Aŵeje Ŵakulupichika Chikulupi Chawo Pachikulinjidwa

1-2. Ana chatendekwe chichi pandaŵi jele Yesu ŵajiganyaga ku Kapelenawo?

LISIKU line, Yesu ŵajiganyaga ŵandu ŵajinji ku Kapelenawo. Jwalakwe ŵasalile kuti: “Naga ngamkulya chilu cha Mwanache jwa mundu soni kumwa myasi jakwe, ngasimpata umi.” Jwalakwe jwapitilisye kuti: “Jwalijose jwakulya chilu changu soni kumwa myasi jangu chachikola umi wangamala, soni une chinjimjimusya ku chiwa pa lisiku lyakumalisya.”(Yoh. 6:​53, 54) Ŵakulijiganya ŵakwe ŵajinji nganasangalala ni yaŵaŵecheteyi mwamti ŵatite: “Maloŵe gelega gali gakusokonasya. Ŵani ŵampaka apikanile yeleyi?”—Yoh. 6:60.

² Ŵandu ŵaŵatengwiche ni maloŵe ga Yesuga ŵalesile kumkuya jwalakwe. Ana ŵatesile yeleyi ligongo lyakuti nganamkulupililaga? Yikuwoneka kuti yeleyi mkaniyitendekwe, ŵandu ŵane kupwatikapo ŵakulijiganya ŵa Yesu ŵamkulupililaga jwalakwe. Jemanjaji paŵayiweni yaŵatesile Yesu ŵayikene pakuŵecheta kuti: “Nditu jweleju ali Jwakulochesya juŵamsasile kuti chachiyika pachilambo.” (Yoh. 6:14) Yeleyi yikulosya kuti ŵakulijiganyaŵa ŵamkulupililaga Yesu. Nambo chikulupi chawo pachalinjidwe nganapitilisya kumkulupilila.

3. Ana ŵandumetume ŵatesile chichi paŵapikene yaŵaŵechete Yesu? Ligongo chichi ŵatesile yeleyi? (Alolesoni chiwulili.)

³ Ŵandumetume ŵa Yesu ŵatesile yindu mwakulekangana ni ŵandu ŵane ŵala. Yesu paŵawusisye naga nombenawo akusaka kumleka, Petulo jwajanjile kuti: “Ambuje, ana mpaka tujawulesoni kwa ŵani? Wawojotu ni ŵakwete maloŵe gakupeleka umi wangamala. M’weji tukukulupilila soni tukumanyilila kuti wawojo ali ŵaswela soni Mlungu ni juŵatumile.” (Yoh. 6:​68, 69) Mpaka ayiwone kuti Petulo nganaŵecheta kuti jwalakwe pampepe ni ŵandumetume ŵane ŵala ŵapikanichisye yaŵagopolelaga Yesu paŵaŵechete kuti akusosekwa kulya chilu chakwe soni kumwa myasi jakwe. Atamose yaliji myoyo, jemanjaji ŵapitilisye kuŵa ŵakulupichika kwa Yesu. Ligongo chichi? Ligongo lyakuti ŵakulupililaga kuti Yesu ali “Klistu jwakutumidwa ni Mlungu.”—Luk. 9:​20, 35.

4. Ana ni yindu yapi yampaka yilinje kulupichika kwetu kwa Yehofa?

⁴ Kulupichika kwetu kwa Yehofa mpaka kulinjidwe m’matala gakulekanganalekangana. Mwachisyasyo, ana tukusatenda wuli naga tulijiganyisye kapikaniche kasambano ka lilemba linelyakwe kapena yatukusosekwa kutenda pa masengo gakulalichila? Ana tukusatenda yamti uli naga yikutusawusya kupikanichisya ligongo lyakwe Yehofa akundile kuti tusimaneje ni yakusawusya? Kulupichika kwetu mpaka kulinjidwesoni naga Mklistu mjetu atukuŵesye kapena mundu jwele twamchimbichisyaga atesile yindu mwangatuganichisya.

