Miqueas
7 ¡Pobre si de naa!
Purtiʼ despué de guiruuguʼ cuananaxhi tiempu nandáʼ
ne despué de chindágucabe ra biruuguʼ uva,
nacaʼ casi tuuxa ni qué ridxela nin ti racimu uva para go
ne qué ridxela nin ti cuananaxhi stiʼ duʼgaʼ* ni guizáʼ cuquiinde laa go.
2 Maʼ gastiʼ nin ti binni leal lu guidxilayú;
lade ca hombre ca maʼ gastiʼ nin tobi ni runi ni jneza.
Guiracaʼ nucachilucaʼ ne cabézacaʼ para guuticaʼ.*
Cada tobi rinaazeʼ laca biʼchiʼ né ti chin.*
3 Guizáʼ maʼ biziidiʼ ca batanácabe guni cosa malu;
xaíque* ca nisi cananábabe xiixa,
juez ca canabaʼ quíxecabe laa,
hombre risaca ca caníʼ puru si ni culuíʼlaʼdxiʼ gapa,*
ne guirácabe juntu caníʼ stiidxacabe ni.*
4 Hombre ni jma nachaʼhuiʼ de laacabe naca casi ca yaga guichi,
ne hombre ni jma runi jneza de laacabe jma malu laa que ti leʼ de yaga guichi.
Peru zedandá dxi gueeda juiciu ni maca guníʼ ca hombre stiluʼ ni rapa.*
Óraca guizáʼ zadxibi xhaatacabe.
5 Cadi gápatu fe* xcompañérutu
nin gápatu confianza ni jma xhamígutu.
Guyuu cuidadu né ni gábiluʼ gunaa ni nuu ndaaniʼ naluʼ.
6 Purtiʼ cayuni hombre menu bixhoze,
cucaalú gunaa jñaa
ne cucaalú xuá suegra;
ca enemigu stiʼ cada tobi nga ca binni ni nuu ndaaniʼ lidxi.
7 Peru naa, naa qué zusaanaʼ de cuezaʼ Jehová.
Zabezaʼ né stale paciencia* Dios ni rulá naa.
Zucaadiaga Dios stinneʼ naa.
8 Lii, enemiga stinneʼ, cadi guiécheluʼ pur ni cazaacaʼ.
Neca maʼ biabaʼ, ziasaʼ;
neca nabaneʼ lu guelacahui, zaca Jehová biaaniʼ stinneʼ.
9 Zuneʼ huantar xiana stiʼ Jehová
—purtiʼ maʼ bicheeniáʼ laabe—
dede ora chuʼbe pur naa ne gúnibe justicia pur naa.
Laabe zaguube naa lu biaaniʼ;
naa zuuyaʼ justicia stibe.
10 Laaca zuuyaʼ enemiga stinneʼ ni,
ne guizáʼ zatuilú* gunaa ni gudxi naa
«¿Paraa nuu Jehová Dios stiluʼ?».
Zuuyaʼ ca bizaluáʼ laabe.
Óraca zuxhatañeecabe laabe casi beñe ndaaniʼ ca neza ca.
11 Zácani ti dxi para guzuhuaaluʼ ca muru de guié stiluʼ;
dxi ca, jma zitu zindá ra riluxe ca layú stiluʼ.
12 Dxi ca zeeda binni ra nuuluʼ
dede Asiria ne ca guidxi stiʼ Egipto,
dede Egipto hasta Guiiguʼ que,*
de ti nisadóʼ hasta sti nisadóʼ ne de ti dani hasta sti dani.
13 Ne ziaana guidxi ca stubi pur donda stiʼ ca binni ni nabeza ndaanini;
ndiʼ nga ni cueendúcabe pur ni cayúnicabe.
14 Biquiiñeʼ vara stiluʼ casi runi ti pastor para gápaluʼ xquídxiluʼ, ca dendxuʼ ni naca herencia stiluʼ,
Ne gócabe ndaaniʼ guidxi Basán ne Galaad casi ca tiempu ni maʼ gudiʼdiʼ que.
15 «Casi ca dxi bireeluʼ de lu layú stiʼ Egipto,
zuluéʼ xquídxiluʼ cosa ni ridxagayaa binni.
16 Zuyadxí ca guidxi roʼ riʼ ca cosa riʼ ne zatuílucaʼ neca nápacaʼ poder.
Zuteegucabe ruaacabe né batanácabe;
ne ziaana diágacabe nacuaataʼ.
17 Zaxúpicabe yudé casi runi beendaʼ;
zacadíticabe casi ca maniʼ rixubindaaniʼ* ni nuu lu guidxilayú ora maʼ zireecabe de ndaaniʼ ca lugar nadipaʼ stícabe.
Guizáʼ cadxibi daatacabe zadxíñacabe ra nuu Jehová Dios stinu,
ne zadxíbicabe lii».
18 ¿Tuu ndiʼ naca ti Dios casi lii,
ni rutiidilaʼdxiʼ donda ne qué ruyadxí ra maʼ bicheeʼ ca ni biaanaʼ de herencia stiʼ yaʼ?
Qué ziananédibe* xiana stibe guiráʼ ora,
purtiʼ ni rusiecheʼ laabe nga guendarannaxhii ni qué rirá.
19 Zabiguetaʼ ziabe* laanu; zundiibibe* ca guendaruchee stinu.
Lii zusáʼbiluʼ guiráʼ ca pecadu stícabe ca lugar jma gueteʼ stiʼ nisadóʼ.
20 Luguiáʼ Jacob zusihuínniluʼ nácaluʼ fiel,
ne zusihuínniluʼ guendarannaxhii ni qué rirá luguiáʼ Abrahán,
casi biʼniʼ jurarluʼ ca bixhozebiidadu dede ca tiempu yooxhoʼ que.