Imagination World/stock.adobe.com
Ti mensaje ni zeeda lu stiidxaʼ Dios: Esperanza para ca ni biree de xquidxi
Guiráʼ iza, millón de binni riree de ra lidxi ne de xquidxi. ¿Ñee huadxagaluluʼ tipu guendanagana riʼ la? Nuu tuuxa ni zanda gacané lii; laabe nga Dios. Laabe cudiibe lii esperanza de guibániluʼ jma galán. Ne zanda gánnaluʼ de esperanza riʼ lu Stiidxaʼ Dios.
«Ca binni biree de xquidxi ne ca ni gupa xidé bisaana lidxia cadi caquiiñesicaʼ gacanécabe laaca nagueendaca, laaca caquiiñeʼ gápacaʼ ti esperanza ni gacané laacaʼ despué», nga nga nin guníʼ Christos Stylianides, excomisario stiʼ Unión Europea.b Ora napa binni ti esperanza, racaneni laa cueza ziuu ti dxi zuchaa modo nabani. Peru cadi caquiiñeʼ si ca binni ni biree de xquidxi ti esperanza, laaca caquiiñecaʼ tu quixhedxí ladxidoʼcaʼ pur guiráʼ ni maʼ gudíʼdicaʼ.
«Dxi bixooñeluáʼ de xquidxeʼ ne bisaanaʼ familia stinneʼ, guizáʼ nadipaʼ gúcani para naa ne guníʼ iqueʼ qué zanda guneʼ huantar ni. Guizáʼ bidxibeʼ ne guyuáʼ triste» (Emmanuel, Haití).
¿Ñee zacaca runi sentirluʼ la? Pa bisaanaluʼ lídxiluʼ, caquiiñeluʼ xiixa ni quixhedxí ladxido’lo’ ne gudii lii esperanza. ¿Ximodo zanda gacané Biblia, Stiidxaʼ Dios, lii yaʼ?
Zaguixhedxí Stiidxaʼ Dios ladxido’lo’
Biblia ná: «Jehovác [...] nadxii binni de stiʼ guidxi» (Deuteronomio 10:17, 18).
Ndi riníʼ cadi nuuluʼ stúbiluʼ. Nadxii Jehová lii. Nánnabe xi cadíʼdiluʼ ne riénebe xi cayuni sentirluʼ.
Biblia ná: «Jehová nuu gaxha de guiráʼ ca ni canabaʼ ruaa laa» (Salmo 145:18).
Ndi riníʼ ora runi orarluʼ Jehová, laabe rucaadiágabe lii. Zanda gacanebe lii gatadxí ladxido’lo’ ne xquendabiaaniluʼ. Ne laaca riquiiñebe Biblia para gudiibe lii conseju ni gacané lii gudxiiluluʼ guendanagana ca.
Biblia ná: «Qué ziuu dxi guiníʼ íquenu zuni Dios ni dxandíʼ cosa malu, [...] qué ruchee Dios ni jma napa poder ora guni juzgar» (Job 34:10, 12).
Ndi riníʼ qué gapa Dios donda pur ca yuubaʼ cadíʼdiluʼ. Cadi cayuni castigarbe lii ne laaca cadi laadibe nga cutiidibe lii lu prueba.
Esperanza ni rudii Stiidxaʼ Dios
Cayabi Biblia laanu xi chiguni Dios pur laanu lu ca dxi ni zeeda ca. Biiyaʼ ximodo huayacané esperanza riʼ caadxi binni ni bixoñelú de xquidxi.
Biblia ná: «Zuchaabe nisa riete lucaʼ, maʼ qué ziuuruʼ guendaguti, maʼ guirutiʼ qué ziuu triste, maʼ guirutiʼ qué zuunaʼ ne maʼ qué ziuuruʼ yuubaʼ» (Apocalipsis 21:4).
Ndi riníʼ zusaanaʼ de guni sufrirnu. Dios cayabi laanu zabee guirá ca guendanagana ni nápanu ti ganda guibáninu nayecheʼ.
