Tuyiwoneje Mwakuŵajilwa Yakusawusya Yetu

1-2. Ana tukusosekwa kutenda chichi kuti tukomboleje kupilila yakusawusya yetu? (Alolesoni chiwulili.)

ANA wawojo akutendeledwa yindu yangali chilungamo, ŵandu ŵamwiŵasa mwawo akwasisya, kapena akulagasidwa ligongo lya chikulupi chawo? Ana akulaga ni ulwele kapena yakuyichisya yayikusayika ligongo lya ukalamba? Ana kapena asimene ni yakusawusya mnope mpela chiwa cha mundu jwakusamnonyela? Naga yili myoyo, nikuti umi wawo ‘ugumbele ni yakusawusya soni yipwetesi’. Nambope, akumbuchileje kuti Yehofa akusiŵanonyela mnope ŵandu ŵakwe.—Sal. 90:10.

² Kuti tukombole kupilila yakusawusya yatukusimana nayo, tukusosekwa tuyiwoneje mpela mwakusayiwonela Yehofa. Ligongo chichi kutenda yeleyi kuli kwakusosekwa? Lili ligongo lyakuti naga ngatukumanyilila mwakuyiwonela yakusawusya yetuyo Yehofa, mpaka yiŵe yakusawusyasoni kumanyilila yatukusosekwa kutenda kuti tukombole kupilila. Yeleyi mpaka tuyiwanichisye ni mundu jwakwendesya galimoto. Naga ligalasi lya galimoto jakwe ngalikuwoneka chenene, mpaka alepele kulola yindu yampaka yimtendekasye ngosi pamsewu. Nambo naga ligalasilyo likuwoneka chenene, mpaka ayiwone yindu yeleyi mwangasawusya soni mpaka amanyilile yakusosekwa kutenda kuti aŵambale ngosi. Myoyo munganiji, chitukambilane (1) yatukusosekwa kukumbuchila pakwamba yakusawusya yetu, (2) ngosi jampaka jipagwe naga ngatukuyiwona mwakuŵajilwa yakusawusya yetu, soni (3) yatukusosekwa kutenda patusimene ni yakusawusya.

YATUKUSOSEKWA KUKUMBUCHILA PAKWAMBA YAKUSAWUSYA YETU

3. Ligongo chichi yili yangakomboleka ngasimanaga ni yakusawusya?

³ M’chilambo chakusakalachi yili yangakomboleka ngasimanaga ni yakusawusya. Wosopewe tukusasimana ni yakusawusya ligongo lyakuti tuli ŵangali umlama soni chilambochi chikulamulilidwa ni Satana. Tumanyililejesoni kuti chilambochi pachikwawula kumbesi, chitupitilisye kusimana ni yakusawusya yejinji. Tujembecheyeje kusimana ni ngosi sya chilengedwe, kapena yakusawusya yine yakusayitandikasya ŵandu ŵakusakala. (Mat. 24:8; 2 Tim. 3:13) Yehofa nganaŵa amasisye yakusawusya yeleyi apano ligongo naga akutenda yeleyi mpaka yiŵe mpela kuti akumkamuchisya Satana kulamulila chilambochi. Myoyo, tukusosekwa tujembecheyeje nditu kuti chitusimaneje ni “yakusawusya.”—Jwak. 9:12.

