Ngonda Yinna

Muingi tubaka ndandu mu nyitu ayi mu menga ma Yesu, tufueti kuna kiminu mu khudulu. (Efe. 1:7) Batu Yesu katedila “mamemi mankaka,” badianga ko dipha ayi banuanga ko vinu mu Mbambukulu Moyo yimvangamanga kadika mvu. (Yoa. 10:16) Vayi kheti bobo, bawu bambakanga ndandu mu nyitu ayi mu menga ma Yesu Klistu. Voti kuba kiminu mu nkhailu’andi wu khudulu. (Yoa. 6:53) Bo badi luaku lu kudia dipha ayi kunua vinu, bammonisanga ti badi mu khati luwawanu lumona ayi badi kivuvu ki kuyala ku diyilu mu Kintinu ki Nzambi. Diosokua dingumba tuidi, kuba kuandi Baklistu basolu voti mamemi mankaka, vantombulu kukuna kiminu muingi tubaka luzingu lu mvu ka mvu. w24.12 13 ¶14, 16

Mu Bidia bi Mfumu va Masika ma Builu, Yesu wuvana dipha dikhambulu luvi kuidi bapostolo bandi ayi wu bakamba ti dipha dinsundula nyitu’andi. Bosi nandi wuba vana vinu ayi wutuba ti yawu yinsundula “menga mami ma luwawanu.” (Mala. 14:​22-25; Luk. 22:20; 1 Ko. 11:24) Nandi wutedila luwawanu alolo, luwawanu lumona. Ayi bo bala yala to yandi mu “Kintinu ki Nzambi”, bawu badi mu luwawanu alolo. (Ebe. 8:​6, 10; 9:15) Mambu Yesu katuba mu Bidia bi Mfumu va Masika ma Builu, masalimina mu mua “nkangu wu mamemi.” Mua nkangu awowo wu mamemi, wuba bapostolo bandi bakuikama baba yandi ku sala. Ayi bawu bala zinga na Yesu ku diyilu. w24.12 11 ¶9-10

Yesu bamvakula, bankanga, bamfinga, bamvunina mambu ayi bantovula. Masodi ma basi Loma bannata nati va kibuangu kio bambandila va dikunzi. Yave Nzambi wuba beni mu kiunda mu kibila akiokio. Yave wuba lulendu ayi luaku muingi kumanisa ziphasi zi Muan’andi, vayi kasa mavanga ko. Yave wunzolanga Muan’andi. Vayi kibila mbi kabikila muingi katovuka ayi kufua? Kibila nandi wu tuzolanga. Khudulu yi Yesu, yidi mbonosono ti Yave wu kuzolanga beni. Nandi wuba beni mu kiunda kumona Muan’andi wu luzolo kufua muingi kutukula mu disumu ayi lufua. (1 Yoa. 4:​9, 10) Bukiedika, nandi wuntomba kusadisa kadika mutu mu befu, kunuana nzingu wu kubika bua mu disumu ayi tununga kuvanga mawu. w24.08 6 ¶13-14

Befu tulenda luta visa luzolo Yave kadi mu befu, bo tumvisa ziphasi khudulu yintuadisa. Satana wutuba ti ni mutu wala tatamana wukuikama kuidi Yave na kuviokila mu mambu maphasi. Muingi kumonisa ti mambu Satana kutuba make ma luvunu, Yave wubika Yesu kutovuka ava kafua. (Yobi 2:​1-5) Yave wumona batu kuvueza Yesu, masodi kumbula, ayi kumbanda va dikunzi. Yave wumona Muan’andi wu luzolo kutovuka ayi kufua lufua luphasi. (Mat. 27:​28-31, 39) Yave wuba lulendu lu kutula nkaku muingi mambu amomo mabika kumonikina muan’andi. (Mat. 27:​42, 43) Vayi boti Yave wutula nkaku muingi mambu amomo mabika kumonika, khanu khudulu yisa futu ko ayi khanu befu tuisi ko kivuvu. Vayi Yave wubika Muan’andi kutovuka nati kamana monyo. w25.01 22 ¶7