«Ma’ cadi candaa zabee Dios ca injusticia ne guiráʼ cosa malu ni cazaacaʼ. Racané esperanza riʼ naa guiníʼ iqueʼ ca dxi maʼ qué zápanu guendanagana» (Karla, El Salvador).
Biblia ná: «Ma guirutiʼ tu zietenalaʼdxiʼ guiráʼ cosa guyuu dxiqué ne maʼ qué zuninácani ladxidóʼ binni» (Isaías 65:17).
Ndi riníʼ maʼ qué zietenaláʼdxinu ca ni bininá laanu. Zacané Dios lii para maʼ cadi guietenaláʼdxiluʼ ca ni bininá lii dxiqué.
«Biblia cayuni prometer laanu maʼ qué zietenaláʼdxinu ca yuubaʼ ni gúpanu lu ca cosa ni binítinu. Esperanza riʼ racané ni naa gudxieeluáʼ ca guendanagana ni napaʼ, purtiʼ nannaʼ maʼ cadi candaa zaree ca yuubaʼ stinu» (Natalia, Ucrania).
Biblia ná: «Dios ni nuu guibáʼ zucuí ti reinu [...] zunideni ne zunduuxeni guiráʼ ca reinu ca» (Daniel 2:44).
Ndi riníʼ ziuu ti gobiernu guibáʼ ni zuni ni jneza ndaaniʼ Guidxilayú riʼ. Ma’ cadi candaa zabee Dios ca gobiernu stiʼ guidxilayú riʼ ne maʼ gobiernu si stiʼ zuni mandar. Ora maʼ guni mandar gobiernu stiʼ Dios zapa binni paz, maʼ qué zadxíbicaʼ, zaca puru si ni jneza ne zabani binni galán (Miqueas 4:3, 4).
«Guizáʼ riecheʼ ora gannaʼ maʼ qué ziuu tu guniná binni, maʼ qué zúnicabe menu tuuxa purtiʼ de gadxé guidxi laa ne maʼ zanda gápanu confianza binni. Ma’ cadi candaa zunduuxeʼ Reinu stiʼ Dios guiráʼ ca guendanagana riʼ» (Mustafá, Asia).
Zatadxí ladxidoʼloʼ ora gánnaluʼ de esperanza ni rudii Biblia.
Lu Biblia zadxélaluʼ conseju galán ni zacané lii
Zanda gacané Biblia lii cadi chuʼluʼ xizaa pur ni bizaacaluʼ. Ca conseju stini zanda gacané cani lii chuʼluʼ nayecheʼ né ca cosa ni nápaluʼ yanna ne cadi guicá íqueluʼ ca cosa ni binítiluʼ. Biiyaʼ ximodo gucané ca conseju riʼ caadxi binni ni bixoñelú de xquidxi.
Biblia ná: «Neca napa binni stale cosa la? cadi ca cosa ni napa nga rudii laa guendanabani» (Lucas 12:15).
¿Ximodo zanda gacané ca diidxaʼ riʼ lii yaʼ? Zándaca cayaca nagana para lii guni creluʼ ca cosa ni bizaacaluʼ ne nuuluʼ triste pur ca cosa ni binítiluʼ. Peru pa guiníʼ íqueluʼ jma risaca xquendanabániluʼ que ca cosa ni binítiluʼ la? zacaneni lii cadi chuupelu’ triste.
«Jma risaca xquendanabáninu que ca cosa ni nápanu, purtiʼ nuu biaje neca nápanu cani qué zanda gulá cani xquendanabáninu» (Natalia, Ucrania).
Biblia ná: «Cadi guiniʼluʼ: “¿Xiñee jma galán guca ca dxi gudiʼdiʼ ca que yanna pue?”» (Eclesiastés 7:10).
¿Ximodo zanda gacané ca diidxaʼ riʼ lii yaʼ? Neca nagana modo nabániluʼ tiempu riʼ, peru cadi naquiiñeʼ guchaagaluʼ ni né modo bibániluʼ dxiqué. Nga zacané lii cadi chuʼluʼ triste.