4. Ana ni ligongo line lyapi lyalikusatendekasya kuti tusimaneje ni yakusawusya?

⁴ Tukusasimanasoni ni yakusawusya ligongo lyakuti tukusampikanila Yesu. Mwakuwilisyawilisya, Yesu jwasalilaga ŵakulijiganya ŵakwe kuti chachilagasidwa ligongo lya chikulupi chawo. (Mat. 24:9; Yoh. 16:2) Myoyo, ŵandu pakutulagasya tukasimongaga soni tukatendaga woga. (1 Ates. 3:​3, 4) Naga tukupitilisya kuŵa ŵakulupichika patukusimana ni yakusawusya, ngasitukayichila ata panandi kuti Yehofa soni Yesu chachitupa umi wangamala. Konjechesya pelepa, tuchilosya kuti tuli kumbali ja Yehofa soni kuti Satana ali jwaunami. Satana akusaŵecheta kuti ŵanduwe tukusamtumichila Yehofa ligongo lya yindu yambone yakusatupa soni kuti patusimene ni yakuwusya mpaka tuleche kuŵa ŵakulupichika kwa jwalakwe. Pakusaka kulosya kuti yeleyi yili yisyene, jwalakwe akusalimbana mnope ni ŵakutumichila ŵa Yehofa. (Yob. 1:​9-11) Myoyo, Yehofa akusaŵa jwakusangalala mnope pakutuwona tuli mkupilila yakusawusya ligongo lyakuti tukusamnonyela.—Mis. 27:11.

5. Ana tukulijiganya chichi pa Jwakulalichila 7:​13, 14? (Alolesoni yiwulili.)

⁵ Yehofa akusakunda kuti tusimaneje ni yakusawusya. Yehofa ngakusatenda yindu yangasa kapena kutulinga ni yindu yakusakala. (Yak. 1:13) Sambano, ligongo chichi Mwenye Solomo jwalembile kuti “lisiku lyayakusawusya” lili “masengo ga Mlungu jusyesyene”? (Aŵalanje Jwakulalichila 7:​13, 14.) Jwalakwe nganagopolelaga kuti Yehofa ni jwakusatendekasya kuti tusimaneje ni yakusawusya mmalomwakwe akusagamba kuyikunda kuti yitendekwe. Solomo jwatupele malangiso gambone gampaka gatukamuchisye kuti tuyiwoneje mwakuŵajilwa yakusawusya yetu. Chandanda, tukumbuchileje kuti m’chilambo cha Satanachi ndaŵi sine chitukoleje “lisiku lyambone” soni masiku gakusawusya. Myoyo, patusimene ni yindu yambone tukusosekwa kumyamichila Yehofa ligongo lyakuti mtuka uliwose wambone ukusatyochela kwa jwalakwe. Chaŵili, Solomo akutukumbusya kuti ‘nganituŵa tumanyilile yayichitutendechela kusogolo.’ Yayikugopolela kuti nganituŵa tumanyilile naga malaŵi tuchisimana ni yindu yambone kapena yakusawusya. Yili myoyo ligongo lyakuti yindu yangayijembecheya yikusatugwila wosopewe chinga ŵakulungama kapena iyayi.

6. Ligongo chichi Yehofa mpaka akunde kuti tusimane ni yakusawusya? (Ahebeli 12:​7, 11)

⁶ Yehofa mpaka akamulichisye masengo yakusawusya yatukusimana nayo pakusaka kutujiganya kuti tumdalileje mmalo mwakulidalila jika. Ndaŵi syosope jwalakwe akusamanyilila yakusawusya yatukusasimana nayo soni akusaŵa jwakoseka kutukamuchisya. Atamose ali akundile kuti tujende ‘mchitiŵi chachipi mnope,’ jwalakwe chachipitilisya kutulongolela, kutulosya chinonyelo, soni kutupa machili ni chakulinga chakuti tukombole kupilila. (Sal. 23:4) Yakusawusya yampaka tusimane nayo mpaka yitukamuchisye kumanyilila ndamo syatukusosekwa kukola soni Yehofa mpaka atukamuchisye kuti tukole ndamosyo. (Aŵalanje Ahebeli 12:​7, 11) Mwachisyasyo, Yobu jwasosekwaga kutenda yakomboleka kuti aŵe jwakulinandiya. Yehofa nganatendekasyaga yakusawusya ya Yobu. Mmalomwakwe, jwagambile kukunda kuti Yobu asimane ni yakusawusyayo soni jwayikamulichisye masengo pakumjiganya yindu yakusosekwa mnope. (Yob. 42:​1-6) Tukumanyilila kuti yakusawusya yiliyose yampaka akunde Yehofa kuti tusimane nayo, nganiyiŵa yitujonasile m’weji mpaka kalakala. Myoyo, naga tukupilila yakusawusyayo mwakulupichika tuchikombola ‘kuyipunda yosopeyo.’—Alo. 8:​35-39.

