¿Ñee jneza guicá binni tatuaje la?
Ni ricabi Biblia
Ti biaje si riete lu Biblia diidxaʼ tatuaje, Levítico 19:28 ná: «Cadi gúnitu tatuaje láditu». Dios bidii mandatu riʼ ca israelita purtiʼ qué racaláʼdxibe gúnicaʼ casi cayuni ca binni de sti guidxi, purtiʼ ca binni que rucaacaʼ lá o símbolo stiʼ dios sticaʼ ládicaʼ (Deuteronomio 14:2). Neca maʼ qué rinanda ca xpinni Cristu Ley ni gucuaa ca israelita riʼ la? nabé risaca guiníʼ íquecabe mandatu riʼ.
¿Ñee jneza guni ti xpinni Cristu tatuaje ladi la?
Guidúʼyanu caadxi textu ni zeeda lu Biblia ni zanda gacané laanu.
«Ne ca gunaa la? naquiiñeʼ gácucaʼ lari jneza, [...] ne gúnicaʼ ni né guendabiaaniʼ» (1 Timoteo 2:9). Laaca risaca chinanda ca hombre xpinni Cristu principiu riʼ. Nga runi, naquiiñeʼ gacuʼ ca xpinni Cristu lari jneza ti cadi guiníʼ binni mal de laacaʼ pur modo zuchaahuicaʼ.
Nuu tu laa runi tatuaje ladi para gusihuinni tupeʼ nga naca o runi sentir libre laa de guniné cuerpu stiʼ ni racala’dxi’. Peru Biblia cayabi ca xpinni Cristu ca diidxaʼ riʼ: «Rinabaʼ laatu gudiitu cuerpu stitu casi ti sacrificiu nabani, santo ne ni chuulaʼdxiʼ Dios. Zacá zaquiiñetu xquendabiaanitu para gúnitu xhiiñaʼ Dios» (Romanos 12:1). Tuuxa ni riquiiñeʼ xquendabiaaniʼ jneza zanda gacané ni laa ganna pa zuni ti tatuaje ladi o coʼ. Zándaca nuu tu laa napa gana guni ni para chinanda moda o para gusihuinni nuu lu ti grupu de binni. Peru ante gúniluʼ ni, guníʼ ique ndiʼ: «¿Xi guneʼ pa tidiʼ tatuaje ca de moda o gacaʼ arrepentir despué yaʼ?». Pa guiníʼ íqueluʼ ca ndiʼ ante la? zacaaluʼ ti decisión jneza (Proverbios 4:7).
«Binni riguixhe chaahuiʼ guiráʼ ni chiguni la? riree ni laa jneza. Peru ni raca luguʼ la? riaba lu guendapobre» (Proverbios 21:5). Stale tu laa nagueenda ricaa decisión guicá tatuaje ladi. Peru tu guni zacá la? zándaca despué zapa guendanagana pur decisión gucuaa ca ne zándaca pur laani zápaluʼ problema ra dxiiñaʼ o né xcaadxi binni. Laaca naná ne caru para guiaaxha ti tatuaje ladi binni ne stale tu huayaca arrepentir pur bicaani ladi. Rihuinni zacá ni purtiʼ yanna riʼ nuu stale negocio ra ráxhacabe tatuaje.