Mu kilumbu 16 Ngonda yi Nisa, mvu 33 T.K. minlandikini mi Yesu baba mu kiunda ayi boma. Babuadi mu bawu baba kuenda ku buala bu mueka baba tedilanga Emausi. Mu kinzimbukulu vamonika mutu bakhambu zaba ayi waba diata yawu. Minlandikini amiomio banzabikisa kiunda baba mu mambu Yesu kamonikina. Dibakala adiodio bakhambu zaba, wutona kuba kamba mambu bawu batatamana kutebukila moyo. “Kutonina kuandi kuidi Mose nati mimbikudi minkaka,” nandi wusudikisa kibila mbi Mesia katovukila ayi kafuila. Bo babakala abobo bavitila ku Emausi, dibakala no bakhambu zaba wukizabikisa nani nandi kaba! Nandi wuba Yesu no Nzambi kavulubusa. (Luk. 24:​13-35) Yesu wumonikina kuidi minlandikini miandi khumbu ziwombo mu 40 di bilumbu kaviokisa va ntoto ava kavutuka ku diyilu. Mu thangu beni, Yesu wukindisa minlandikini miandi baba mu kiunda ayi mu boma. Bawu bayiza ba mu mayangi ayi kibakala muingi kusamuna ayi kulonga zitsangu zimona zi Kintinu. w24.10 12 ¶1-3

Bumviokila thangu, batu bankonzukanga mu kinsuni; vayi buisi ko buawu bummonikinanga mu kiphevi. Tala kifuani ki zikhomba ku Kolintu. Bawu batambula zitsangu zimboti, babotama, batambula phevi yinlongo ayi babaka ndandu mu malongi Polo kaba vana. (Mav. 18:​8-11) Vayi bo vavioka mua mimvu tona bawu babotama, bawombo mu bawu, batatamana kuba batu bakhambu konzuka mu kiphevi. (1 Ko. 3:2) Muingi tuba bayonzuka mu kiphevi, theti tufueti ba phuila yi kukonzuka mu kiphevi. Batu ‘bakhambulu diela,’ banzolanga kuba bana ba bilezi mu kiphevi ayi balendi kuenda ko ntuala. (Zinga. 1:22) Tuisintomba ko kuba buka batu bankaka bayonzuka mu kinsuni, vayi kadika thangu bantombanga matata mawu, baba bakila makani. Befu, tuntomba kuvanga mangolo, muingi tuba batu bayonzuka mu kiphevi. Boti ngie widi mu kuvanga mangolo muingi wuyonzuka mu kiphevi, sambila kuidi Yave ka kuvana ‘phuila ayi mangolo ma kuvangila mambu.’—Fil. 2:13. w24.04 4 ¶9-10

Yave wutumonisanga buidi kantadilanga diyindu di kubunga batu. (Yehe. 33:11) Yave kasintomba ko kubunga batu. Vayi bo vantombulu kumonisa kiadi, nandi wumvanganga mawu. Mambu mbi tuzebi matedi batu balasa vulubuka ko? Kibibila kintubila to mua bifuani. Yesu wutuba ti Yuda Isikalioti kalasa vulubuka ko. (Mala. 14:21; tala mvandi Yoane 17:12 ayi nota mu Kibibila ki kulongukila.) Yuda wuzaba ti mambu kavanga, maba mambi vayi mu lutia luandi wuvanga mawu ayi mu kuvanga mawu nandi wumonisa ti wuba mbeni yi Yave ayi yi Muan’andi Yesu. (Tala Malaku 3:29 ayi nota mu Kibibila ki kulongukila.) Bobuawu mvandi, Yesu wutuba ti zifumu zi binganga baba kunlendanga, balasa baka ko luaku lu kuvulubuka. (Mat. 23:33; tala mvandi Yoane 19:11 ayi nota mu Kibibila ki kulongukila “o homem.”) Ayi mvuala Polo wulubula ti batu babalukila kimvuka ayi bakhambu nyongina masumu mawu, balasa vulubuka ko.—Ebe. 6:​4-8; 10:29. w24.05 4 ¶10-11

Befu kutatamana bafikama kuke Yave, vasi ko diambu dimbi Satana kalenda ku tuvangila diala kadidila. (1 Yoa. 3:8) Mu nza yimona, Yave wala tatamana kukeba bisadi biandi bikuikama kubika to mu mambu malenda kuba vanga bubi mu kiphevi, vayi mvandi wala manisa lufua. (Nzai. 21:4) Bukiedika, luke luaku lunneni kuba zinzenza mu tenda yi Yave, kibila mawu ma tusadisa kuba kikundi kifikama ayi nandi. (Yehe. 37:27) Zikhadulu mbi tufueti ba muingi tutatamana kuba zinzenza ziandi? Ba kukutumisa ku nzo yi mutu, ngie wunkuiza zaba mambu mbi bawu bantomba ngie wuvanga. Bobuawu mvandi, befu tufueni zaba mbi Yave kantomba batu bankota mu tend’andi bafueti tatamana kuvanga. Luzolo luitu mu Yave lu tunatanga kuvanga mamoso mantombulu “muingi kunkuangidika mu mambu moso.” (Kolo. 1:10) Befu kuba boma bu Yave, buawu buala tusadisa tubika kunyongisa. Bukiedika, befu tuntomba kudiata na Nzambi mu kuzaba ‘ndilu’itu.’—Mika 6:8. w24.06 4 ¶8-9

