Rudiʼdu mantenimientu ca Yoo stiʼ Reinu stidu ti chúʼcani galán

«¡Guizáʼ riuuladxeʼ Salón stinneʼ!». Zacá guníʼ Nicole, ti hermana joven de Colombia. ¿Xiñee nabé riuuláʼdxibe Salón stibe yaʼ? Laabe guniʼbe: «Purtiʼ racá nga nuu ca hermanu ni zeeda gaca casi familia stinneʼ». ¿Ñee runi sentirluʼ cásica Nicole la?

Lu guidubi guidxilayú, laadu ca testigu stiʼ Jehová, ridagulisaadu ndaaniʼ 63,000 Yoo stiʼ Reinu. Cadi naca si cani ti lugar galán ra runi adorardu Dios. Sicaríʼ guníʼ David, ti precursor regular de Colombia: «Racané ca Yoo stiʼ Reinu ca chuula’dxi’ binni mensaje stinu. Ne ora reeda gánnacaʼ laadu ridxagayaacaʼ ora gúʼyacaʼ pabiáʼ rápadu cani». Ne dxandíʼ ni riníʼcabe ca purtiʼ guizáʼ rúnidu stipa para gusiadu ne gudiʼdu mantenimientu ca Yoo stiʼ Reinu stidu. ¿Ximodo rúnidu ni yaʼ?

Ximodo riguixhe chaahuidu ca dxiiñaʼ de mantenimientu ni caquiiñeʼ gaca

Cada congregación nga rudii mantenimientu Yoo stiʼ Reinu stiʼ. Nga runi, gatigá rusiá ca hermanu ne rudiicaʼ mantenimientu ni ra guni chaahuicaʼ xiixa cosa nahuiiniʼ ni caquiiñeʼ gaca chaahuiʼ.

Racané Departamento Local de Diseño y Construcción (LDC) ca congregación ca, ¿ximodo rúnicabe ni yaʼ? ribícabe hermanu para gaca capacitador de mantenimientu. Cada tobi de laacabe runi tender biaʼ xhoopaʼ o hasta chii salón. Rigánnacabe ne runi capacitárcabe ca publicador para gánnacaʼ ximodo gapa chaahuicaʼ salón sticaʼ. Cada chonna iza, ruuyacabe ximodo nuu salón ca ne rábicabe ca hermanu paraa caquiiñeʼ gaca chaahuiʼ ti gácani ti lugar seguru.

Nabé rudii ca hermanu ne ca hermana xquixe peʼ pur capacitación ni ricaacaʼ. Sicaríʼ guníʼ Indhumathi, ti hermana de la India: «Guizáʼ sicarú guiráʼ ni bisiidicabe laadu. Ne ti privilegiu nga guizíʼdidu ximodo gapa chaahuidu Yoo stiʼ Reinu stidu». Sicaríʼ guníʼ Evans, ti hermanu de Kenia: «Bidúʼyadu pabiáʼ risaca nga guni chaahuidu ti cosa nahuiiniʼ ni caquiiñeʼ gaca chaahuiʼ ante gácani jma naro’ba’, ne zacá qué zunítidu stale bueltu».

Ximodo riaxa ca gastu ni raca

Para ganda iquiiñeʼ ne gaca mantener ti Yoo stiʼ Reinu lu ti iza, runi gastu ca hermanu ca gayuaa o hasta mil de dólar,a según guidxi nuu salón ca, tiempu de zúbani ne panda congregación riquiiñeʼ ni. ¿Ximodo riaxa ca gastu riʼ yaʼ?

Riaxa guiráʼ ca gastu ca né ca donación ni rudiʼdu. Sicaríʼ guníʼ ti hermanu de Kazajistán ni láʼ Alexander: «Ti ndaa de ca donación ca riquiiñecani para guiaxa internet, nisa ne biaaniʼ. Ne sti ndaa ca riquiiñeʼ ni para guixuíʼ xcaadxi cosa ni caquiiñeʼ, casi gui’chi’ para guchaa nácabe, guante ne ca cosa ni riquiiñeʼ para guiá salón ca». Ne ni riaana de ca donación ca, rié ni para obra mundial ti gacanenu ca proyectu de mantenimientu jma naro’ba’ ne jma caru ni cayaca lu guidubi guidxilayú.

