Alijiganye Kumjogopa Mlungu Mpela Muŵatendele Obadiya

Obadiya jwaliji jwakulolela nyumba ja Mwenye jwakusakala Ahabu. Ahabu jwatendekasisye kuti kulambila Baala kuŵe kwakuwanda mnope mu Isalayeli. Nambope, Obadiya jwamjogopaga Yehofa ‘kutandila ali mnyamata.’ (1 Ayi. 18:​1-13) Myoyo, Yesebele paŵalamwile kuti ŵakulochesya wosope ŵa Yehofa awulajidwe, Obadiya jwatesile yindu mwakulimba mtima kuti ŵakulochesyaŵa akawulajidwa. Pandaŵijo kumsisa jwakulochesya atamose jumo kwaliji kwakogoya. Nambo atamose yaliji myoyo, Obadiya jwakombwele kwasisa ŵakulochesya 100. Mwamti jwalakwe jwapaga jemanjajo yakulya pandaŵi josopejeneji atamose kuti kwaliji sala. Kusala yisyene, yalijitu yakusawusya mnope kuti ŵakulochesya ŵaunami wa mwenye Ahabu soni Yesebele akamanyilila chilichose.—1 Ayi. 18:19.

Ana tukulijiganya chichi kutyochela kwa mundu jwakumjogopa Mlunguju? Atamose kuti Obadiya jwamjogopaga Ahabu, nambope jwalakwe jwamjogopaga mnope Mlungu. Kumjogopa kwakwe Mlungu ni kukwamtendekasisye jwalakwe kuti aŵe jwakulimba mtima mpaka kwika pakuŵika umi wakwe pangosi pakusaka kwakamuchisya achalongo achimjakwe. Myoyo, naga ku dela jatukutama masengo gakulalichila agalekasisye, yili yakomboleka kola ndamo jakumjogopa Mlungu. Kumjogopa Mlunguku kuchitukamuchisya kuti tuŵe ŵakulimba mtima pakwakamuchisya abale ni alongo ŵakusimana ni yakusawusya.