Naca ca hermanu ni maʼ huaniisi casi ti tesoro para congregación

Zándaca maʼ huaniisiluʼ ne rizaacaluʼ ni bizaaca hermana riʼ, maʼ qué randa rúniluʼ biaʼ bíʼniluʼ dxiqué. Ne neca nánnaluʼ qué huasaana de gúniluʼ ni ná Jehová, zándaca guchaagaluʼ ni rúniluʼ yanna ne ni bíʼniluʼ dxiqué ne nga cueʼ gana lii. ¿Xi zacané lii yaʼ?

XI RACALAʼDXIʼ JEHOVÁ GÚNILUʼ

Guníʼ ique ndiʼ: «¿Xi canabaʼ Jehová naa guneʼ?». Deuteronomio 6:5 ná: «Gunnaxhii Jehová Dios stiluʼ de guidubi ladxidoʼloʼ, de guidubi xhiálmaluʼ ne guiráʼ stipa stiluʼ». Riguixhedxí ca diidxaʼ ca ladxidoʼno. ¿Xiñee yaʼ?

Purtiʼ rusihuinni textu ca racalaʼdxiʼ Jehová gudiiluʼ laa ni jma galán de lii. Pa qué guiaandaʼ lii ni nani, zacaneni lii cadi guchaagaluʼ lii né xcaadxi ne cadi guchaagaluʼ ni rúniluʼ yanna né ni bíʼniluʼ dxiqué.

Guníʼ ique ndiʼ: ora gúcaluʼ joven, ¿xi bidiiluʼ Jehová? Bidiiluʼ laabe ni jma galán de lii dxiqué. ¿Yanna yaʼ? ¿Xi cudiiluʼ Jehová? Laaca cudiiluʼ laabe ni jma galán de lii yanna. Maʼ bidiiluʼ cuenta la? ni cudiiluʼ Jehová yanna ngueca nga ni bidiiluʼ laabe dxiqué: ni jma galán de lii.

ZANDA GÚNILUʼ STALE COSA PARA GACANELUʼ XCAADXI

Guníʼ ique ndiʼ: lugar de guicá íqueluʼ maʼ huaniisiluʼ ne maʼ qué zanda gúniluʼ jma lu xhiiñaʼ Jehová, ni jma galán gúniluʼ nga gúʼyaluʼ zándaruʼ gacaneluʼ xcaadxi. Purtiʼ yanna zanda gúniluʼ caadxi cosa ni qué ñanda ñúniluʼ dxi joven lii. Guidúʼyanu tobi de laacani.

Guniʼné xcaadxi de ca cosa ni maʼ bizaacaluʼ ne ni maʼ bíʼniluʼ lu xquendanabániluʼ. Guidúʼyanu xi guníʼ caadxi binni ni riete lu Biblia:

Rey David: «Dxiqué nahuiineʼ ne yanna maʼ huaniiseʼ, peru qué huayuu dxi guuyaʼ gusaana Dios stubi guirutiʼ ni runi ni jneza, ne nin qué huayuu dxi guuyaʼ canabaʼ ca xiiñicabe pan» (Sal. 37:25).

Josué: «Yanna, mayaca gateʼ, ne laatu nanna dxiichitu de guidubi ladxidoʼto ne guidubi xhiálmatu, nin ti diidxaʼ de guiráʼ cosa galán ni maʼ biʼniʼ prometer Jehová, Dios stitu, laatu qué huachee. Guirani huayaca cumplir para gacaneni laatu. Qué lica huachee stiidxabe» (Jos. 23:14).

Guníʼ David ne Josué zacá purtiʼ pur stale iza bíʼnicabe ni ná Jehová sin nixélecabe de laa. Nga runi, risaca ca diidxaʼ ni guníʼcabe ca. Ne ngueca nga ni zanda guininu de lii: ca iza ni maʼ bibániluʼ ca racanécani guisaca ni guiniʼluʼ.

Pa maʼ xadxí de cayúniluʼ ni ná Jehová, zanda gábiluʼ xcaadxi ximodo huayacaneni lii ne xi ndaayaʼ huacaaluʼ pur laani. ¿Ñee rietenaláʼdxiluʼ ximodo guluu Jehová ndaayaʼ xquidxi ora bizaaca xiixa la? Pa rietenaláʼdxiluʼ ni; galán gábiluʼ ni xcaadxi. Zaguuni gana ca ni gucaadiaga lii ne laaca zusiécheni lii (Rom. 1:11, 12).

Sti modo zanda cuʼluʼ gana xcaadxi nga ra gúniluʼ stipa cheluʼ ca reunión ca ra Yoo stiʼ Reinu. Ne pa gúniluʼ ni laaca ziuuluʼ gana. Connie, hermana ni bizéʼtenu ra ruzulú artículo riʼ, guníʼ: «Guizáʼ riuaaʼ gana ora riaaʼ reunión ra Yoo stiʼ Reinu. Qué riuaaʼ triste purtiʼ ruuyaʼ modo nadxii ca hermanu ne ca hermana naa. Nga runi, runeʼ stipa gusihuinneʼ laaca nadxieeʼ laacabe. Riniáʼ regalu para laacabe ne runeʼ stipa guneniaʼ laacabe ca cosa ni ruchiña laanu gaxha de Jehová».