7. Ligongo chichi mpaka aŵe ŵakusangalala atamose pakulagasidwa ligongo lya chikulupi chawo?

⁷ Mpaka tuŵe ŵakusangalala patukulagasidwa. Naga akulagasidwa ligongo lya chikulupi chawo, akaganisyaga kuti Yehofa ngakusangalala ni wawojo. Mmalomwakwe, amanyilileje kuti kulagasidwako uli umboni wakulosya kuti Yehofa akusangalala ni wawojo. (Mat. 5:​10-12) Naga akukola nganisyo syelesi, chachiŵa ŵakusangalala mnope mpela muyaŵelele ni ŵandumetume. (Mase. 5:​40-42) Konjechesya pelepa, yichakamuchisyasoni ŵandu ŵele nganaŵa ŵa Mboni kulijiganya yisyesyene soni “chachimchimbichisya Mlungu.” (1 Pet. 2:12) Aganichisye ya Yosefe. Yehofa ŵamkamuchisye jwalakwe soni ŵampele upile atamose pandaŵi jaŵalagaga mu ndende soni pandaŵi jaŵakopweche. Yehofa mpaka atende yakulandanayi ni wawojo pandaŵi jakusimana ni yakusawusya.—Gen. 39:​3, 23.

8. Ligongo chichi tukusosekwa kupitilisya kupilila yakusawusya yetu?

⁸ Yakusawusya yetu yichimala. Yaŵasimene nayo Yobu yikusatukumbusya kuti yakusawusya yatukusimana nayoyi yichimala. Tukumbuchileje kuti “Yehofa ŵampele upile wejinji Yobu kumbesi kwa umi wakwe kupundana ni kundanda kwa umi wakwe.” (Yob. 42:12) Mwakulandana ni yeleyi, “kumbesi kwa umi” wetu kapena kuti m’chilambo chasambano, Yehofa chachitupa yindu yejinji yambone. Yakusawusya yatukusimana nayo apano yili ya kandaŵi kamnono pakuyilandanya ni umi wangamala watuchisangalala nawo m’chilambo chasambano. Myoyo, kuti chitusangalale ni umi welewu, kwende tupitilisye kuŵa ŵakulupichika kwa Yehofa patukupilila yakusawusya yatukusimana nayo.—Mat. 24:13.

NGOSI JAMPAKA JIPAGWE NAGA NGATUKUYIWONA MWAKUŴAJILWA YAKUSAWUSYA YETU

9. Ana mpaka chitendekwe chichi naga ngatukuyiwona mwakuŵajilwa yakusawusya yetu?

⁹ Kuti yindu yikasakala mnope, tukusosekwa tuyiwoneje mwakuŵajilwa yakusawusya yatukusimana nayo. Mwachisyasyo, patukusimana ni yakusawusya mpaka tutande kuganisya kuti Yehofa ni jwakuyitendekasya. Yeleyitu ni yayamtendechele Yobu. Jwalakwe jwatandite kuganisya kuti Yehofa ni jwakutendekasya yakusawusya yakwe. Kaganisye kakulemwecheka keleka kamtendekasisye Yobu ‘kuliwona kuŵa jwakulungama kumpunda Mlungu.’ (Yob. 32:2) Nombenajo Naomi, pandanda jwamjimbile Yehofa magambo ligongo lya yakusawusya yaŵasimene nayo. (Lut. 1:​13, 20, 21) Yikaŵe kuti Yobu soni Naomi ŵapitilisye kukola nganisyo syelesi, yikatendekasisye kuti unasi wawo ni Yehofa ujonasiche. (Mis. 19:3) Nambo chakusangalasya chili chakuti Yehofa jwakamuchisye jemanjaji kuti ayiwoneje mwakuŵajilwa yakusawusya yawo. Soni yakuyichisya yakwe ŵapele upile ligongo lyakukulupichika kwawo.

