Ana Baibulo Mpaka Jakamuchisye Naga Akulwala Ulwele Wekulungwa?

Kwanga kwakutyochela m’Baibulo

Elo. Mlungu akusiŵasamalilaga ŵakutumichila ŵakwe ŵakulwala. Pakwamba ya jwakutumichila jwa Mlungu jwakulupichika, Baibulo jikusasala kuti, “AMBUJE tachimkamuchisya mundujo achilwalaga.” (Salimo 41:3) Naga akulwala ulwele wekulungwa, yindu yitatu yakuyichisyayi mpaka yakamuchisye:

1. Apopeleje kwa Mlungu kuti ŵape machili gakupilila. Mpaka apochele “Mtendele wa Mlungu, wele wuli wakupunda umanyilisi wosope wa ŵandu.” Mtendelewu mpaka wakamuchisye kupitilisya kupilila atamose kuti akusimana ni yakusawusya.​—Afilipi 4:6, 7.

2. Akagambaga kudandawula. Baibulo jikusasala kuti, “Mtima wakusangalala uli mtela wambone pa umi wa mundu, nambo mtima wa agasabu ukusajumusya chilu.” (Misyungu 17:22) Alinjeje kuseka kapena kuŵechetaga tungani twakusekasya. Yeleyi mpaka yakamuchisye kuti akalagaga mnope ni ulwelewo.

3. Akulupilileje yachachitenda Mlungu kusogolo. Kwembecheya yindu yambone yakusogolo, mpaka kwakamuchisye kuti aŵeje ŵakusangalala atamose kuti akulwala ulwele wekulungwa. (Aloma 12:12) Baibulo jikusasala ya ndaŵi jele “pangali atamose jumo mchilambomo jutachiŵecheta kuti, ‘Une ngulwala.’” (Yesaya 33:24) Mlungu tachimasya yilwele yosope yayikuwoneka kuŵa yangali mtela. Mlungu akwete machili kwapunda ŵasayansi ŵamasiku aganoŵa. Mwachisyasyo, pakusala yayichatendechela ŵakalambale Baibulo jikusati, “Chilu chakwe chisuche mpela cha mchanda. Soni aŵe jwamachili mpela pa ndaŵi jiŵaliji mchanda.”​—Yobu 33:25.

Amanyilile ayi: Ŵa Mboni sya Yehofa akusamanyililaga kuti Mlungu akusiŵakamuchisyaga ŵandu ŵakulwala. Nambope jemanjaji akusapochela chikamuchisyo cha mtela palwasile. (Maliko 2:17) Jwalijose akusosekwa kulisagulila jika yakusaka pachikamuchisyo cha mtela. M’weji ngaŵa kuti tukusitwalimbikasya ŵandu kupochela chikamuchisyo chinechakwe cha mtela.