LIJIGANYO 82
Yesu Akwajiganya Ŵakulijiganya Ŵakwe Kapopele
Afalisi ŵagambaga kutenda yindu pakusaka kuti ŵandu agambeje kwalapilila. Naga atesile cindu cambone, ŵasakaga ŵandu amanyilile yeleyo. Jemanjaji ŵapopelaga pelanga ni cakulinga cakuti ŵandu ŵawoneje. Pakusaka kuti ŵane ŵapikanileje, Afalisiŵa ŵajinjisyaga pamtima mapopelo gelewulewu nikugawilisyaga pali m’nyumba syakupopelela soni m’misewu. M’yoyo ŵandu ŵasimonjile ni yaŵasasile Yesu kuti, ‘Akapopelaga mpela Afalisi. Jemanjajo akusaganisya kuti Mlungu akusasangalala ni winji wa maloŵe pakupopela, nambo ngaŵa m’yoyo. Lipopelo lili pasikati pa mmwejo ni Yehofa. M’yoyo mkasim’ŵecetaga cindu cicoco mwakuwilisyawilisya. Yehofa akusasaka kuti mumsalileje mwamkupikanila mumtima.
“Nambo jemanja mpopeleje camti m’yi, ‘Atati ŵetu ŵakwinani, lina lyawo liswejesyedwe. Ucimwene wawo uyice. Lisosa lyawo litendekwe pacilambo capasi, mpela kwinani.’” Yesu ŵasalilesoni kuti aŵendeje cakulya capalisikulyo, soni kuti yakulemwa yawo yikululucidwe nambosoni apopeleleje yindu yine ya paumi wawo.
Yesu jwatite, ‘Mkasimleka kupopela. Mjendelecele kwaŵenda Atati ŵenu Yehofa yindu yambone. Nangolo jwalijose akusasaka kumpa mwanace jwakwe yindu yambone. Naga mwanagwenu akuŵenda mkate, ana mpaka mumpe liganga? Nambi naga ali aŵendile somba, ana mpaka mumpe lijoka?’
Kaneko Yesu ŵatagulile yatukulijiganya pacisyasyoci kuti, ‘Naga jemanja akumanyilila kupeleka mituka jambone kwa ŵanace ŵawo, kuliwuli Atati ŵenu Yehofa, ana jwalakwe ngasapakombola kumpa msimu weswela? Akusosekwa ajendeleceleje kuŵenda.’ Ana mkusakuya yaŵaŵecete Yesuyi? Ana mkusanonyela kupopelela ngani syapi?
“Ajendelecele kuŵenda, ni tacipocela, ajendelecele kusosasosa, ni tacipata, ajendelecele kupoposya, ni tacawugulila.”—Matayo 7:7