10. Ana patukusimana ni yakusawusya mpaka tutande kukayichila chichi?

¹⁰ Atamose tuli mkumanyilila chenene kuti Yehofa ngakutendekasya yakusawusya yetu, pane mpaka tutande kukayichila naga jwalakwejo akusasamala ya m’weji. Kaganisye kakulemwechekaka mpaka katusokonasye patukumtumichila Yehofa. (Mis. 24:10) Nombenajo Mwenye Daudi soni jwakulochesya Habakuku ŵasimene ni yakusawusya. Mwamti pandaŵi jine ŵamwusisye Yehofa yiwusyo pakusaka kumanyilila naga akupikana mapopelo gawo gakuŵenda chikamuchisyo. (Sal. 10:1; Hab. 1:2) Atamose kuti jemanjaji ŵamwusisye Yehofa yiwusyo, nambope nganaleka kupopela kwa jwalakwe. Yehofa jwajanjile mapopelo gawo soni jwapitilisye kwakamuchisya. Jwalakwe chachitendasoni yakulandanayi ni wawojo.—Sal. 10:17.

11. Ana mpaka chitendekwe chichi naga ngatukuyiwona yakusawusya yetu mpela mwakuyiwonela Yehofa?

¹¹ Naga ngatukusayiwona yakusawusya mpela mwakusayiwonela Yehofa, mpaka tutande kuganisya kuti jwalakwe nganaŵa akundile kuti tusimane ni yakusawusya. Yakuyichisya yakwe mpaka tutenguche mnope patusimene nayo. (1 Pet. 4:12) Ŵakulijiganya ŵa Yesu yasawusyaga kupikanichisya kuti jwalakwe chachilagasidwa soni kuwulajidwa. (Luk. 18:​33, 34) Mwachisyasyo, atamose kuti Yesu jwasalilaga yakusawusya yachachisimana nayo, ndumetume Petulo jwayiwonaga kuti Mlungu nganaŵa akundile kuti Yesu alaje mwa litala lyelelyo. Yesu jwamanyililaga kuti kaganisye keleka mpaka kamlepelekasye kutenda yaŵasakaga Yehofa mwamti ŵamjamwiche Petulo. (Mak. 8:​31-33) Atamose Yesu paŵawulajidwe, ŵakulijiganya ŵakwe yasawisye kupikanichisya mwachitema ligongo lyakwe jwawulajidwe. Atamose yaliji myoyo, Yesu nganaleka kwakamuchisya jemanjaji. Jwalakwe ali agambile kwimuka ku chiwa, jwakamuchisye kuti ayiwoneje mwakuŵajilwa yakusawusya yaŵasimene nayoyo. Jwatesile yeleyi ‘mwakwalondechesya chenene Malemba.’ (Luk. 24:​25-27, 32, 44-48) Kuganichisya yaŵajiganyisye Yesuyi kukakamuchisye ŵakulijiganyaŵa kuti akombole kupilila yakusawusya yaŵasigele panandi kusimana nayo. Nombe m’weji mpaka tukosechele chenene yakusawusya naga tukuganichisya yajikusasala Baibulo pangani jakulagasidwa soni yakusawusya yampaka tusimane nayo.