RUSISACA JEHOVÁ GUIRÁʼ DXIIÑAʼ NI RÚNILUʼ PUR LAA

Ruzeeteʼ Biblia chupa chonna binni ni qué ñanda ñuni xhiiñaʼ Jehová biaʼ ñuulaʼdxiʼ, neca zacá guizáʼ gunnaxhii Jehová laacabe. Tobi de laacabe nga Simeón, ti israelita ni guizáʼ maʼ huaniisi dxi gule Jesús. Zándaca cada biaje chebe ra templu, ruuyabe ca joven cayúnicaʼ xiixa dxiiñaʼ nabé risaca. ¿Peru laabe yaʼ? Zándaca guníʼ íquebe maʼ huaxiéʼ risácabe nezalú Jehová purtiʼ maʼ huaniisibe. Peru nánnanu cadi zacá ni. Jehová peʼ guníʼ nácabe ti hombre chaahuiʼ ne runi adorarbe laa ne guluu ndaayaʼ laabe ra bidii lugar gúʼyabe Jesús dxi nariʼniʼ. Ne laaca biquiiñeʼ Jehová laabe para guiniʼbe Jesús nga chigaca Mesías (Luc. 2:25-35). Rusiidiʼ relatu riʼ laanu biiyaʼ Jehová pabiáʼ naguidxi fe stiʼ Simeón, ne qué ñuuyabe laa casi tuuxa ni maʼ qué zanda guni xhiiñabe pur maʼ nagola. Ne Biblia ruzeeteʼ «nápabe espíritu santu».

Laaca zanda chuʼluʼ seguru guizáʼ rusisaca Jehová dxiiñaʼ ni rúniluʼ neca nuu cosa ni maʼ qué zanda gúniluʼ. Guizáʼ riéchebe pur ca sacrificiu ni runi cada tobi de ca xpínnibe «purtiʼ ribézabe gudii binni biaʼ zanda gudii ne cadi ni qué zanda gudii» (2 Cor. 8:12).

Galán quixhe íqueluʼ cadi gusiaandaluʼ textu ca ne gúniluʼ biaʼ zanda si gúniluʼ. Guzéʼtenu ti ejemplu, guníʼ ique xcaadxi modo zanda guni predicarluʼ, neca ti ratuhuiiniʼ si gúniluʼ ni. Laaca zanda guiníʼneluʼ ca hermanu pur teléfono o gucaaluʼ xiixa carta ra nuucaʼ para cuʼluʼ gana laacaʼ. Ca cosa riʼ, neca ruluíʼ nahuiinicani, peru rusihuínnicani pabiáʼ nadxiiluʼ laacabe ne zacanécani laacabe purtiʼ zeedacani de ti binni ni maʼ xadxí de cayuni xhiiñaʼ Jehová.

Zándaruʼ gúniluʼ xhiiñaʼ Jehová neca nápaluʼ xiixa guendahuará ni zándaca cucueeza lii para gúniluʼ jma lu xhiiñabe. Guzéʼtenu ti ejemplu, zanda gúʼyaluʼ ni bizaaca ti hermana de guidxi África oriental ni zeeda lu cuadru ni láʼ «Bilá Biblia xquendanabani ti gunaa».

Bietenalaʼdxiʼ zanda cuʼluʼ gana xcaadxi pur fe ni nápaluʼ Jehová ne maʼ xadxí de cayúniluʼ ni ná Dios sin guixéleluʼ de laa. Nácaluʼ ti ejemplu purtiʼ guizáʼ maʼ biʼniʼ huantarluʼ. Ne cadi guiaandaʼ lii ca diidxaʼ ni zeeda lu Hebreos 6:10: «Purtiʼ nánnanu jneza runi Dios ne qué zusiaandaʼ guiráʼ ni maʼ bíʼnitu pur ca hermanu, ne dede yanna cayúnirutu ni purtiʼ rusihuínnitu nadxiitu nombre stibe».

CADI GUSAANA DE GACANETU XCAADXI

Rusihuinni caadxi investigación ni huayaca huaxiéʼ raca huará ca binni ni maʼ huaniisi ni rúnicaʼ stipa para gacanecaʼ xcaadxi. Racaneni laacaʼ gúniruʼ xquendabiaanicaʼ dxiiñaʼ galán ne ribánicaʼ jma xhadxi.

Dxandíʼ, qué zaree diʼ ca achaque ni nápaluʼ pur maʼ huaniisiluʼ purtiʼ si cayúniluʼ cosa para gacaneluʼ xcaadxi binni. Reinu si stiʼ Dios nga zabee ca guendanagana ca purtiʼ zabeeni pecadu ni runi guioʼxhoʼ binni ne gatiʼ (Rom. 5:12).

Neca zacá, guiráʼ ni gúniluʼ lu xhiiñaʼ Jehová, ne ladeni nuu gacaneluʼ xcaadxi binni gunibiáʼ laabe, zacaneni lii gaca esperanza stiluʼ naguidxi ne laaca zanda gacaneni lii chuʼluʼ jma nazaaca. Hermanu ne hermana ni maʼ huaniisi, cadi guiaandaʼ laatu rusisaca Jehová guiráʼ sacrificiu ni rúnitu ne laaca rusisaca ca hermanu de congregación ejemplu galán de fe stitu.