¿Ñee dxandí’ zanda gacané ca Juegu Olímpico binni chu’ca’ tobi si la? | ¿Xi caní’ Biblia de laani?

Lu iza 2024, bia’ gaayu’ mil millón de binni bí’yaca’ ca Juego Olímpico, ra gudxite jma deportista de chupa gayuaa xhoopa’ guidxi. Thomas Bach, ni naca presidente sti’ Comité Olímpico Internacional, guní’: «Racané ca Juegu Olímpico ri’ para chu’ binni tobi si». Ne laaca guni’be: «Cadi gusaana de gúninu ca Olimpiada ri’, purti’ caquiiñe’ chu’ binni guidxilayú tobi si ne gápaca’ paz, neca nácaca’ de gadxé gadxé guidxi».

Peru, ¿ñee zanda gacané ca Juegu Olímpico binni chu’ca’ tobi si la? ¿Ñee zedandá dxi chu’ paz lu Guidxilayú ri’ la?

¿Ñee dxandíʼ zacané cani binni gapa paz ne chu’ca’ tobi si la?

Ca Juegu Olímpico de iza ri’ ma’ qué ñé si binni cani para gú’yaca’ deporte, ni jma bí’yacabe nga pa cayaca respetar derechu napa binni, pa cayúnicabe feu o cayúnicabe menu binni pur religión sti’ o pur modo naca. Guirá’ ca ndi’ la? nácacani tema políticu ne nabé rucaa cani binni tinde.

Rúnicabe ca Juegu Olímpico ri’ para gacaneni binni chuʼ nayecheʼ. Peru pur ca cosa rizaaca luni, lugar de ñuu binni tobi si laga ruxhele’ ni laaca’.

Maca bizeete’ Biblia, pur modo zaca xpia’ binni tiempu ri’, qué zanda chu’ca’ tobi si (2 Timoteo 3:1-5). Para gánnalu’ jma de profecía ri’, biinda’ artículo ni lá’ «¿Predijo la Biblia cómo sería la gente en nuestros días?».

Ni dxandí’ zacané binni chu’ca’ tobi si ne gápaca’ paz

Ruzeete’ Biblia de ti esperanza ni zeedané paz ne zacané chu’ binni tobi si. Cayuni prometerni ziuu binni xa’na’ ti gobiernu ni cayuni mandar dede guibá’ ni lá’ «Reinu sti’ Dios» (Lucas 4:43; Mateo 6:10).

Rey sti’ Reinu ca nga Jesucristu ne zuuyabe chu’ paz lu guidubi Guidxilayú. Biblia ná:

• «Zadale binni nacha’hui’ ne ziuu stale paz» (Salmo 72:7).

• «Zulabe ca binni pobre ni canaba’ gacanebe laa [...]. Zulabe laaca’ de ca ni cuquiichiná’ laaca’ ne de guendaridinde» (Salmo 72:12, 14).

Tiempu ri’, pur ca ni bisiidi’ Jesús, millón de binni ma’ nuuca’ tobi si lu chupa gayuaa’ treinta y nueve guidxi ne territorio. Ca testigu sti’ Jehová ni nuu lu guidubi Guidxilayú ma’ biziidica’ gácaca’ binni nadó’. Para gánnalu’ ximodo bí’nicabe ni, biinda’ revista Torre sti’ ni rapa, lu tema «Xi gúninu ti cadi gaca nanalá’dxinu binni».