Ana Yindu Yachinyengo Yayikutendekwa M’Boma Yichimala?

Pachilambo chosope chapasi, pana chakusawusya chakuti achakulungwakulungwa ŵajinji ŵa boma akusatendaga yachinyengo.a (Ŵane akusati yipupu kapena kuti katangale.) Yeleyi yikusatendekasyaga kuti ŵandu ŵajinji alajeje mnope. Mwachisyasyo, mu ndaŵi ja mlili wa COVID-19 achakulungwakulungwa ŵa boma m’yilambo yine akwajimba magambo ligongo lya kulya mbiya sya boma. Chakulinga cha mbiyasi chaliji chakuti sikamuchisye pakulimbana ni mlili wa COVID-19. Yeleyi yitendekasisye kuti ŵandu akapata chikamuchisyo cha kuchipatala chiŵasosechelaga. Yakuyichisya yakwe ŵandu ŵajinji alasile mnope ni ulwelewu soni kuwa.

Yindu yachinyengo yayikusatendekwaga m’boma yikusatendekasyaga kuti yindu yejinji yikajendaga chenene. Mwamti nduna jekulungwa jakala m’chilambo cha United Kingdom Che David Cameron ŵatite, “Chinyengo chili mpela chitega chachikamwile ŵandu ŵajinji m’yilambo yosope.”

Nambope ngatukukayichila kuti yindu yosope yachinyengo yayikutendekwa m’boma yichimala. Ligongo chichi tukuŵecheta yeleyi? Kwende tulole yajikusasalaga Baibulo yachachitenda Mlungu.

Ana tukusamanyilila chamtuli kuti Mlungu chachimasya yachinyengo?

Kupitila m’Baibulo Mlungu jwasasile kuti: “Une AMBUJE ngusanonyela chilungamo, ngusaŵengana ni yawiyi ni yakusakala.”b (Yesaya 61:8) Ŵandu pakulaga ligongo lya chinyengo chakutenda ŵane, Mlungu akusamanyililaga. (Misyungu 14:31) Ni ligongo lyakwe jwalakwe jwasasile kuti: “Ligongo lyakuti ŵakulaga ŵasumwile yindu yawo [“mwachinyengo,” NWT],  . . Tindendepo kandu sambano.”—Salimo 12:5.

Ana Mlungu chachitenda yindu yamtuli? M’malo mwakuchenga ma boma ga ŵanduga kuti yindu yijendeje chenene, jwalakwe chachigamba kugatyosya ni kutamilikasya boma jakwinani jakolanjidwa kuti “Uchimwene wa Mlungu.” (Maliko 1:14, 15; Mateyu 6:10) Ni ligongo lyakwe Baibulo jikusati: “Mlungu jwakwinani tachitamilisya uchimwene wele ngisiwujonasika. Tiwuchikasanya nikugamasya ma uchimwene gane gosopego, nipo uchimwene welewo pewo tiwuchiŵa mpaka kalakala.” (Daniele 2:44) Yeleyitu ni yachachitenda Mlungu pakumasya yindu yachinyengo yayikutendekwa masiku agano.

Boma ja Mlungu ngasijitendega yindu yachinyengo

Ana tukumanyilila chamtuli kuti Uchimwene wa Mlungu ngasiwutendaga yachinyengo? Alole maumboni gakuyichisyaga.

1. 1. Jikwete Machili. Machili ga Uchimwenewu gakusatyochela kwa Mlungu Jwamachiligose.—Chiwunukuko 11:15.

   Umbone wakwe: Pakusaka kuti maboma ga ŵandu gajendeje chenene, mabomago gakusapataga mbiya kutyochela kwa ŵandu ŵawo. Mwamti yikusatendekasya kuti ŵandu apelecheje chapasyepela, ajiŵeje soni kusokonasyana. Mwakulekangana ni yeleyi, Mlungu Jwamachiligose chachiwukamuchisyaga Uchimwene wakwe. Yeleyi yichikamuchisya kuti Uchimwene wapeje ŵandu yiliyose yakusosechela.—Salimo 145:16.

2. 2. Jwakulamulila. Mlungu asagwile Yesu Klistu kuŵa Mwenye jwa Uchimwene wakwe.—Daniele 7:13, 14.

   Umbone wakwe: Atamose ŵakulamulila ŵa boma aŵe ŵambone, nambope ŵandu ŵane mpaka ŵatendekasye kuti atendeje yakusakala. (Jwakulalichila 7:20) Mwakulekangana ni yeleyi, pangali mundu jwampaka amtendekasye Yesu kutenda yachinyengo. (Mateyu 4:8-11) Konjechesya pelepa, Yesu ali jwakulamulila jwambone ligongo lyakuti akusiŵanonyelaga ŵandu yisyesyene soni ali jwakusachilila kuti ŵanduwo aŵeje pambone.—Salimo 72:12-14.

3. 3. Malamusi gakwe. Malamusi ga Uchimwene wa Mlungu gali gambone mnope soni gakusigakamuchisyaga ŵandu kuŵa ŵakusangalala.—Salimo 19:7, 8.

   Umbone wakwe: Malamusi ga ŵandu, ndaŵi syejinji gakusaŵaga gakusawusya. Konjechesya pelepa, maboma ndaŵi sine gakusatendaga yakulemwecheka pakusaka kuti ŵandu ŵawo apikanileje malamusi. Yeleyi yikusatendekasyaga kuti ŵandu atende kutenda yindu yachinyengo. Mwakulekangana ni yeleyi, malamusi ga Mlungu gali gangasawusya kugakuya soni gakusatukamuchisya kuti yindu yitujendeleje chenene. (Yesaya 48:17, 18) Konjechesya pelepa, malamusiga gakusakumuchisyaga kuti ŵandu atendeje yindu yakuŵajilwa soni kola mtima wambone. (Mateyu 22:37, 39) Kusala yisyene Mlungu akusatumanyilila chenene mwamti akusatukamuchisya mwachinonyelo kuti tupikanileje malamusi gakwe.—Yelemiya 17:10.

Tukwaŵenda kuti alijiganye yejinji yajikusasala Baibulo yakwamba boma ja Mlungu jangali chinyengo.

• Aŵalanje ngani jakuti “Ucimwene wa Mlungu—Uli Boma Jangali Katangale” kuti amanyilile magongo gatatu gakutendekasya kuti Uchimwene wa Mlungu uŵe wangali yachinyengo.

• Alolele fidiyo ja mtwe wakuti “Ana Ucimwene wa Mlungu Uli Cici” kuti alijiganye yejinji yakwamba Uchimwenewu soni yauchitenda pachilambo chapasi.

• Alijiganye Baibulo mwakambilana kwalulele kuti alole mwampaka yakulochesya ya M’Baibulo yakamuchisye wawojo.