5. Ligongo chichi tukusosekwa kulimbisya chikulupi chetu? Asale chisyasyo. (Akolose 1:23)

⁵ Ligongo chichi tukusosekwa kulimbisya chikulupi chetu? Chikulupi chetu mpaka tuchiwanichisye ni nyumba jajitaŵidwe kudela jele kukusanonyela kutendekwa chifomelesi kapena mbepo jamachili. Kuti nyumbaji jikagwa jikusasosekwa kukola fendeshoni jakulimba. Mwakulandana ni yeleyi, tukusasosekwa kukola chikulupi chakulimba kuti tupitilisye kuŵa ŵakulupichika kwa Yehofa patusimene ni yakusawusya mpela yatuyikolasile yila. Naga tukupitilisya kulimbisya chikulupi chetu tuchiŵa ŵakulimbangana, soni ŵakulupichika kwa Yehofa patusimene ni yakusawusya.—1 Akoli. 15:58; aŵalanje Akolose 1:23.

6. Ana ni chichi chachakamuchisye ŵandumetume kupitilisya kuŵa ŵakulupichika kwa Yesu?

⁶ Ana ni chichi chachakamuchisye ŵandumetume kupitilisya kuŵa ŵakulupichika kwa Yesu atamose kuti ŵandu ŵajinji ŵalesile kumkuya jwalakwe? Ŵandumetumeŵa ŵamanyililaga kuti akusosekwa kumtumichila Yehofa ligongo lyakuti ni Juŵapanganyisye yindu yosope, Yesu ali Mwanache jwakwe, soni kuti naga akumpikanila chachipata “umi wangamala.” Konjechesya pelepa, ŵamanyililaga kuti Yehofa akusangalala ni yindu yaŵatendaga Yesu. Sambano, mmalo mwakukambilana yindu yejinji yampaka yilinje chikulupi chetu, kwende tukambilane yindu yitatu yampaka yitukamuchisye kuti tupitilisye kuŵa ŵakulupichika kwa Yehofa chikulupi chetu pachikulinjidwa. Yindu yakwe yili kumanyilila kuti: (1) Yehofa ni juŵapanganyisye yindu yosope. (2) Yehofa ni juŵalongolele ŵandu pakulemba Baibulo. Soni (3) Yehofa akwakamuchisya ŵandu ŵakwe masiku agano. Naga tukupitilisya kukulupilila yindu yitatu yeleyi, tuchipitilisya kuŵa ŵakulupichika kwa Yehofa chikulupi chetu pachilinjidwe.

YEHOFA JWAPANGANYISYE YINDU YOSOPE

7. (a) Ana lilemba lya Chiwunukuko 4:11 likutukumbusya chichi? (b) Ana yeleyi mpaka yitukamuchisye wuli patukusimana ni yakusawusya?

⁷ Aŵalanje Chiwunukuko 4:11. Lilembali likutukumbusya kuti Yehofa ni juŵapanganyisye yindu yosope. Lyeleli lili ligongo lyekulungwa lyakututendekasya kumtumichila jwalakwe. Naga tukuganichisya ya machili gakwe gekulungwa, nganituŵa tukayichile kuti chachitukamuchisya patukusimana ni yakusawusya. Nambope, Satana akusawandisya yindu yaunami yakwatendekasya ŵandu kukulupilila kuti kwangali Mlungu. Mwamti ŵasayansi ŵane ayikene pakuŵecheta kuti pangali juŵapanganyisye yindu yaumi. Myoyo, tukusosekwa tukoleje magongo gakututendekasya kukulupilila kuti Yehofa ni juŵapanganyisye yindu yosope soni kuti akusatunonyela. Yeleyi yichitukamuchisya kuti patusimene ni yakusawusya tukakayichilaga kuti Yehofa apali soni kuti chatukamuchisye.—Aheb. 11:6.

