheʼ ra gúninu xhiiñaʼ Jehová. Galán quíxhenu pabiáʼ tiempu zadúʼyanu ca noticia ca o zadúʼndanu cani. Pa gúninu zacá, qué zuchibi cani laanu ne jma zucaa íquenu gúninu xhiiñaʼ Jehová. ¿Laga pa cueenu tiempu para gúninu xhiiñaʼ Jehová casi chigúninu ca revisita stinu yaʼ? Nánnanu risaca nga guibiguétanu ra nuu binni para guyúbinu modo gacanenu laacaʼ ti ganda guilá «guiráʼ xixé binni ne guiziidiʼ chaahuicaʼ ni dxandíʼ» (1 Tim. 2:4).

14. ¿Xi ribeendunu ora ribeenu tiempu para gúninu xhiiñaʼ Jehová? (Laaca zanda gúʼyaluʼ imagen ca).

¹⁴ Pa cueenu tiempu para gúninu xhiiñaʼ Jehová zacaneni laanu para guiénenu xiñee cazaaca guiráʼ cosa riʼ tiempu stinu riʼ. Laaca qué riúʼpenu xizaa ora guidúʼyanu nabé rucaalú binni gobiernu, ndaaniʼ stale guidxi huaxiéʼ bueltu nuu ne nuu stale guendahuará purtiʼ maca cá lu Biblia zazaaca guiráʼ ni. Qué rudiʼnu lugar gucueeza ca cosa ca laanu de gúninu ni ná Jehová, sínuque nápanu confianza zuni Jehová guiráʼ ni naguixhe ique huidxe si. Ne gastiʼ qué ruchibi laanu purtiʼ nanna dxiichinu nuuné Jehová laanu (Sal. 16:8; 112:1, 6-8).

15. Casi ná 1 Pedro 4:7, ¿xi caquiiñeʼ gúninu ne xiñee?

¹⁵ Cadi guiaandaʼ laanu xii nga ni jma risaca. Ca dxi riʼ, stale binni jma ricá íquecaʼ xi gúnicaʼ para chuʼcaʼ nayecheʼ o paraa chizacaʼ, ne qué rudiicaʼ cuenta pa maʼ ra puertaʼ yoo zuhuaa fin stiʼ guidxilayú riʼ. Neca peʼ risaca nga gúninu xiixa para chuʼnu nayecheʼ peru caquiiñeʼ gácanu binni nuu xpiaaniʼ para cadi gudiʼnu lugar guicá modo riníʼ ique binni guidxilayú laanu (biindaʼ 1 Pedro 4:7). Pa nácanu ti binni ni nuu xpiaaniʼ la? zadúʼyanu risaca nga gúninu xiixa para chuʼnu nayecheʼ peru qué zadiidisunu ne zacaanu decisión jneza. Ne ca decisión ni guicaanu ca la? zusihuinni cani pa riníʼ íquenu casi riníʼ ique Jehová ne pa nánnanu xii nga ni jma risaca (2 Tim. 1:7).

16. ¿Xi gudixhe ique Jesús guni chupa chonna hora ante guuticabe laa?

¹⁶ Qué ñuu dxi ñaandaʼ Jesús xii nga ni jma risaca. Chupa chonna hora ante guuticabe laabe, gudixhe íquebe cadi lica gucheenebe Jehová ne gúnibe ni ná. Ngue runi biʼniʼ orarbe Jehová de guidubi ladxidoʼbe. Jesús la? gutaná peru ca discípulo stibe gucuá bacaandaʼ laacaʼ «purtiʼ maʼ bidxágacaʼ de tantu nuucaʼ triste» (Luc. 22:39-46; Juan 19:30).

17. ¿Xiñee riquiiñeʼ stale binni ca red social ca, ne xi zándaca gueeda guizaacacaʼ? (Laaca zanda gúʼyaluʼ imagen ca).

¹⁷ Zanda guizaacanu ni bizaaca ca discípulo stiʼ Jesús que, zándaca guni sentirnu maʼ bidxáganu de tantu nuunu triste ora guidúʼyanu guiráʼ ca cosa malu ni cazaaca lu guidxilayú riʼ. Stale binni riquiiñeʼ ca red social ca para gusiaandacaʼ guiráʼ guendanagana sticaʼ o para si chuʼ xi gúnicaʼ guidubi dxi. Racané ca red social ca laanu para guinínenu ca xhamígunu, familia stinu ni nabeza sti ladu para guséʼndanu xiixa noticia ra nuucabe, foto o intiica si cosa. Peru sin gudiʼnu cuenta zanda gundiibicani laanu ne iquíʼñenu stale tiempu stinu, stipa stinu para guidúʼyanu guirá ni nacubi caree. Caquiiñeʼ guiduʼyaʼ chaahuinu ximodo caquíʼñenu ca red social ca, guiníʼ íquenu ndiʼ: «¿Ñee cuchaacani modo riníʼ iqueʼ ne modo rinieeʼ la? ¿Ñee racanécani naa guneʼ sentir jma galán la? o cucueezacani naa de guneʼ ca cosa jma risaca?».