Yave wudinda Abalahami muingi kavana muan’andi Isaki banga nkhailu. Abalahami wuba beni mu kiunda mu kibila ki mambu amomo, vayi nandi wuba wukubama muingi kutumukina Yave. Vayi, bo kabina vonda muan’andi, Yave wuntula nkaku. Mawu ma tutebula monyo diambu dimueka Yave kayiza vanga kuntuala—kuvana muan’andi wu luzolo banga nkhailu. Bukiedika, Yave wunzolanga beni batu. (Ngene. 22:​1-18.) Mu thangu Mose, Yave wuvana nsiku kuidi basi Isaeli, bavananga minkhailu mi bibulu muingi babaka nlemvu wu masumu. (Lev. 4:​27-29; 17:11) Minkhailu amiomio miba mbonosono yi nkhailu wulutidi Yave kayiza vana muingi kuvukisa batu mu masumu. Mu nzila mimbikudi miandi, Nzambi wusudikisa ti mutu bakanikisa voti Muan’andi wu luzolo, wunkuiza tovuka ayi kufua. Muingi kukula batu boso kubunda mvandi ngiewu mu disumu ayi lufua!—Isa. 53:​1-12. w24.08 4 ¶7-8

Bo wuntanga Kibibila tomba ziphila wulenda sadila mambu wuntanga. Ayi wukiyuvusa: ‘Buidi yilenda sadila mambu amama mu bilumbu abibi ayi mu bilumbu binkuiza?’ Muingi kufuanikisa yindulabu boti widi mu kutanga mambu madi mu 1 Tesalonika 5:​17, 18. Bo wummana kutanga matangu amomo yindula khumbu zikua wunsambidilanga ayi buidi wumvangilanga mawu. Mvandi, wulenda yindula mu mambu wumvutudilanga matondo. Ngie wulenda yindula mambu matatu wulenda sikika makani muingi kutonda Yave. Kheti mu thangu yiluelu wulenda tangila, ngie wunkuiza sikika thalu mu mambu mankinza ayi kuba mutu wunkuwanga ayi wunsadilanga diambu di Nzambi! Ngie kuvanga mangolo kadika kilumbu ma kusadila mambu wuntanganga mu Kibibila, ngie wala ba kisadi kimbote ki Yave. w24.09 4-5 ¶9-10

Yave wu tuvanga na khadulu yinkinza. Kheti kutambula kuntuadisanga mayangi, befu tunluta bakanga mayangi bo tunkabila bankaka. Tumbanga beni mu mayangi bo tumbaka luaku lu kusadisa zikhomba zitu. Ayi tunkuangalalanga bo bawu bamvutula matondo. Bukiedika, kuba kuandi ba tutonda voti ndamba, befu tumbanga mu mayangi mu kuzaba ti tuvanga diambu dimboti. Bika kuzimbakana ti boso kua bubela biuma mavana, ‘Yave wala kuvana bilutidi.’ (2 Lusa. 25:9) Befu tulendi kaba ko dedi bo Yave kankabilanga! Ayi bo Yave ka kutusakumuna luawu lusakumunu lulutidi. Diawu, bika tubaka makani ma kutatamana kulandakana kifuani ki Tat’itu yi diyilu. w24.09 31 ¶20-21

Yave ke nkua kiadi ayi nkua mamboti. (Minku. 103:13; Yesa. 49:15) Bo tumbanga mu kiunda nandi mvandi wumbanga mu kiunda. (Zaka. 2:8) Nandi wu tusadisanga kunzaba ayi kuba bakundi bandi. (Minku. 25:14; Mav. 17:27) Ayi Yave wu kikululanga; ‘Nandi wunkuinamanga muingi kutala diyilu ayi ntoto, wuntelimisanga mutu wukikululanga mu fundu wu ntoto.’ (Minku. 113:​6, 7) Buidi mutu kalenda manga kukembisila Nzamb’itu lutidi zangama? Befu tunkembisanga Yave kibila tuntomba bankaka banzaba. Bawombu basa zaba ko kiedika matedi Yave. Kibila mbi? Kibila Satana wuntubanga luvunu matedi Yave ayi batu bankikininanga mu luvunu beni. (2 Ko. 4:4) Satana wumvanganga batu kukikinina ti Yave widi nkua nganzi, kavuanga ko batu nkinza ayi wuntuadisanga ziphasi mu nza. Vayi befu tuzabizi kiedika kitedi Nzambi! Befu tuidi luaku lu kuzabikisa batu matedi Nzambi tunsadilanga ayi kuba sadisa mvawu kunkembisa.—Yesa. 43:10. w25.01 3 ¶6-7