8-9. Ana akusosekwa kutenda chichi naga atandite kukayichila yakuti Yehofa ni juŵapanganyisye yindu yosope? (Alolesoni chiwulili.)

⁸ Naga atandite kukayichila kuti Yehofa ni juŵapanganyisye yindu yosope, akusosekwa kutendapo kandu mwachitema. Awungunye mwakusamala m’mabuku getu kuti apate maumboni gakulosya kuti Yehofa ni juŵapanganyisye yindu yosope. Mpaka apate mfundo syampaka silimbisye chikulupi chawo m’kabuku kakuti Ana Yaumi Yatesile Kupanganyidwa? Soni kakuti Yiwusyo Msano Yakusosekwa Kuliwusya Yakwamba Kuwatyochele Umi. Mpaka apatesoni ngani sine syampaka syakamuchisye pa jw.org pamtwe wakuti “Ana Apali Juŵayipanganyisye.” Mlongo jwachisikana jwa ku United States lina lyakwe Jessica, jwasasile kuti: “Panyuma pakuŵalanga kabuku kakuti Kuwatyochele Umi natandite kukulupilila kuti pana jwinejwakwe juŵapanganyisye yindu yosope. Yisyene kuti yeleyi nayimanyililaga ni kalakose nambo panaŵalasile kabukuka yangamuchisye kuti ngakayichilaga yakuti yindu yosope yapanganyidwe ni Mlungu.” Konjechesya pelepa buku ja Asangalaleje Mpaka Kalakala lijiganyo 6 ni 7 liŵele lili mkwakamuchisya ŵandu ŵajinji. Ngatukukayichila kuti pakwete paŵalasile mabuku gelega. Nambo mpaka atende chenene kugaŵalangasoni.

⁹ Alinje kutenda ayi: Pandaŵi ja lijiganyo lyawo lyapajika, chawungunye maumboni gakulosya kuti Mlungu apali. Yindu yampaka awungunyeyo yichilimbisya chikulupi chawo chakuti Yehofa apali soni chachimanyilila ndamo syakwete. (Alo. 1:20) Konjechesya pelepa, yindu yampaka alijiganyeyo mpaka ayikamulichisye masengo pakwakamuchisya ŵandu ŵakusakayichila kuti kwana Mlungu. Kusala yisyene, yindu yaŵapanganyisye Yehofa yikusatupa maumboni gejinji gakulosya kuti jwalakwe apali.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

YEHOFA NI JUŴALEMBILE BAIBULO

10. Ana tukusosekwa tujiwoneje mwamti uli Baibulo? (2 Timoteyo 3:​16, 17)

¹⁰ Aŵalanje 2 Timoteyo 3:​16, 17. M’Baibulo mwana utenga wakutyochela kwa Yehofa kwawula kwa ŵandu. Nambosoni jikusajanga yiwusyo yatukusakola paumi wetu, jikusasala chakulinga cha Mlungu, soni yakusasaka jwalakwe kuti tutendeje. Tukusakulupilila kuti Juŵalembile Baibulo ali Yehofa mwamti tukusajiwona kuŵa buku jakusosekwa mnope paumi wetu. Myoyo, tukusosekwa tujipikanichisyeje soni tutendeje yakomboleka kuti tukamulichisyeje masengo yindu yatuŵalasile.