18. ¿Xiñee caquiiñeʼ gusihuínninu nácanu ti binni nuu xpiaaniʼ ora cuinu ca cosa ni gúninu para chuʼnu nayecheʼ ti ratu?

¹⁸ Laaca naquiiñeʼ gusihuínninu nácanu ti binni nuu xpiaaniʼ pa nápanu xiixa aplicación o ti página de internet para guidúʼyanu película, serie, videu nachucu o riguítenu xiixa videojuego. Racané ca cosa riʼ laanu para chuʼnu nayecheʼ ti ratu ne guiziiláʼdxinu. Peru caquiiñeʼ gusihuínninu nácanu binni nuu xpiaaniʼ ora cuinu xi tipu cosa ni chiguidúʼyanu o chigúninu ne pabiáʼ tiempu chiguiquíʼñenu luni. Guzéʼtenu ti ejemplu, despué de gúʼyaluʼ ti videu, zabi aplicación ca lii, zanda gúʼyaluʼ xcaadxi, peru zándaca racá guiree tobi ra cadinde binni o cayuuti o ra cayúnicabe cosa yuudxuʼ. Guidúʼyanu xi bizaaca ti hermanu de Asia. Primeru ga que la? ruuyabe videu ra zeeda ca escena jma galán stiʼ xiixa película. Despué, biiyabe xcaadxi videu ni cudii aplicación que laabe. Peru ra gudiʼdiʼ dxi la? biiyabe videu ra rihuinni cosa yuudxuʼ ne despué biiyabe pornografía. Peru pur gucané ca ancianu laabe ne gucané xcaadxi xhamígube laabe, bíʼnibe xiixa para gunda bisaanabe ni. ¿Xi bíʼnibe yaʼ? Bixhiabe caadxi de ca aplicación ra ruuyabe película que ne maʼ qué niquiiñedibe stale tiempu para chuʼbe lu teléfono. Rusihuinni ni bizaaca riʼ pabiáʼ risaca nga gusihuínninu nácanu ti binni nuu xpiaaniʼ ora cuinu ca cosa ni chigúninu para chuʼnu nayecheʼ ti ratu.

19. ¿Xi zándaca guizaacanu pa nabé guicá íquenu chizanu o chuunu de vacación?

¹⁹ Laaca caquiiñeʼ gusihuínninu nácanu ti binni nuu xpiaaniʼ ora quíxhenu xi gúninu, ora chizanu paxaraa o chuunu de vacación. Guiranu caquiiñeʼ guiziiláʼdxinu ne ti lade cuee xaíquenu ca cosa ni rúninu, racaneni laanu chuʼnu nazaaca. Peru pa nisi ca cosa ca maʼ caníʼ íquenu la? zándaca maʼ puru laasini gúninu ne maʼ qué zápanu tiempu para gúninu ca cosa ni jma risaca (Filip. 1:10). Cada tobi de laanu caquiiñeʼ quixhe ximodo iquiiñeʼ tiempu stiʼ. ¿Xi zanda gacané laanu iquíʼñenu tiempu stinu jneza yaʼ? Guiníʼ íquenu ndiʼ: «¿Ñee rusihuinneʼ nacaʼ ti binni nuu xpiaaniʼ pur modo riquiiñeʼ tiempu stinneʼ ora gastiʼ cadi cayuneʼ ne ora ziaaʼ de vacación la? ¿Ñee ribeeʼ tiempu para guneʼ ca cosa ni jma risaca la? ¿Ñee cusihuinneʼ maʼ nuaaʼ listu para dxi guiluxe guiráʼ cosa la?».

20. ¿Xi ribeendunu ora rucáʼnanu ca cosa ni zándaca gucueeza laanu de gúninu xhiiñaʼ Jehová?

²⁰ Casi maʼ bizíʼdinu, zanda gucáʼnanu guirá ca cosa ni zándaca gucueeza laanu de gúninu ni jma risaca, laani nga, gúninu xhiiñaʼ Jehová (Is. 48:17). Zanda gacané Jehová laanu para gudxíʼlunu ca guendanagana ni ridxaagalunu ne laaca zacanebe laanu para cadi chúʼpenu xizaa pur ca cosa ni cazaaca lu guidxilayú riʼ ne qué zunitipenu tiempu stinu ra guiníʼ ique xhaatanu xi guiráʼ cosa gúninu para chuʼnu nayecheʼ o paraa chizanu. Nga runi, gúninu stipa para guiníʼ íquenu casi riníʼ ique Jehová, iquíʼñenu tiempu stinu para gúninu ca cosa ni zanda gacané laanu chuʼnu gaxha de laabe ne cadi guiaandaʼ laanu xii nga ni jma risaca. Pa gúninu zacá la? zanda gucáʼnanu ca cosa ni zándaca gucueeza laanu de gúninu ni ná Jehová peru laaca zanaaze dxiichinu «guendanabani, ni dxandíʼ guendanabani» (1 Tim. 6:19).