Mu sekulu yitheti, batu baba buelanga mioko satana batuba luvunu luwombo matedi Muana Nzambi, kheti nandi wuba wuvedila ayi waba vanganga mangitukulu mawombo. Dedi, zifumu zi binganga bakamba batu ti Yesu waba kukisilanga ziphevi zimbi mu lusalusu lu “mfumu ziphevi zi mbi.” (Mala. 3:22) Bo baba fundisa Yesu, zifumu zi bingana bamvunina mambu ti nandi waba vueza Nzambi. Ayi bavukumuna batu muingi badinda lufua lu Yesu. (Mat. 27:20) Kuntuala bo minlandikini mi Yesu baba samuna zitsangu zimboti, batu baba balukila, “bavukumuna nkangu wu batu” muingi baba vanga phasi. (Mav. 14:​2, 19) Mu matedi lutangu lu Mavanga 14:​2, Kibanga ki nsungi ki 1 Ngonda Kumi Wadi, mvu 1998, kisudikisa ti: “Basi Yuda bawombo bamanga kukuwa zitsangu baba longa, basa kuangalala ko to mu kumanga. Vayi mvandi bavukumuna bankaka bakhambu ba basi Yuda muingi babalukila Baklistu.” Bubu mvandi, Satana wukidi tatamana “kuvukumuna ntoto woso.” w24.04 11 ¶15-16

Boti mutu wala zinga mvu ka mvu, vasintombulu ko theti kuzaba thangu mbi nandi kafuila. Kibila Yave widi Mfundisi wuvedila voti makani nandi kambakanga make masonga. (Minku. 33:​4, 5) Befu tulenda ba lufiatu ti ‘Mfundisi wu nza yimvimba’ wala baka makani mamboti. Mvandi tulenda tuba ti boti mutu wala zinga mvu ka mvu, vasintombulu ko theti kuzaba kuidi nandi kabe zingilanga. Tuidi lufiatu ti Yave kalendi tadila ko ‘zikhombo’ bivevi na bivevi bi batu banzingilanga mu zitsi mo zitsangu zimboti ka zitukidiabu ko. (Mat. 25:46) Kheti befu tulenda zimbakana batu abobo, tuidi lufiatu ti Mfundisi wu nza yimvimba wumvuanga beni nkinza batu abobo. Befu tusa zaba ko buidi Yave kala vangila mambu mu thangu ziphasi zingolo. Ḿba bankaka mu thangu ayoyo, bala tambula luaku lu kulonguka matedi Yave, kumfiatila ayi kubaka makani ma kuba ku khonzu’andi bo nandi kala vedisa dizina diandi vantuala batu.—Yehe. 38:16. w24.05 12 ¶14-15

Dikabu di Yave, banzolanga kuyisadisa bawu na bawu. (2 Ko. 8:4) Vayi khumbu zinkaka, vantombuluanga kibakala muingi kuvanga mawu. Dedi, bo mvita wummonika, bakulutu ba kimvuka bantombanga kuzaba boti zikhomba bantomba lusalusu lu kiphevi ayi lu kinsuni. Mu kibila ki luzolo badi mu zikhomba, bakulutu ba kimvuka bantulanga luzingu luawu va kingela muingi kuba vana lusalusu luntombulu. Dimbanga diambu dinkinza kuba kithuadi. Tumukina zithuadusulu zimfuminanga ku filiali. (Ebe. 13:17) Bakulutu ba kimvuka bafueti fionguninanga zithuadusulu, matedi buidi zikhomba balenda kubimina ayi kuzaba mbi bafueti vanga boti mambu maphasi mambelama kumonika. (1 Ko. 14:​33, 40) Monisa kibakala vayi ba keba keba. (Zinga. 22:3) Yindula ava kuvanga dioso diambu ayi bika kutula luzingu luaku va kingila mu bobo. Fiatila mu Yave. Tebuka moyo ti Yave wuntomba ngie ayi zikhomba muba buboti. w24.07 4 ¶8; 5 ¶11

Ntinu Davidi wuzaba Yave ayi waba kumfiatilanga. Bo baba tomba kumvanga phasi kuidi zimbeni ziandi kubunda mvandi Ntinu Sauli, Davidi wudinda lusalusu lu Yave mu nsambu. Bo Nzambi katambudila nsambu wu Davidi ayi kamvukisa, nandi wutuba: ‘Yave widi Nzambi yimonyo!’ (Minku. 18:46) Mu mambu amomo, Davidi kabasa tomba ko to kutuba ti, Nzambi widi. Buku yimueka yintuba ti, mu kutuba mambu amomo, Davidi waba monisa ti waba fiatilanga mu Yave ayi waba kuntadilanga “Nzambi yimonyo, wumvanganga mamoso muingi kusadisa dikabu diandi.” Ngete, mambu Davidi kamonikina mu luzingu, mamvana lufiatu ti Nzambi widi ayi lufiatu alolo lubuela kunkindisa muingi katatamana kusadila Yave ayi kunzitisa. (Minku. 18:​28, 29, 49) Kuba lufiatu ti Yave widi Nzambi yimonyo, kulenda tusadisa kunsadila mu kifuza. Mu phila ayoyo, befu tuala baka mangolo mantombulu muingi kukindama mu mambu maphasi, ayi kutatamana kuvanga mangolo mu kisalu kiandi. Mvandi, tuala baka makani ma kutatamana kufikama Yave. w24.06 20-21 ¶3-4

Mbi tulenda longuka mu mambu mvuala Polo kakamba basi Tesalonika? Befu kukuwa diambu dikhambulu nguizani na mambu tumana longuka mu Kibibila, voti di kukuitukila batu bantubila beni, nkinza kufiongunina diawu. Mu mimvu mima vioka mu thangu União Soviética, zimbeni zitu baba kue tambikanga nkanda mueka kuidi zikhomba zitu, waba monikina buka ti ku kikulutu kitu wufumina. Nkanda beni waba kindisa zikhomba bazibula kimvuka kinkaka. Wawu, waba monikina buka ti wuba wukiedika. Vayi zikhomba zitu zikuikama, basa vunuka ko. Bawu bavisa ti mambu maba mu nkanda beni, masa ba ko kithuadi na mambu balonguka. Bubu mvandi zimbeni zitu, bansadilanga ziphila ziwombo muingi kututula divuda ayi kutuvasa. Tulendi ‘fika vunuka ko, ni kususuka’ mu yoso kua tsangu. Vayi tufueti kukikieba mu kufiongunina boti mambu tunkuwa voti tuntanga, madi kithuadi na kiedika ki Kibibila tulonguka.—2 Te. 2:2; 1 Yoa. 4:1. w24.07 12 ¶14-15

Kukivana kuidi Yave, ayi kuba mu khati dikanda diandi mawu makani malutidi nkinza mutu kalenda baka. Nandi wuntomba batu boso bavanga mawu Kibila mbi? Kibila wuntomba batu boso baba bakundi bandi ayi bazinga mvu ka mvu. (Deute. 30:​19, 20; Nga. 6:7) Vayi Yave kakuikanga ko ni mutu kansadila. Nandi wumbikanga kadika mutu kasola mbi kantomba kuvanga. Abu boti kisadi ki Yave kibotama wumbundula nsiku’andi, mu kuvola disumu dingolo? Boti nandi kasinyongina ko mambu kabe vanga, buna bafueti kumbotula mu kimvuka. (1 Ko. 5:13) Vayi kheti bobo, Yave wuntomba batu boso ka banyongini’abu ko masumu mangolo bavola, bavutuka kuidi nandi. Ayi kiawu kibila kinkinza nandi katuadisila khudulu—muingi batu banyonginanga masumu mawu babaka nlemvu. Tat’itu yi luzolo, wuntumisa baboso bamvolanga masumu muingi banyongina mawu.—Zaka. 1:3; Lom. 2:4; Tia. 4:8. w24.08 14 ¶1-2

