Nehemías
6 De raqué gunna Sanbalat, Tobías, Guésem árabe que ne xcaadxi enemigu stidu maʼ bineʼ chaahueʼ muru que ne maʼ qué gápani nin ti lugar ra zuxeleʼ (maʼ ca ndaga si stiʼ ca puertaʼ que cayaadxaʼ). 2 Nagueendaca biseendaʼ Sanbalat ne Guésem, mensaje riʼ ra nuaaʼ: «Quíxhenu ti fecha para guidúʼyanu ndaaniʼ tobi de ca guidxihuiiniʼ ni nuu lu ca layú ni napampa stiʼ Onó». Peru ni nuucabe nga guninácabe naa. 3 Ngue runi biseendaʼ tu chitidxi laacabe: «Cayuneʼ ti dxiiñaʼ guizáʼ risaca ne qué zanda diʼ chaaʼ* ra nuutu. Qué zanda diʼ gusaanaʼ dxiiñaʼ riʼ para chaaʼ chiguuyaʼ laatu». 4 Tapa biaje biseendacabe mensaje que ra nuaaʼ, ne guidapaʼ biaje que ngueca gudxeʼ laacabe.
5 De raqué biseendaʼ Sanbalat mozo stiʼ para chiné mensaje que sti biaje ra nuaaʼ, ne ndiʼ maʼ gaayuʼ biaje gúnibe ni, peru biaje riʼ naazebe ti carta ni zuxeleʼ. 6 Carta que ná: «Ndaaniʼ ca guidxi ca caníʼcabe —ne Guésem laaca caníʼ ni— lii ne ca judíu cá íquetu gucaalutu rey. Nga runi cayuni chaahuiluʼ muru ca. Ne, caníʼcabe, lii nga chigácaluʼ rey. 7 Ne laaca caníʼcabe guliluʼ caadxi profeta para cheʼ ndaaniʼ guidubi guidxi Jerusalén, ne guiniʼcaʼ ca diidxaʼ riʼ: “¡Maʼ napa Judá ti rey!”. Gunna zindá ca diidxaʼ riʼ ra nuu rey, nga runi gudáʼ para guininu de ni cazaaca riʼ».
8 Peru biseendaʼ tu chitidxi laabe: «Cadi dxandíʼ guiráʼ ni naluʼ ca. Lii si cuzaʼluʼ cani». 9 Biyúbicabe guchíbicabe laadu ne nácabe: «Zareetu gana ne qué ziuu dxi guilúxetu dxiiñaʼ ca». Nga runi, Dios stinneʼ, dané naa stipa.
10 De raqué guyaaʼ ra lidxi Semaya —xiiñiʼ Delayá, xiiñiʼ Mehetabel— ne ca dxi que cadi careebe de ra lídxibe. Para gudxi Semaya naa: «Quíxhenu ti dxi para chuunu ra lidxi Dios ni dxandíʼ, ndaaniʼ templu, ne guséʼgunu ca puertaʼ stini, purtiʼ zedaguuticabe lii. Huaxhinni zedaguuticabe lii». 11 Peru gunieeʼ: «¿Zuxoñelú xa ti hombre casi naa? ¿Zándaxa chuʼ ti hombre casi naa ndaaniʼ templu sin gatiʼ? ¡Coʼ, qué ziuaaʼ diaʼ!». 12 Raqué bidieeʼ cuenta cadi Dios diʼ biseendaʼ laabe. Tobías ne Sanbalat nga gudixe laabe para guni profetizarbe xi chiguizaacaʼ. 13 Gudíxecabe laabe para guchíbicabe naa ne gucaacabe naa gucheeʼ. Ti gápacabe paraa quiñeyúcabe naa ne guiníʼcabe naa.
14 Dios stinneʼ, bietenalaʼdxiʼ guiráʼ ni maʼ biʼniʼ Tobías ne Sanbalat, ne laaca bietenalaʼdxiʼ ni biʼniʼ profetisa Noadías ne xcaadxi profeta ni gucaláʼdxicaʼ nuchíbicaʼ naa stale biaje.
15 Ne bedandá dxi biluxe muru que, 25 stiʼ beeu elul,* 52 si dxi bilúxeni.
16 Ora gunna ca enemigu stidu guiráʼ ndiʼ ne biiyaʼ ca guidxi ni nabeza gaxha que ni, guizáʼ bituí lucaʼ ne bidiicaʼ cuenta Dios stidu nga gucané laadu para guca dxiiñaʼ riʼ. 17 Ca dxi que nabé biseendaʼ ca hombre risaca de guidxi Judá stale carta ra nuu Tobías, ne laabe ricábibe laacaʼ. 18 Stale de ca binni de Judá bidii stiidxacaʼ zuni apoyarcaʼ Tobías, purtiʼ xpigudxi Secanías xiiñiʼ Ará laabe, ne xiiñibe Jehohanán bichaganáʼ xiiñidxaapaʼ Mesulam xiiñiʼ Berekías. 19 Ne puru cosa galán rábicabe naa de Tobías ne despué ritídxicabe laabe xi canieeʼ. Ngue runi ruseendabe carta ra nuaaʼ para guchíbibe naa.