12. Ana mpaka chitendekwe chichi naga ngatukuyiwona mwakuŵajilwa yakusawusya yetu?

¹² Naga ngatukuyiwona mwakuŵajilwa yakusawusya yetu, mpaka tutande kuyiwona kuti yili yekulungwa mnope nambo yili mkuti nganiyiŵa myoyo. Chisyasyo chaŵasasile Yesu chakwamba ŵandu ŵaŵakamulaga masengo mu mgunda wa mipeleya, mpaka chitukamuchisye kupikanichisya mwampaka yitendechele yeleyi. Ŵamasengo ŵane ŵatandite kudandawula ligongo ŵayiwonaga kuti nganiŵapa malipilo gakwanila. Nambo msyene mgundajo ŵasalile kuti “Bwanawe, nganinamleŵela.” (Mat. 20:​10-13) Ŵamasengoŵa ŵadandawulaga ligongo ŵayiwonaga kuti msyene mgundajo ŵatendele yindu mwangali chilungamo, nambope nganiyiŵa myoyo. Chakusawusya chaliji chakuti jemanjajo ŵajembecheyaga yindu yakuti nganasosekwaga kuyijembecheya. Masiku aganosoni, ŵakutumichila ŵane ŵa Yehofa akusakola nganisyo syakulandanasi. Mwachisyasyo, jemanjajo mpaka ayiwone kuti atendeledwe yindu mwangali chilungamo ligongo lyakuti nganapochela utumiki wawusachileje mnope. Sambano, ana tukusosekwa kutendaga chichi kuti tuyiwoneje yakusawusya yetu mpela mwakusayiwonela Yehofa?

YATUKUSOSEKWA KUTENDA PATUSIMENE NI YAKUSAWUSYA

13. Ana mpaka chitendekwe chichi patusimene ni yakusawusya?

¹³ Ŵakutumichila ŵa Yehofawe, tukusamanyilila chenene yajikusasala Baibulo pakwamba yakusawusya. Nambosoni tukusitwaŵalanjila ŵandu Malemba pandaŵi jasimene ni yakusawusya ni chakulinga chakuti akombole kupilila. Nambope, naga yakusawusyayo tusimene nayo m’weji, ndaŵi sine mpaka yitusawusyeje kuyiwona mpela mwakusayiwonela Yehofa. Mwachisyasyo, mpaka tutande kuganisya kuti Yehofa akutupa chilango kapena ngakupikanilasoni mapopelo getu. Ana ni yindu yapi yatukusosekwa kutenda kuti tuyiwoneje mwakuŵajilwa yakusawusya yetuyo mpela mwakusayiwonela Yehofa?

14. Pakusimana ni yakusawusya, ana ni yindu yapi yampaka asale pakupopela? (Afilipi 4:13)

¹⁴ Amŵendeje Yehofa kuti ŵakamuchisye. Amsalileje Yehofa yakusawusya yakusimana nayo soni mwakupikanila. Pakupopela mpaka amsalilesoni yakusaka wawojo Yehofajo ali atesile kuti amalane ni yakusawusyayo. Amŵendeje jwalakwe kuti ŵape msimu wakwe weswela wampaka wape machili soni lunda kuti akombole kupilila. Akumbuchileje kuti Yehofa mpaka ajanje mapopelo gawo mu litala lyakuti wawojo nganajembecheyaga. (Aef. 3:20) Jwalakwe mpaka akamulichisye masengo malayika kapena abale ni alongo ŵawo kuti ŵakamuchisye. (Sal. 34:7) Myoyo, aŵeje ŵakoseka kupochela chikamuchisyo chilichose champaka ŵape Yehofa. Jwalakwe mpaka ŵape msimu wakwe weswela mwakoloŵa magasa. Mwamti msimuwu mpaka wakamuchisye kuti akombole kupilila yakusawusya yiliyose yampaka asimane nayo.—Aŵalanje Afilipi 4:13.