«Nannaʼ maʼ bichaa xquendanabaneʼ, peru runeʼ stipa chuaaʼ nayecheʼ purtiʼ nannaʼ cadi racá diʼ biluxe guiráʼ ni» (Eli, Ruanda).
Biblia ná: «Inque si nápanu ni guidoʼno ne ni gácunu la? né nga si ziuʼnu nayecheʼ» (1 Timoteo 6:8).
¿Ximodo zanda gacané ca diidxaʼ riʼ lii yaʼ? Pa chuʼluʼ nayecheʼ né ca cosa si ni nápaluʼ la? maʼ qué zaca estresarluʼ ne zatadxí ladxidoʼloʼ.
«Ca conseju stiʼ Biblia gucané ca ni laadu cadi tan guicá íquedu ca cosa ni binítidu. Naa ne xheelaʼ rudiʼdu xquixe peʼ Dios purtiʼ nabánidu ne nazaaca nuudu» (Iván, Ucrania).
Biblia ná: «Laguni pur xcaadxi guiráʼ ni ñuuláʼdxitu ñúnicabe pur laatu» (Mateo 7:12).
¿Ximodo zanda gacané ca diidxaʼ riʼ lii yaʼ? Pa gápaluʼ paciencia ne gácaluʼ nacha’hui’ né binni la? jma nagueenda zadxélaluʼ tu gaca xhamíguluʼ. Ne ora guuyaʼ xcaadxi galán xpiaʼluʼ la? jma ziuuláʼdxicaʼ guidxaagacaʼ lii.
«Guiráʼ binni riuula’dxi’ gácacabe nacha’hui’ né laacaʼ ne guiniʼnécabe laacaʼ né respetu. Ne ora rúninu ni la? laaca zacaca runi tratárcabe laanu. Ne nga racané laanu chuʼnu galán né ca binni ni nabeza gaxha de laanu» (Angelo, Sri Lanka).
Biblia ná: «Lagabi Dios xi caquiiñetu, [...] óraque zudii Dios laatu paz stiʼ [...] ne zápani ladxidoʼto ne xquendabiaanitu» (Filipenses 4:6, 7).
¿Ximodo zanda gacané ca diidxaʼ riʼ lii yaʼ? Ora guni orarluʼ Dios gudxi laa xi cayuni sentirluʼ, xi caquiiñeluʼ, xi ruchibi ne riguu xizaa lii. Nga zacané lii gatadxí ladxido’lo’ ne cadi tan guicá íqueluʼ guendanagana ni cadíʼdiluʼ.
«Siempre runeʼ orar Dios ora rapaʼ guendanagana ne laabe racanebe naa. Guiráʼ ni riziideʼ lu Biblia huayacané ca ni naa gatadxí ladxiduáʼ ne xquendabiaaneʼ» (Yol, Sudán del Sur).
«Huayacané ca conseju sti’ Biblia naa gudxieeluáʼ ca guendanagana ni rapaʼ ne cadi gacaluguaʼ» (Valentina, Ucrania).
«Raradxí ladxiduáʼ gannaʼ cayuni prometer Dios laanu zabáninu jma galá» (Emmanuel, Haití)
Lu Biblia zeeda ca promesa stiʼ Dios ne rudii cani laanu esperanza, ¿ñuuláʼdxiluʼ ñánnaluʼ ximodo riguixhedxí ca ni ladxidoʼno ne xiñee zanda guni crenu ca ni la? Zanda guinábaluʼ chiganna ti testigu stiʼ Jehová lii ne laabe zacanécabe lii sin quíxeluʼ.
a Agencia para ca Refugiadu stiʼ Naciones Unidas rábicabe refugiadu ca binni ni biree de xquidxi ne chindeza sti guidxi.
b Gúcabe comisario europeo de Ayuda Humanitaria y Gestión de Crisis.
c Lá Dios nga Jehová (Salmo 83:18). Biiindaʼ artículo ni láʼ «¿Tuu nga Jehová?».