Yesu Akulisya Ŵandu Ŵajinji

Cindimba ca Pasaka jwa m’caka ca 32 C.E. cili cisigele panandi kutendekwa, ŵandumetume ŵa Yesu ŵawusile ku ulendo wawo wakulalicila. Jemanjaji ŵapesile, m’yoyo pakusaka kuti akapumule, Yesu ŵajigele paliboti ni kwawula nawo ku Betisaida. Nambo liboti lila lili liŵandicile mungulugulu nyasa, Yesu ŵayiweni kuti ŵandu ŵajinji amkuyiye kumalo gaŵajawulagago. Atamose kuti Yesu ni ŵandumetume ŵakwe ŵasakaga kuti aŵe kwajika, nambope jwalakwe ŵapocele ŵanduwo ni makono gaŵili. Jwalakwe ŵaposisye ŵakulwala soni ŵatandite kwajiganya ŵanduwo. Kwalisiku lyosope, Yesu ŵajigenye ŵanduwo yakwamba Ucimwene wa Mlungu. Pakwaswele, ŵandumetume ŵakwe ŵayice kwa jwalakwe ni ŵatite, ‘Ŵanduŵa jakwete sala. Ŵasalile kuti ajawuleje akapate cakulya.’

Nambo Yesu ŵatite, ‘Jemanjaji ngakusosekwa kwawula. Mkusosekwa kwapa yakulya.’ Ni ŵandumetumewo ŵam’wusisye jwalakwe kuti, ‘Ana akusaka kuti tujawule tukasume yakulya ya ŵanduŵa?’ Nambo Filipo, jumo jwa ŵandumetumewo jwatite, ‘Atamose tukakole mbiya syejinji, nganituŵa tukombwele kusuma yakulya yakwanila likuga lyosopeli.’

Yesu ŵawusisye kuti, ‘Ana tukwete yakulya yejinji camtuli?’ Andileya jwajanjile kuti, ‘Tukwete mikate msano ni tusomba tuŵili twamwana, yeleyi ngaŵa mkwanila atapanandi.’ Yesu ŵatite, ‘Myice najo mikate ni sombasyo.’ Kaneko jwalakwe ŵasalile ŵandu ŵala kuti atame pamanyasi m’makuga ga ŵandu 50 ni 100. Yesu ŵajigele mikate ni somba sila, ni ŵalolite kwinani ni kupopela. Kaneko ŵayipelece yakulya yila kwa ŵandumetume ŵala. Jemanjajo ŵagaŵanye ŵandu yakulyayo. Acalume ŵakwana 5,000 soni acakongwe ni ŵanace ŵakwe ŵalile ni kwikuta. Pambesi pakwe ŵandumetume ŵala ŵalokotele sigasiga kuti pakasimanikwa yakwasika. Sigasigasyo syagumbele ngalala 12. Yeleyitu yaliji yakusimonjesya, ngati m’yoyo?

Ŵanduwo ŵasangalele mwamti ŵasakaga kuti Yesu aŵe mwenye jwawo. Nambo Yesu ŵamanyililaga kuti nganijiŵa ndaŵi jakuŵajilwa kwa Yehofa jakuti jwalakwe aŵe mwenye. M’yoyo ŵasalile ŵanduwo kuti ajawuleje kaneko ŵasalile ŵandumetume ŵakwe kuti ajawule mbali jine ja nyasa ja Galileya. Ŵandumetumewo ŵakwesile liboti lyawo ni kwawulaga, nambo Yesu ŵapite kwitumbi kwajika. Ligongo cici Yesu ŵapite kwitumbi? Jwalakwe ŵasakaga kuti akapopele kwa Atatigwe. Mwangasamala kandu kuti ŵakwete yakutenda yejinji, nambo ndaŵi syosope Yesu ŵapataga ndaŵi jakupopela.