Mu thangu mvuala Yoane kasonika minkanda miandi mitatu, batu bankaka baba longanga mambu ma luvunu, maba tuadisanga kithatu mu kimvuka. Vayi kheti bobo, batu bankaka batatamana “kudiatila mu kiedika.” Bawu batatamana kutumukina Yave ayi “kudiatila mu zithumu ziandi.” (2 Yoa. 4, 6) Baklistu abobo bakuikama, batuadisa mayangi kubika to kuidi Yoane vayi mvandi kuidi Yave. (Zinga. 27:11) Mbi tulenda longuka mu mawu? Lukuikumunu luntuadisanga mayangi. (1 Yoa. 5:3) Dedi, befu tumbanga mu mayangi mu kuzaba ti tuidi mu kukuangidika Yave. Nandi wumbanga mu mayangi bo tuntumukina zithumu ziandi mu kubika kuvanga mambu mambi. Zimbasi mvandi ku diyilu, bankuangalalanga. (Luk. 15:10) Mvitu tunkuangalalanga bo tummona khomba wuntatamana wukuikama. (2 Te. 1:4) Ayi bo nza yi Satana yala bungua, befu tuala kuangalala mu kutatamana bakuikama mu Yave. w24.11 12 ¶17-18

Thangu kua fueti viokisa bo wunzaba mutu ava kunkamba ti wuntomba kuba yandi bumasi? Ngie kukhambu viokisa thangu muingi kuvanga mawu, ngie wulenda monisa ti wusa yindula ko mu keba keba ava kubaka makani. (Zinga. 29:20) Vayi mvandi ngie kuviokisa thangu yiwombu, wulenda monisa ti ngie wummonanga phasi kubaka makani, ayi bulutidi boti mutu beni bazaba ti ngie wukunzolanga. (Mpovi 11:4) Tebuka moyo ti ava kuzabikisa mabanza maku ka mutu beni, vasintombulu ko kuba lufiatu ti nandi wunkuiza kuela. Vayi ngie fueti ba lufiatu ti ke wukubama muingi kukuela ayi mutu beni kalenda ba mutu wufuana mu ngiewu. Mbi wulenda vanga ngie kuzaba ti vake khomba wuntomba kuba yaku bumasi? Boti ngie wisintomba ko, buna monisa mawu mu mavanga maku. Yike ko ve mbonosono yi luzolo, kuvanga mutu kuyindula ti ḿba ngie wulenda ba yandi bumasi, vayi masi ko mawu ngie wuntomba.—Efe. 4:25. w24.05 22-23 ¶9-10

Baklistu basolu bakuikama bawu to Yesu kala tambula mu Kintinu ki diyilu. Baklistu basolu bala khambu tatamana bakotuka mu kiphevi, balasa ba ko va kimueka na batu “bandi kasola.” (Mat. 24:31) Ayi boso kua bubela kivuvu tuidi, tufueti teka matu ndubu yi Yesu matedi kutatamana kuba bakotuka ayi bakuikama. Befu tuzabizi buboti Yave, diawu tufueti fiatila mu lufundusu luandi. Ayi tubika kukuazuka boti Yave wunsola baklistu basolu mu bilumbu bitu. Tufueti tebuka moyo mambu Yesu katuba mu kifuani ki bisadi bivitila ku tsola yi vinu mu kilokula ki 11. (Mat. 20:​1-16) Bisadi abiobio bavitila kutsuka kilumbu, vayi batambula thalu yimueka yi zimbongu na bo batona kusala yimeni. Bobuawu mvandi, boso kua bubela thangu baklistu bosolu ba kuba sodila, bawu bala tambula to nsendu’awu wu kukuenda ku diyilu, ba kutatamana bakuikama. w24.09 24 ¶15-17

Yesu wutuvana kifuani kimboti tulenda landakana bo tumviokila mu mambu mambi. Basi dikanda diandi ayi batu bankaka, bamvangila mambu mambi. Dedi, basi dikanda diandi bo bakhambu ba kiminu mu nandi bankamba ti malawuka. Zimfumu zi binganga bankamba ti nandi wuba kithuadi na ziphevi zimbi. Ayi masodi ma basi Loma bansakinina, bambula ayi bamvonda. (Mala 3:​21, 22; 14:55; 15:​16-20, 35-37) Kheti mu mambu moso amomo Yesu kaviokila, nandi kasa vutudila ko mambi. Mbi tulenda longuka mu kifuani kiandi?(1 Pet. 2:​21-23) Yesu wutubikila kifuani kimboti tulenda landakana bo batu bankaka batuvangila mambu mambi. Nandi wuzaba thangu yi kukoluka ayi yi kuvuena sui. (Mat. 26:​62-64) Kheti bo bankaka baba tubanga mambu mambi matedi nandi, Yesu kasa tuba ko ni diambu. (Mat. 11:19) Mu thangu kaba luaku lu kukoluka, nandi kasa wonina ko zimbeni ziandi voti kuba vutudila mambi. w24.11 4-5 ¶9-10

