Ŵanache Ali “Mtuka Wakutyochela kwa Yehofa”

Ana ni chichi chachikusayika mu nganisyo mwawo papikene maloŵe gakuti “mtuka”? Komboleka mpaka aganisyeje ya mbiya, malo kapena chindu chinechakwe chele mundu jwa muliŵasa lyawo jwalechele. Chinga chinducho mpaka chiŵe chamti uli, nambope mtuka ukusaŵa wakusosekwa mnope soni tukusasosekwa kuwusamalila.

Baibulo jikusasala kuti ŵanache ali “mtuka wakutyochela kwa Yehofa.” (Sal. 127:3) Mwamti ni ligongo lyakwe achinangolo ŵa Chiklistu akusiŵawona ŵanache ŵawo kuti ali mtuka wakutyochela kwa Atati ŵawo mwamti akusatenda yiliyose yakomboleka pakwasamalila jemanjaji mwakuchilu soni mwa usimu.

Nambo chakutesya chanasa chili chakuti achinangolo ŵane masiku agano ngakusiŵawona ŵanache ŵawo kuti ali mtuka wakutyochela kwa Mlungu. (Yes. 49:15; 2 Tim. 3:1-3) Ŵane akusasaka ali mkwasamalila chenene ŵanache ŵawo nambo yikusiyasawusya kutenda yeleyo ligongo lya yakusawusya yine. Ana yine mwa yakusawusya yayikusatendekasya kuti yiŵeje yakusawusya kwa achinangolo kwasamalila ŵanache ŵawo ni yapi? Ana Yehofa akusasaka kuti achinangolo atendeje chichi? Soni ana achinangolo ŵa Chiklistu mpaka atende chichi kuti akombole kwalela chenene ŵanache ŵawo?

YAKUSAWUSYA YAKUSASIMANA NAYO

Yakusaŵecheta ŵachibale soni ŵandu ŵa mudela jakusatama. M’madela gane, ŵandu akusiŵachimbichisya achinangolo ŵakwete ŵanache ŵajinji. Ni ligongo lyakwe, ŵalombele mpaka ayiwoneje kuti akusosekwa kukola ŵanache ŵajinji soni ŵakuti nganaŵa akombwele kwasamalila ligongo lya yakuŵecheta ya ŵachibale ŵawo soni achimjawo.
Kuganichisya yakusogolo. M’madela gele ŵanache akusakangala kuwa ligongo lya yilwele, kusoŵa kwa yakulya, soni yipatala, achinangolo ŵane akusaganisya yakuti akole ŵanache ŵajinji ni chakulinga chakuti mwine chapagwe ŵakulupuka. Pele maŵasa gane akusasagula yakola ŵanache ŵajinji ni chakulinga chakuti pachachikalambalapo ŵanachewo chiŵakamule mkono. Yeleyitu yili yakuwanda mnope m’yilambo yele boma jangakombola kwasamalila ŵachikulile.
Yili yakusawusya kuŵambala kukola ŵanache ŵajinji. M’madela gane, ŵalombele ngakusakola upile wakamulichisya masengo matala gakulela. Pele ŵane akusapata matala gane gakulelaga nambo gangadalilichika mwamti akusajogopa kugakamulichisya masengo pakogopa kuti mpaka gayikachisye yakusawusya. Nambope, ŵane nganaŵa akombwele kukamulichisya masengo matala gakulela ligongo lyakudula.a

ANA YEHOFA AKUSASAKA KUTI ACHINANGOLO ATENDEJE CHICHI?

Liŵasa likusangalala palipite ku malo ganegakwe kukukunguluka. Mtati akumpikanila mwanache jwakwe jwamkongwe pakuŵechetana pa ndaŵi jele mama akuputa mpila ni mwanache jwakwe. — Apateje ndaŵi jakuŵechetana ni ŵanache ŵawo jwalijose pajika

Ŵasamalileje ŵanache ŵawo. Yehofa jwapeleche udindo kwa achinangolo wakuti ŵapatileje yakusosechela ŵanache ŵawo. Jwalakwe akusajembecheya kuti achinangolo chakamuleje masengo mwakulimbichila ni chakulinga chakuti ampatileje mwanache jwalijose yakulya, yakuwala soni malo gagona. Yehofa akusasakasoni kuti achinangolo ŵajawusyeje ŵanache ŵawo ku sukulu. Myoyo achinangolo ŵa Chiklistu ngakusagamba kwatumisya ŵanache ŵawo ku sukulu jagonela kukoko. Mmalomwakwe akusalolechesya kuti akutama ni ŵanache ŵawo ni chakulinga chakuti ŵanachewo alijiganye chenene soni kuti akomboleje kwalolela. Yeleyi yikusatendekasya ŵanachewo kuyiwona kuti ali pa malo gambone soni kuti akunonyeledwa. Nambope, Yehofa jwangajembecheya kuti achinangolo aŵe ŵakusichila. Mwamti Yehofa, jwasagwile achinangolo ŵakulaga nambo ŵaŵaliji ŵakulimbichila kuti amlele Mwanache jwakwe jwapamtima.—Mat. 13:55, 56; Luk. 2:24.

