Asilikali ŵa Chilambo cha Russia Ajinjile m’Chilambo cha Ukraine Kukuputa Ngondo

Kundaŵi kwa pa Febuluwale 24, 2022, Asilikali ŵa chilambo cha Russia ŵajinjile m’chilambo cha Ukraine kuputa ngondo. Jemanjaji ŵatesile yeleyi atamose kuti ŵakulamulila ŵa yilambo yejinji ŵatesile yampaka akombole kuti yeleyi yikatendekwa. Nambo ana yeleyi chiyikwaye chamtuli chilambo chosope chapasi? Mlembi jwamkulungwa jwa bungwe ja United Nations, Che António Guterres, masiku gapitega jwaŵechete kuti: “Ngondo jeleji chijiyikasye yakusawusya mnope, nambosoni chijitendekasye kuti yindu yejinji yijonasiche, chijisokonasyesoni chiteteyo cha yilambo ya ku Europe soni atamose pachilambo chosope.”

Ana Baibulo jasasile yamtuli yakwayana ni ngani syelesi?

• Yesu Klistu jwasasile kuti “mitundu ja ŵandu jakulekanganalekangana tijichimenyana ngondo soni uchimwene tiwuchijimuchilana ni uchimwene ujakwe.” (Mateyu 24:7) Aŵalanje ngani jakuti “Kodi Chizindikiro cha “Masiku Otsiriza” Kapena Kuti ‘Nthawi ya Mapeto’ N’chiyani?” kuti amanyilile mwajikusati Baibulo kulosya kuti ngondo syasikutendekwa masiku agano sikwanilisya yakulochesya yaŵasasile Yesu.

• Buku ja m’Baibulo ja Chiwunukuko, jikusalondesya ya ngondo mpela mundu jwakwesile pa ‘hachi jechejewu,’ soni jwalakwe ‘akutyosya mtendele pachilambo chapasi.’ (Chiwunukuko 6:4, NWT) Aŵalanje ngani jamtwe wakuti “Ana Acalume Mcece Ŵakwesile Mahaci Ali Ŵani Soni Akwimila Cici?” kuti alole kukamulana kwa yakulochesyayi ni ngondo syasikutendekwa masiku agano.

• Buku ja m’Baibulo ja Daniele jasasile mkanipaŵe ya ukangani wa pasikati pa “mwenye jwa kumpoto” soni “mwenye jwa kummwela.” (Daniele 11:25-45) Alolele fidiyo jamtwe wakuti Kukwanilichikwa kwa Chakulochesya cha pa Daniele Chaputala 11 kuti amanyilile ligongo lyakwe mpaka tujile kuti chilambo cha Russia soni yilambo yayikusakamulana nacho ni wakwimila mwenye jwa kumpoto.a

• Buku ja Chiwunukuko jikusasalasoni ya “ngondo ja pa lisiku lyekulungwa lya Mlungu Jwamachiligosope.” (Chiwunukuko 16:14, 16) Nambo ngondo jeleji nganijiŵa ngondo jakuputana yilambo mpela jajikutendekwaji. Aŵalanje ngani jamtwe wakuti, “Ana Ngondo ja Alimagedo ni Chichi?” kuti amanyilile yejinji yakwamba ngondo jajichitendekwa kusogoloji.

Ana ligongo chichi ngakusosekwa kukayichila kuti yindu yichiŵasoni chenene kusogoloku?

• Baibulo jikusati Mlungu “akulekasya ngondo mpaka kumbesi kwa chilambo chapasi.” (Salimo 46:9) Aŵalanje ngani jamtwe wakuti “Chembecheyo Chisyesyene Chikusatukamuchisya Kola Sogolo Jambone” kuti amanyilile yasasile Mlungu kuti chayitende kusogoloku.

• Yesu ŵasalile ŵakumkuya ŵakwe kuti apopeleje kuti Uchimwene wa Mlungu uyiche. (Mateyu 6:9, 10) Uchimwene welewutu uli boma jakwinani jajichitendekasya kuti yakusaka ya Mlungu yakwayana ni chilambo chapasi yitendekwe. Chimo mwa yindu yakusaka Mlungu chili chakuti, pachilambo chosope chapasi paŵe mtendele. Kuti amanyilile mwawuchitukamuchisya Uchimwenewu, alolele fidiyo jakuti “Ana Ucimwene wa Mlungu Uli Cici?

M’chilambo cha Ukraine mwana ŵa Mboni sya Yehofa ŵakupunda 129,000. Mwakulandana ni ŵamboni ŵali m’yilambo yine, jemanjajisoni akusamkuyaga Yesu, mwamti ŵangatendaga ya ndale soni kujigala nawo mbali mu ngondo. (Yohane 18:36) Ŵa Mboni sya Yehofa akupitilisya kulalichila “ngani syambone syakwamba Uchimwene wa Mlungu” pachilambo chosope chapasi. Sonitu Uchimwenewu ni wawuchimasya yakusawusya ya ŵandu pachilambopa kupwatikaposoni ngondo. (Mateyu 24:14) Tukwaŵenda kuti ŵawusye ŵa Mboni sya Yehofa kuti amanyilile yindu yejinji yajikusasalaga Baibulo yakwayana yindu yambone yatukwembecheya kusogoluku.