Ana Malo Gakunguluchila ga pa Intaneti Gakumsokonasya Mwanache Jwawo?—Ana Baibulo Mpaka Jakamuchisye Chamti Uli Achinangolo?

Dokotola jwamkulungwa jwa maopaleshoni jwa ku America lina lyakwe Dr. Vivek Murthy jwasasile kuti, “Ŵachinyamata ŵajinji akusokonechela nganisyo ligongo lya malo gakunguluchila ga pa intaneti.’’ New York Times, Juni 17, 2024.

Ana achinangolo mpaka ŵachenjele chamtuli ŵanache ŵawo kuyindu yakogoya yayikusayika ligongo lyakamulichisya masengo malo gakunguluchila ga pa intaneti? Baibulo jikwete malangiso gakamuchisya.

Yampaka atende achinangolo

Aganichisye mfundo sya m’Baibulo syakuyichisyasi.

“Mundu jwakalamuka akusalolechesya mwakwendela”—Misyungu 14:15.

Patukuganichisya yakuyichisya yayikusayika ligongo lya kamulichisya masengo malo gakunguluchila ga pa intaneti, akamtendekasyaga mwanache jwawo kuti akamulichisyeje masengo maloga. Mkanaŵe kumkunda mwanache jwawo kukamulichisya masengo malo gakunguluchila ga pa intaneti, asimichisyeje kaje naga jwalakwe mpaka akombole kukuya malamusi gaŵamŵichile soni ulewu wachaŵeje ali pa intaneti. Nambosoni kuti jwalakwe chasaguleje achimjakwe ŵambone soni kuŵambala kulola yindu yangalondeka

• Kuti amanyilile yejinji aŵalanje ngani ja Chichewa jakuti “Kodi Mwana Wanga Azigwiritsa Ntchito Intaneti?” soni jakuti “Kwakamuchisya Ŵachinyamata Kukamulichisya Masengo Mwakuŵajilwa Malo Gakunguluchila ga pa Intaneti .”

“Mkamulichisyeje masengo chenene ndaŵi jenu.”—Aefeso 5:16.

Naga amkundile mwanache jwawo kuti akamulichisyeje masengo intaneti, amŵichileje malamusi gakuti agakuyeje soni amsalileje yampaka gajile malamusigo pakumchenjela. Atendeje chidwi ni yindu yakutenda mwanache jwawojo. Naga atandite ndamo ja chilendo mpaka yilosye kuti ngakusosekwa kuti amalileje ndaŵi jejinji ali pa intaneti.

• Akamulichisye masengo ka fidiyo ka mtwe wakuti Akamulicisyeje Masengo Mwalunda Malo Gakungulucila ga pa Intaneti pambali jakuti mafidiyo ga yakwambula ya pa bolodi pakumkamuchisya mwanache jwawo.

Alijiganye yejinji

Baibulo jikusasala kuti tukutama “mundaŵi jakusawusya soni jakogoya.” (2 Timoteyo 3:1-5) Nambosoni jikusapeleka malangiso gakutukamuchisya kumalana ni yakusawusyayi. Pana ngani syakupunda 20 syasikusapeleka malangiso gakutyochela m’Baibulo syakwakamuchisya achinangolo soni ŵanache ŵawo. Nganisi sikusimanikwa pangani ja mtwe wakuti ulwele ŵakulagasika nganisyo.