Mfundo ja m’Baibulo: “Yisyene, naga mundu ngakwasamalila ŵandu ŵele jwalakwejo akusosekwa kwasamalila, mnopemnope ŵele ŵali muliŵasa lyakwe, nikuti jwalakwejo akanile chikulupi soni ali jwakusakala mnope kupunda mundu jwangali chikulupi.”—1 Tim. 5:8.

Yehofa akusamanyilila kuti achinangolo pakukula mpaka asosecheleje chikamuchisyo. Mwamti litala limo lyele ŵanache mpaka alosye kuti akusiŵachimbichisya achinangolo ŵawo lili kulinganya yakuti chiŵasamalileje achinangolo ŵawowo pachachikula. (Eks. 20:12; 1 Tim. 5:4) Nambope, Yehofa akusasangalala naga achinangolo akuganichisya yachachitenda pakwasamalila ŵanache ŵawo ngaŵaga yachachitenda ŵanachewo pakwasamalila jemanjajo.—2 Akoli. 12:14.

Ŵasamalileje mwa usimu. Achinangolo ŵa Chiklistu akwetesoni udindo wakwakamuchisya ŵanache ŵawo kuti amnonyeleje soni kumlambila Yehofa. Mwamti Yehofa akusajiwona ngani jeleji kuti jili jekulungwa mnope.—Det. 6:6, 7.

Mfundo ja m’Baibulo: “Mwaleleje chenene [ŵanache ŵenu] soni mwajamucheje ni kwajiganya yakwamba Yehofa.”—Aef. 6:4.

YEHOFA MPAKA ŴAKAMUCHISYE KWALELA CHENENE ŴANACHE ŴAWO

Liŵasa likukambilana. Soni patebulo pana Baibulo jewugule. — Akambilane mkanipaŵe ya winji wa ŵanache ŵakusosekwa kukola

Akosecheleje mkanipaŵe. Naga akuganichisya yakuti akole ŵanache, akusosekwa kuganichisyasoni mwayiŵelele yindu pa umi wawo. Mwachisyasyo, naga akusagula yakola ŵanache ŵajinji, ana chachikombolaga kwapatila yakulya, yakuwala kapena kwajawusya kusukulu? Naga nganaŵa akombwele, akambilane ni mjawojo naga mpaka yisosekwe kunandiya chiŵalanjlo cha ŵanache ŵakusosekwa kukola ni chakulinga chakuti chakombole kwasamalila ŵanachewo mpela mwakusasachila Yehofa. Yili yisyene kuti Yehofa akusamanyilila kuti ngaŵa kuti yosope yikusatendekwa mu litala lyatwasachilaga. (Jwak. 9:11) Nambope, Yehofa chachakamuchisya naga akulingalinga kuti aŵe nangolo jwambone.

Mfundo sya m’Baibulo: “Yakulinga ya mundu jwakulimbichila yikusatendekwa, nambo ŵandu wosope ŵakusatenda yindu mwakupupuluma akusaŵa ŵakulaga.”—Mis. 21:5.

“Ana ŵani mwa jemanja pakusaka kutaŵa sanja nganaŵa atemi kaje pasi ni kuŵalanjila chenene, kuti alole naga akwete yakwanila kujimalichisya?”—Luk. 14:28.

Yehofa aŵeje pa malo gandanda m’liŵasa lyawo. Akuwoneje kumlambila Yehofa kuŵa kwakusosekwa mnope mu liŵasa lyawo. Naga akwete kala ŵanache akusosekwa kutenda yakuti amjiganyeje mwanache jwalijose pajika kumnonyela Yehofa. Ŵakamuchisyeje ŵanachewo kuti apinduleje pali pamisongano ja mpingo. Wiki jilijose atendeje Kulambila kwa Peŵasa. Ŵajiganyejesoni ŵanachewo mwampaka ajile pakulalichila. Ngakusosekwa kupeleka udindo wawo wakulela ŵanache kwa mwanache jwawo jwachikulile kapena kwa jwachibale jwawo. Yili yisyene kuti kwakamuchisya ŵanache kuti amnonyeleje Yehofa kukusasaka kulimbichila, nambope yakuyichisya yakwe yikusaŵa yambone.

Mfundo ja m’Baibulo: “Pangali chachikusasangalasya mnope kupunda kupikana kuti ŵanache ŵangu akukuyape yijiganyo yisyesyene.”—3 Yoh. 4.b

Amdalileje Yehofa. Chinga akuganichisya yakuti akole ