Yiwusyo Yakutyochela kwa Ŵakuŵalanga

Ana ni ndaŵi japi jele maboma gachigumila kuti, “tuli pamtendele soni pangali chakutujogoya”?

Mpela mwatwayiwonele mu “Yiwusyo Yakutyochela kwa Ŵakuŵalanga” ya mu Sanja ja Mlondaa ja pachangakaŵapa, Yehofa pachangakaŵapa chachiŵika nganisyo syakwe mmitima ja “misengo 10” (maboma gosope), mwamti jemanjaji chachipeleka machili gawo ku ‘chilombo chechejewu’ jajili bungwe ja United Nations. Chilombochi chikusakolanjidwasoni kuti “chiwanichisyo cha chilombo.” (Chiw. 13:​14, 15; 17:​3, 16, 17) “Misengo 10” soni chilombo chamachilichi chichimasya dini ja unami pachilambo chosope. Ana maboma gachigumila kuti, “tuli pamtendele soni pangali chakutujogoya”b Yehofa mkanaŵe kapena panyuma pakonanjidwa kwa dini ja unami?—1 Ates. 5:3.

Mwakata, ngatukumanyilila ndaŵi jisyesyene jele maboma gachigumila kuti, “tuli pamtendele soni pangali chakutujogoya.” Soni yikaŵe kuti tukumanyilila yosope nikuti pakaliji pangali ligongo lyakuŵela mesope. Ni ligongo lyakwe Yesu jwasalilaga mwakuwilisyawilisya ŵakulijiganya ŵakwe kuti “aŵeje mesope.” (Mat. 24:42; 25:13; 26:41) Kwende tulole chenene yakulochesya yele ndumetume Paulo jwalembele Aklistu ŵa ku Tesalonika.

Paulo jwalembile kuti, “Pachachijilaga kuti, ‘Sambano tuli pamtendele soni pangali chakutujogoya!’ pandaŵi jijojo chachisimana ni yakogoya.” (1 Ates. 5:​2, 3) Mabuku getu gaŵele gali mkulondesya mwakuwilisyawilisya maloŵe ga Pauloga m’litala ali, kugumila kwakuti “tuli pa mtendele soni pangali chakutujogoya” kuchitendekwa kuli kusigele kandaŵi panandi kuti yakusawusya yekulungwa yitendekwe. Yakusawusya yekulungwayi yichitanda panyuma pakonanjidwa kwa Babulo jwamkulungwa jajili dini ja unami ja pachilambo chosope. Kugumila kweleku tuŵele tuli mkukulondesya kuti chili chimanyisyo chakumalisya kuti yakusawusya yekulungwa yitande.

Nambope, panyuma pakuwungunya chenene ya chakulochesyachi, yikuwoneka kuti mpaka tuchilondesyesoni m’litala line. Komboleka kuti kugumila kwakuti “tuli pamtendele soni pangali chakutujogoya” kuchitendekwa panyuma pakonanjidwa kwa dini ja unami. Ligongo chichi tukuŵecheta myoyo? Mpaka yiŵe myiyi pa magongo gakuyichisyaga.

Ana dini ja unami jiŵele jili mkuchisya chamti uli ngondo pachilambopa? Baibulo jikusati, “Mwa jwalakwe [lyalili ‘lihule lyekulungwa,’ kapena kuti Babulo Jwamkulungwa] mwasimanikwe myasi ja . . . wosope ŵaŵawuleje mwangali chanasa pachilambo chapasi.” (Chiw. 17:​1, 5; 18:24) Mbili jikusalosya kuti lihule lyekulungwali liŵele lili mkuchisya ngondo pachilambopa soni kutendekasya kuti ŵandu ŵajinji awulajidwe. Dini ja unamiji nganijiyikasya mtendele soni kwatendekasya ŵandu kuŵa pambone. Mmalomwakwe, jiŵele jili mkutandikasya ngondo soni yachiwawa. Yeleyi yikuyikasya chiwusyo chakuti, Ana maboma gachigumila kuti “tuli pamtendele soni pangali chakutujogoya” panyuma pakuti Babulo Jwamkulungwa ajonanjidwe? Yeleyi mpaka yitendekwe nambo ngatukusimichisya.

Ana pachitendekwa chichi panyuma pakuti maboma gagumisile kuti “tuli pamtendele soni pangali chakutujogoya”? Paulo jwatite, “Pandaŵi jijojo chachisimana ni yakogoya.” (1 Ates. 5:3) Maloŵe gakulondesya ndimeji mu Baibulo jachisungu gakusati, “Maloŵe ga Pauloga gakulosya kuti mabomaga gachijonanjidwa mkanipapite ndaŵi jelewu kutyochela pandaŵi jele gachigumila kuti ‘tuli pamtendele soni pangali chakutujogoya.’ Yeleyi yichitendekwa mwakusisimuchisya soni ngasakombola kutila.” Naga maboma gachigumila kuti, “tuli pamtendele soni pangali chakutujogoya” panyuma pakuti dini ja unami jijonanjidwe, nikuti kaneko gachisigala mabomago kuti gajonanjidwe.

Ana ŵandu ŵa Yehofa chachitenda chichi pachachikuwona kukwanilichikwa kwa yeleyi? Paulo jwatite, “Achalongo achimjetu nganimŵa m’chipi mpela ŵawiyi kuti lisikulyo palikwika likamsisimusya.” (1 Ates. 5:4) Aganichisye ayi, naga maboma gachigumila kuti “tuli pamtendele soni pangali chakutujogoya” panyuma pakuti dini ja unami jijonanjidwe, nikuti ŵandu ŵa Yehofa chachimanyilila kuti maboma ga pachilambopa gasigele panandi konanjidwa. Nambope ligongo lyakuti mabomaga gachiŵa gali mkusangalala, chonasiko chichayichila mwakusisimuchisya mpela mwayikusaŵela ni jwawiyi.

Ana tujembecheyeje chichi? Pachangakaŵapa, “misengo 10” soni chilombo chechejewu chachichipochela machili kutyochela ku maulamusi pachilambopa chichijonanga dini ja unami. Kwelekutu kuchiŵa kutanda kwa yakusawusya yekulungwa. Tukumanyililasoni kuti maboma gachigumila kuti “tuli pamtendele soni pangali chakutujogoya.” Ana yeleyi yichitendekwa pandaŵi japi? Tukambilene mfundo siŵili. Mfundo jandanda, komboleka kuti kugumila kweleku kuchitendekwa, Yehofa mkanajonanje dini ja unami. Mfundo jaŵili, komboleka kuti kugumila kweleku kuchitendekwa panyuma pakuti maboma gajonasile Babulo Jwamkulungwa. Tugambeje kwembecheya kuti chitulole mwayichiŵela. Yakulochesya ya m’Baibulo tukusayipikanichisya chenene payikukwanilichikwa kapena panyuma pakuti yikwanilichikwe.—Alole Yohane 12:16.

Pandaŵi ajino, ngatukusosekwa kuganichisya mnope ya ndaŵi jele maboma gachigumila kuti, “tuli pamtendele soni pangali chakutujogoya,”nambo chakusosekwa mnope chili kupitilisya kuŵa ŵakulupichika kwa Yehofa. Myoyo, “kwende tuŵe mesope soni tuŵeje ŵaganisya chenene” ni chakulinga chakuti tuŵe ŵakoseka atamose kuti ngatukumanyilila yosope.—1 Ates. 5:6.