Ana Baibulo Jikusasala Yamtuli Pangani Jakutamila Malo Gamo Ŵandu Ŵanganalombana?

Kwanga kwakutyochela m’Baibulo

Baibulo jikusasala kuti chakulinga cha Mlungu kwa ŵandu chili chakuti, ‘aligosyeje ku chikululu.’ (1 Atesalonika 4:3) M’Baibulo liloŵe lyakuti “chikululu” likusapwatikapo yejinji. Yine mwa yeleyi yili, naga mundu akwaleka ŵamkwakwe ni kuja kutamila malo gamo ni mundu jwine, kutamila malo gamo kwa achalumepe kapena achakongwepe, soni kutamila malo gamo kwa mnyamata ni msikana ŵanganalombana.

Ligongo chichi Mlungu akusasaka kuti jwamlume ni jwamkongwe alombaneje naga akusaka kutamila malo gamo?

Mlungu ni juŵalinganyisye yakuti ŵandu alombaneje. Yehofa jwatandisye liŵasa pandaŵi jele ŵampeleche Hawa kwa Adamu. (Genesesi 2:22-24) Nganichiŵa chakulinga chakwe kuti jwamlume ni jwamkongwe atamileje malo gamo mkanalombane.
Mlungu akusamanyilila yindu yampaka yakamuchisye ŵandu. Jwalakwe ŵapanganyisye ulombela ni chakulinga chakuti jwamlume ni jwamkongwe ŵalombanewo, atameje mwakamulana kwa umi wawo wosope. Mlungu jwamanyililaga kuti kutenda yeleyi chikukamuchisye soni kwachenjela ŵamwiŵasa. Aganichisye chisyasyo achi. Kampani pajipanganyisye yindu jikusapeleka kabuku kakola malangiso gampaka mundu akuye pakusaka kukamulichisya masengo chindu chawocho. Myoyo nombe najo Mlungu akusatupaga malangiso gampaka gatukamuchisye kuti tukole liŵasa lyakusangalala. Malangiso ga Mlunguga, ndaŵi syosope gakusakamuchisya ŵandu ŵakugakuya.—Yesaya 48:17, 18.

Kampani pajipanganyisye yindu, jikusapeleka kabuku kakola malangiso gampaka mundu akuye, pakusaka kukamulichisya masengo chindu chawocho. Myoyo nombe najo Mlungu akusatupaga malangiso gampaka gatukamuchisye kuti tukole liŵasa lyakusangalala
Kutamila malo gamo ni mundu jwanganulombana najo mpaka kukole yakuyichisya yakogoya. Mwachisyasyo mundu mpaka ajigale chitumbo cha petinji, yilwele yakupelegana soni akusalagasika nganisyo.a
Mlungu ŵampanganyisye jwamlume ni jwamkongwe kuti akomboleje kuŵeleka ŵanache patamile pa malo gamo. Mlungu akusawuwona umi wa mundu kuŵa wakusosekwa mnope soni kuŵeleka uli mtuka wapenani. Mlungu akusasaka kuti tutendeje yindu yakuwuchimbichisya mtukawu. Mpaka tutende yeleyi mwakuchimbichisya yaŵalinganyisye Mlungu yakuti ŵandu alombaneje.—Ahebeli 13:4.

Ana ŵandu ŵangalombana akusosekwa kutamila malo gamo pakusaka kumanyilila naga ali ŵakuŵajilana?

Kuti tukole liŵasa lyakusangalala ngayikudalila kuti ŵanduwo atamile kaje malo gamo pakusaka kumanyiganya chenene. Mmalo mwakwe, kuti tukole liŵasa lyakusangalala jwalijose akusosekwa kuŵa jwakulupichika kwa mjakwe soni kuŵa ŵakamulana pakumasya yakusawusya.b Ulombela ukusalimbaga naga wosope ali ŵakulupichika.—Mateyu 19:6.

Ana ŵalombane mpaka atende yamtuli kuti ulombela wawo uŵe wakulimba?

Liŵasa lililyose likusasimana ni yakusawusya. Myoyo ŵalombane, mpaka akole liŵasa lyakulimba naga akukamulichisya masengo malangiso gakusimanikwa m’Baibulo. Gane mwa malangisoga gali aga:

Akagambaga kulisosela yakusaka yawo, nambosoni aganichisyeje ya mjawojo.—1 Akolinto 7:3-5; Afilipi 2:3, 4.
Alosyaneje chinonyelo soni kuchimbichisyana.—Aefeso 5:25, 33.
Aŵeje ŵakusamala pakaŵechete kawo.—Misyungu 12:18.
Aŵeje ŵakuwusimana mtima soni ŵachitema kwakululuchila ajawowo.—Akolose 3:13, 14.

a Alole ngani m’kabuku kakuti Kwanga kwa Yiwusyo 10 Yakusaliwusya Ŵachinyamata pamtwe wakuti, “Ana Mpaka Ndende Wuli Naga Mundu Akunganganichisya Kuti Ngone Najo?”

b Alole mtwe wakuti, “Yakamuchisya Maŵasa Kuŵa Gakusangalala—Aŵeje Ŵakulipeleka mu Ulombela.”