11. Ligongo chichi tukusakulupilila kuti Baibulo jalembedwe ni Mlungu?

¹¹ Ligongo chichi tukusakulupilila kuti Baibulo jalembedwe ni Mlungu? Pana magongo gejinji. Mwachisyasyo, Baibulo jikusasala mwakulondola yindu yayatendekwe munyumamu. (Luk. 3:​1, 2) Nambosoni, jikusasala mwakulondola pangani ja yindu yakupanganyikwa. (Yob. 26:7) Konjechesya pelepa, Baibulo jili buku jajikusasimanikwa ni ŵandu ŵajinji kupundana ni mabuku gosope. Yili myoyo atamose kuti Satana alinjilile kuti ajijonanje. Yisyene kuti Baibulo jalembedwe ni achalume ŵakwana 40 kwa yaka chiŵandika 1,600, nambope yaŵalembile yikusaŵa yakamulana. Atamose kuti Baibulo jalembedwe kalakala, nambo yajikusasala yikwakamuchisya ŵandu ŵajinji masiku agano. (Mis. 13:20; 15:21; Mat. 7:12) Ligongo line lyakututendekasya kujikulupilila Baibulo lili lyakuti yakulochesya yejinji yajasasile yakwanilichikwe kala. (Yos. 23:14) Kusala yisyene, ngatukusosekwa kukayichila amta panandi kuti Baibulo jili jakutyochela kwa Mlungu.

12. Ana tukusosekwa kutenda chichi naga tutandite kukayichila kuti Baibulo jalembedwe ni Mlungu?

¹² Ana tukusosekwa kutenda chichi naga tutandite kukayichila kuti Baibulo jalembedwe ni Mlungu? Tukusosekwa kupopela kwa Yehofa soni kutenda yindu mwakamulana ni mapopelogo. Mwachisyasyo, jwachinyamata jwine lina lyakwe Jordan, jwalijiganyisye yakwamba Yehofa kutyochela kwa achinangolo ŵakwe. Jwalakwe jwasasile kuti: “Ngangusagamba kukulupilila yindu ligongo lyakuti achinangolo ŵangu kapena ŵandu ŵane asalile kuti yili yisyene. Ngusalolechesya kuti yindu yangusakulupilila yiŵeje yisyesyene. Pandandite kukayichila yindu yine yatukusakulupilila, ngusawungunya m’mabuku getu kuti manyilile yisyesyene yakwamba nganijo.” Myoyo, mpaka tulimbisye chikulupi chetu naga tukupitilisya kukulupilila kuti Yehofa ni juŵalembile Baibulo.—1 Akoli. 3:​12, 13.

YEHOFA AKWAKAMUCHISYA ŴANDU ŴAKWE MASIKU AGANO

13. Ana mpaka tutende chichi naga tutandite kukayichila kuti Yehofa akwete ŵandu ŵakwe masiku agano?

¹³ Naga tutandite kukayichila kuti ŵa Mboni sya Yehofa ali ŵandu ŵele Mlungu akwakamulichisya masengo masiku agano, tukusosekwa kutendapo kandu mwachitema. Mpaka tutende yeleyi mwakuliwusya kuti: ‘Ana ni ŵani ŵakusalingalinga kutenda yindu mwakamulana ni yajikusasala Baibulo? Ana ni gulu japi ja ŵandu jele yosope yakusakulupilila yikusatyochela m’Baibulo?’ (2 Tim. 4:​3, 4) ‘Ana masiku agano ni ŵani ŵakutenda yakusasaka Yehofa?’—Mat. 7:​20, 21.

14. Ana Yehofa akukamulichisya masengo wuli ŵandu ŵakwe pakukwanilisya yayili pa Mateyu 24:14?

¹⁴ Pakwamba ya ŵandu ŵakutenda yakusasaka Yehofa masiku agano, tukusosekwa kuliwusya kuti, ‘Ana ni ŵani ŵakukamula masengo gakulalichila gaŵasasile Yesu kuti gachikamulidwa m’masiku gakumalisya?’ (Mat. 24:14) Kwanga kwakwe kuli kwangasawusya. Mlungu akukamulichisya masengo ŵa Mboni sya Yehofa kuti akamuleje masengo gakulalichila. Tuli m’wejipe ŵatukulalichila ngani syambone syakwamba Uchimwene wa Mlungu m’yilambo yakupunda 240. Mwamti tuŵele tuli mkukamula masengoga kwa yaka yakupunda 100. Kusala yisyene, masengo gakulalichila gaŵele gakusosekwa mnope kwa ŵakutumichila ŵa Yehofa.—Mat. 28:​19, 20.