Yindula boti ngie mavana nkhailu kuidi mutu wunzolanga. Vayi wunkuiza nyonga beni ngie kubakula ti, nandi wusueka nkhailu wumvana ayi ti kasa wuvua ko nkinza. Mbi mawu matulonga? Yave wuvana Muan’andi muingi kufua mu kibila kitu. Tuidi lufiatu ti Nandi wumbanga mu mayangi bo tu kuntondanga mu luzolo ka tumonisa, mu nkhailu wu khudulu ka tuvana. (Yoa. 3:16; Lom. 5:​7, 8.)Bumviokila thangu, luvalu tummonisanga mu khudulu lulenda dekuka. Ma kumonika, madi buka befu tuntula nkhailu Yave katuvana, va kibuangu kio tulendi ku wumuena ko. Muingi mabika kumonika, tufueti tatamana kuvutulanga matondo mu mambu Yave ayi Yesu ba tuvangila. w25.01 26 ¶1-2

Boti khomba wuntomba kuba nkulutu wu kimvuka, kalendi ba ko mutu wubotimizi vangi. Kheti vasintombulu ko kuviokisa mimvu miwombo tona wubotama, vayi vantombulu kukonzuka mu kiphevi. Ava wuba nkulutu wu kimvuka, ngie fueti monisa dedi Yesu ti widi mutu wu kikululanga ayi wunkuangalalanga mu kiosokua kiyeku wunkuiza tambula mu kimvuka ki Yave. (Mat. 20:23; Fil. 2:​5-8) Mutu wukuikama wunzingilanga mu phila yinkuangidika Yave ayi wunlandakananga zithuadusulu ba tuvananga mu nzila kimvuka kiandi. Kibibila kintuba ti mutu wuntomba kutambula kiyeku kafueti ba mutu zebi kulonga. Mawu mansundula ti nandi kafueti ba mutu wupisuka mu kulonga? Ndamba. Kheti bakulutu bawombo basi ko bapisuka mu kulonga, vayi badi bapisuka mu kisalu ki kusamuna ayi mu kisalu ki kukindisa zikhomba. w24.11 23-24 ¶14-15

Ngie kukhambu visa buboti mambu wunlonguka mu Kibibila, buela fiongunina mawu ayi mona mbi mawu mantuba matedi Yave, Muan’andi ayi luzolo bawu badi mu ngiewu. (Minku. 119:97) Bika kuba mu kiunda boti wisimbakula ko diambu dimona kadika khumbu wuntanga Kibibila voti bo wumvanga ndongukulu’aku. Tebuka moyo ti ngie widi buka mutu wunsikanga wola. Mu mvibudulu batu abobo bamviokisanga bilokula voti bilumbu biwombo muingi kubakula kheti nkadu wola, kibila nkinza beni yidi kuidi bawu. Kiedika ki Kibibila kilutidi nkinza ke na wola! (Zinga. 8:10) Diawu ba mvibudulu ayi tatamana kulandakana thuadusulu’aku yi matangu ma Kibibila.—Minku. 1:2. w25.01 25 ¶14-15

Yave wuntomba tuba bakubama muingi kulemvukilanga bankaka. (Minku. 86:5; Luk. 17:4; Efe. 4:32) Befu tulenda ba mu kiunda boti mutu wuntuba ove wumvanga diambu di tunyongisa. Bulutidi boti mutu beni widi musi dikanda ditu voti nkundi wufikama. (Minku. 55:​12-14) Khumbu zinkaka, kiunda tummona kilenda dedakana buka befu banlueka mu mbedi. (Zinga. 12:18) Mvandi Khumbu zinkaka tulenda lenza, voti kusueka mabanza mitu. Kuvanga mawu kuidi buka mutu babe lueka mu mbedi ayi wumbika mbedi beni yitatamana va mbeza. Bobuawu mvandi, yisi ko mbonosono yi nduenga kuyindula ti mabanza mitu mankuiza vioka mu ku malenza voti kusueka mawu. Bo mutu ka tulueka ntima, va thonono, tulenda ba mu nganzi. Kibibila kintuba ti thangu zinkaka befu tulenda ba mu nganzi, vayi kiawu ki tulubula tuba keba keba muingi yawu yibika ku tutuadisa. (Minku. 4:4; Efe. 4:26) Kibila mbi? Kibila nganzi yilenda ku tunata kuvanga mambu makhambu fuana. (Tia. 1:20) Tebuka moyo ti khumbu zinkaka befu boso tulenda ba mu nganzi, vayi kutatamana mu nganzi madi makani ma kadika mutu. w25.02 15 ¶4-6