Ca proyectu de mantenimientu jma naro’ba’

Nuu biaje, jma stale bueltu caquiiñeʼ para ti proyectu de mantenimientu stiʼ ti Yoo stiʼ Reinu que biá’ ñúnini gastu lu chupa chonna beeu de caquiiñeʼ ni. Ora chigaca ca dxiiñaʼ riʼ, riniʼné ca ancianu capacitador de mantenimientu stiʼ LDC. Pa guiníʼ LDC zanda gaca dxiiñaʼ riʼ, stale biaje, bueltu ni nuu lu obra mundial nga riquiiñecabe para gúnicabe ni. Lu iza de serviciu 2023, guca 8,793 proyectu de ni caninu riʼ, biaʼsi guca gastu 76 millón 600 mil dólar. Guzéʼtenu chupa de ca proyectu riʼ.

Ndaaniʼ guidxi Angola, nuu ti Yoo stiʼ Reinu ni gurí maʼ raca 15 iza ne nápani stale ra maʼ caquiiñeʼ gaca chaahuiʼ. Ma’ caquiiñeʼ guidxaa ca cable biaaniʼ stini ne maʼ cá bi ca pader que. Ne laaca guca quejar ca vecinu que pur nisa stiʼ nisaguié ni riete de ra salón que, purtiʼ rieni neza ra lídxicabe. Nga runi, bizulú LDC ti proyectu para ganda gaca chaahuiʼ ca cosa que, biaʼsi guca gastu 9,285 dólar. Guizáʼ bidxagayaa ca vecinu que pur modo guca ca dxiiñaʼ que ne bidiicaʼ xquixe peʼ ca hermanu.

Ndaaniʼ guidxi Polonia, nuu ti Yoo stiʼ Reinu ni ridxuuniʼ ique, ne maʼ guca feu alfombra stini. Biʼniʼ aprobar LDC ti proyectu para gaca chaahuiʼ ne gaca impermeabilizar ique ni, ne para guidxaa alfombra que. Biaʼsi guca gastu 9,757 dólar. Pur ca dxiiñaʼ ni guca riʼ, maʼ qué zaquiiñeʼ salón riʼ mantenimientu naro’ba’ lu chupa chonna iza.

Rusisaca ca dxiiñaʼ de mantenimientu ca Jehová

Ora ricaa ca Yoo stiʼ Reinu ca mantenimientu qué raca ahorrar si bueltu stiʼ ca donación ca, sínuque laaca rusisácani Jehová. Sicaríʼ guníʼ ti hermanu de archipiélago de Tonga ni láʼ Shaun: «Randa rusisácadu Jehová ndaaniʼ ti salón nayá, ni nexheʼ chaahuiʼ ne galán pur ca dxiiñaʼ de mantenimientu ni raca. Ne pur laani, riníʼcabe galán de Jehová ndaaniʼ xquídxidu. Nabé riuuláʼdxidu guni invitardu binni gueeda ndaaniʼ Yoo stiʼ Reinu stidu».

Lii laaca zanda gacaneluʼ

Guiranu zanda gacanenu para guiá ne gudiʼnu mantenimientu ca lugar ra runi adorarnu Dios. Sicaríʼ guníʼ Marino, ti capacitador de mantenimientu de Australia: «Ti privilegiu para laanu nga gápanu Yoo stiʼ Reinu stinu, ne guiranu nga zanda gacanenu. Pa gúninu ni, zacanenu gaca ahorrar stale bueltu, ti ganda iquiiñeʼ bueltu ca ra dxandíʼ peʼ caquiiñeʼ ni».

Sicaríʼ guníʼ Joel, ti hermanu de la India ni nabé riuula’dxi’ gacané lu mantenimientu stiʼ Yoo stiʼ Reinu: «Ora racaniáʼ ca hermanu, racané ni naa guxuiʼluáʼ ximodo nga chigúnidu dxiiñaʼ ndaaniʼ guidxilayú cubi ca». Sicaríʼ guníʼ Nicole, hermana joven ni maca bizéʼtenu que: «Cadi tan xadxí, biʼniʼ chaahuiʼ ca hermanu ra cadxuuniʼ ique bañu stiʼ salón stidu, ne naa guca caber gucuiidxeʼ lu pisu que. Ni dxandíʼ nga cadi naa bineʼ chaahueʼ ni, peru gucaniáʼ para cadi gaca ti accidente».

Pa racaláʼdxiluʼ gacaneluʼ lu mantenimientu stiʼ Yoo stiʼ Reinu stiluʼ la? guniʼné ca ancianu de congregación stiluʼ. Cadi guiaandaʼ lii, cadi para guiaapaʼ si salón stiluʼ nga ca donación ni rudiiluʼ, sínuque para guiráʼ ca salón ni nuu lu guidubi guidxilayú. Zanda gusábaluʼ ca donación stiluʼ ndaaniʼ ca cajahuiiniʼ ni nuu ndaaniʼ salón stiluʼ o laaca zanda gúniluʼ ni lu donate.jw.org. Xquixe peʼ lii pur ca donación ni rudiiluʼ.