15. Ana ni chichi champaka chakamuchisye kuti akombole kupilila yakusawusya? (Alolesoni chiwulili.)

¹⁵ Apitilisye kutenda yindu yausimu. Atendeje yampaka akombole kuti akole ndandanda jambone jakutendela yindu yausimu jaŵakwete pandanda. Atamose pandaŵi jakusimana ni “yipwetesi soni yakusawusya” akusosekwa kulolechesya kuti akuganichisya yindu yambone. (Sal. 119:143) Apitilisye kuŵalanga Baibulo ndaŵi syosope, kulijiganya soni kuganichisya yalijiganyisyeyo. Alipelecheje pamasengo gakulalichila soni asimanikweje pamisongano ja mpingo ni kujigalaga nawo mbali. Atendeleje yindu yimpepe ni abale ni alongo ŵawo. Nambosoni aŵambaleje kuŵa pajikajikape.—Mis. 18:1.

16. Ana pasimene ni yakusawusya mpaka atande kukayichila ya chichi soni akusosekwa kutenda chichi? (2 Akolinto 10:​4, 5)

¹⁶ Amalane ni kulikayichila. Pasimene ni yakusawusya akusosekwa “kugwisya yindu yayili yakulimba mpela mapupa” yayikwenda mu nganisyo mwawo. Yindu yeleyi mpaka yiŵe kulikayichila kapena kumkayichila Yehofa. (Aŵalanje 2 Akolinto 10:​4, 5.) Kuti amalane ni kulikayichilaku, akusosekwa amanyilileje nganisyo sya Yehofa mwakuŵalanga Baibulo soni mabuku ga gulu jakwe. Mwachisyasyo, ana akusakayichila yakuti Yehofa akusiŵanonyela? Naga yili myoyo, aŵalanje ngani jakwamba ndumetume Paulo. Pandaŵi jiŵatendaga utumiki wakwe, jwalakwe jwasimene ni yakusawusya yejinji. Nambope yakusawusya yeleyi, yamkamuchisye kumanyilila kuti ali jwakutumichila jwa Klistu jwakuŵajilwa. (2 Akoli. 11:​23-27) Ana ndaŵi sine akusakayichila naga Yehofa ŵakululuchile yakulemwa yawo yakalakala? Naga yili myoyo, awungunye malemba gagakusalosya kuti Yehofa akusakululuchila yakulemwa. (Yes. 43:25) Kaneko, aŵalanje malemba gelega soni kugaganichisya. (Sal. 119:97) Ana kapena asimene ni yakusawusya yineyakwe yayikwatendekasya kukayichila naga Yehofa mpaka ŵachenjele ŵakutumichila ŵakwe ŵakulupichika? Naga yili myoyo, akusosekwa kuwungunya kuti amanyilile ligongo lyakwe Mlungu akusakunda yakusawusya kututendechela. Soni yakusatenda pakutuchenjela mwausimu pandaŵi jatusimene ni yakusawusyayo. (Sal. 91:​9-12) Nambosoni, akusosekwa kuŵalanga ngani syakusala ya abale ni alongo ŵaŵakombwele kupilila pandaŵi jaŵasimene ni yakusawusya.a

17. Ana tukusosekwa kutenda wuli patusimene ni yakusawusya?

¹⁷ Komboleka kuti wawojo apano ngakulaga ni yakusawusya yiliyose. Naga yili myoyo, akusosekwa kumyamichila soni kumchimbichisya Yehofa ligongo lya yindu yambone yakusangalala nayo. (Jwak. 7:14) Nambo naga ali asimene ni yakusawusya, chachisosekwa kuyiwona yakusawusyayo mpela mwakusayiwonela Yehofa soni kupitilisya kumkulupilila jwalakwe. Naga akutenda yeleyi, Yehofa ‘chachapatila litala lyakwakamuchisya kuti akombole kupilila.’ (1 Akoli. 10:13) Mungani jakuyichisya, tuchikambilana yatukusosekwa kutenda abale ni alongo ŵetu pasimene ni yakusawusya.