Yesu wulubula ntambu wu kutomba zimbongo ziwombo vayi mu khambu ba busina “va mesu ma Nzambi.” (Luk. 12:​16-21) Vasi ko mutu kalenda zaba mambu mala monika yono. (Zinga. 23:​4, 5; Tia. 4:​13-15) Befu boso tumviokilanga mu mambu mawombo maphasi. Yesu wutuba ti tufueti ba bakubama muingi kubika biabioso ayi kuba nlandikini’andi. (Luk. 14:33) Baklistu ku Yuda babika biabioso mu mayangi. (Ebe. 10:34) Mu bilumbu bitu, zikhomba ziwombo babika bisalu ayi biuma biawu, kibila babasa tomba ko kukota mu mambu ma pulitika. (Nzai. 13:​16, 17) Mbi bi basadisa? Kuba lufiatu mu lukanu lu Yave luntuba: “Minu Yalasa kubika ko ayi yalasa kukuekula ko.” (Ebe. 13:5.) Tumvanganga mamoso tunnunga muingi tuba bakubama mu mambu mankuiza kuntuala. Vayi bo mambu ma kinzimbukila mammonika, tumfiatilanga mu Yave. w25.03 29 ¶13-14

Yave kasintomba ko tuyonzuka mu kiphevi mu mangolo mitu veka. Batu nandi kavana kiyeku ki kusunga ayi kulonga mu kimvuka, bake bakubama muingi kutusadisa kuba ‘bayonzuka’ mu kiphevi. (Efe. 4:​11-13) Mvandi, Yave wutu vananga phevi’andi yinlongo yi tusadisanga kuba “mayindu ma Klistu.” (1 Ko. 2:​14-16) Mvandi, Yave wutuadisa muingi basonika zibuku zinna zintubila luzingu lu Yesu, muingi kutu monisa, buidi Yesu kaba yindudilanga, kaba tubilanga ayi mambu kaba vanganga bo kaba va ntoto. Ngie kulandakana phila Yesu kaba yindudilanga ayi kaba vangilanga mambu, ngie wulenda ba mutu wuyonzuka mu kiphevi. Vayi muingi mutu kayonzuka mu kiphevi, kafueti bika to kulongukanga “malongi matheti matedi Klistu”, voti mambu matheti mutu kanlongukanga bo kantona kulonguka Kibibila. w24.04 4-5 ¶11-12

Kadika kilumbu befu tumbakanga makani. Mankaka masiko phasi mu kubaka. Dedi, kio tundia vameni voti bo tukue lala. Makani mankaka madi beni phasi mu kubaka. Kibila malenda tuadisa ziphasi kuidi batu tunzolanga, buvinya buitu, mayangi mitu voti mbuongimin’itu. Befu tuntomba makani mitu matuadisa ndandu kuidi befu veka ayi kuidi dikanda ditu. Bulutidi mayangidika Yave. (Lom. 12:​1, 2.) Diambu dinkinza fueti vanga muingi kubaka makani mamboti didi, kubaka bivisa bioso. Kibila mbi didi diambu dinkinza kuvanga mawu? Yindula mutu widi kimbevo kingolo wunkuenda kuidi dotoli. Bukiedika ti dotoli wunkuiza baka makani ma mbukulu, ava theti kufiongunina buboti mbevo voti kumvana biuvu muingi kuzaba buidi kammuenanga? Bukiedika ti ndamba. Ngie mvaku wunkuiza baka makani mamboti ngie kufiongunina theti bivisa bioso. Buidi wulenda vangila mawu? w25.01 14 ¶1-3

Bukiedika ti Yave wumonanga batu kiadi? Buidi kamana monisina ti ‘kasintomba ko ni mutu kabungu’? (2 Pet. 3:9) Tala phila Yave kamonisina kiadi batu bavola masumu mangolo mu thangu yikhulu. Dedi Ntinu Davidi, wuvola masumu mangolo, mu kuvanga kiphinga ayi kuvondisa mutu. Vayi bo Davidi kanyongina masumu mandi, Yave wummona kiadi ayi wunlevukila. (2 Samu. 12:​1-12) Ntinu Manase wuba mavanga mawombo mambi. Vayi kheti mu mambu moso mambi kavanga, bo kanyongina masumu mandi, Yave wummona kiadi ayi wunlemvukila. (2 Lusa. 33:​9-16) Bifuani abiobio bi tutebula moyo ti, Yave wummonanga batu kiadi na kumona ti, vadi kibila ki kuvangila mawu. Nandi wala vulubusa batu abobo, kibila kheti bavola masumu mangolo bawu banyongina mawu. w24.05 4 ¶12