15. Ana ŵa Mboni sya Yehofa akusalichimbichisya wuli lina lya Yehofa? (Mateyu 6:9; Yesaya 43:10)

¹⁵ Aŵalanje Mateyu 6:9 soni Yesaya 43:10. Tukusamanyika ni lina lya Mlungu lyakuti Yehofa soni tukusasangalala kukolanjidwa kuti Mboni sya Yehofa. Ŵandu ŵajinji masiku agano ŵangamanyililaga kuti lina lya Mlungu lili Yehofa. Nambo m’weji tutesile yakomboleka kuti tukole Baibulo jakola lina lya Mlungu m’malo gosope galikusasimanikwa. Linali likusasimanikwa m’malo gakupunda 7,000 mu Baibulo ja Chilambo Chasambano ja Malemba Geswela.

16. Ligongo chichi mpaka tuŵechete kuti ŵa Mboni sya Yehofa akusapikanila lilamusi lya pa Yohane 13:​34, 35? (Alolesoni chiwulili.)

¹⁶ Aŵalanje Yohane 13:​34, 35. Ŵandu ŵajinji masiku agano ŵangakamulanaga ni ŵane soni akusiŵaŵenga achimjawo. Mwakulekangana ni jemanjaji, ŵa Mboni sya Yehofawe tukusanonyelana soni tuli ŵakamulana. Yili myoyo atamose kuti tukusatyochela m’yilambo yakulekanganalekangana soni tukwete ndamo syakulekangana. Tukusatenda yampaka tukombole kuti tuŵe pamtendele ni achimjetu. Komboleka kuti pakwete pajawile ku dela jine kukusongana ni abale ni alongo. Naga pakwete patesile yeleyi, ngatukukayichila kuti ŵayiweni yakusatenda jemanjaji pakulosya kuti ali ŵakamulana soni kuti akusanonyelana. Welewutu uli umboni wakulosya kuti masiku agano Yehofa akukamulichisya masengo ŵa Mboni sya Yehofa pakukwanilisya chakulinga chakwe. Kukumbuchila mfundo jeleji mpaka kutukamuchisye kuti tuŵeje ŵakulupichika pandaŵi jatukusimana ni yakusawusya.

AKALEKA KUMTUMICHILA YEHOFA

17-18. Ana ni yakusawusya yapi yampaka tusimaneje nayo, soni tukusosekwa kuŵa ŵakusimichisya ya chichi?

¹⁷ Kusala yisyene, chitusimaneje ni yakusawusya yakulekanganalekangana m’masiku gakumalisya gano. (2 Tim. 3:​1, 13) Mwachisyasyo, gulu jetu mpaka jisagule kutenda yindu yakuti ngatukuyipikanichisya. Kombolekasoni m’bale kapena mlongo mpaka atende yindu yampaka yitukuŵasye. Mwinesoni nganituŵa tumanyilile yampaka tutende kuti tumalane ni yakusawusya yetu kapena nganituŵa tupikanichisye ligongo lyakwe yindu yine yakwe yitendekwe.

¹⁸ Yisyene kuti yakutendekwa mpela yeleyi mpaka yitulagasyeje nganisyo, nambope mpaka tuŵe ŵakulupichika kwa Yehofa. Yili myoyo ligongo lyakuti tukusamanyilila kuti Yehofa ni juŵapanganyisye yindu yosope, Baibulo jili Maloŵe gakwe, soni kuti ŵa Mboni sya Yehofa ali ŵandu ŵakwe. Mpela muŵaŵechetele Petulo kwa Yesu, m’wejisoni mpaka tuŵechete kuti: “Ambuje, ana mpaka tujawulesoni kwa ŵani? Wawojotu ni ŵakwete maloŵe gakupeleka umi wangamala.”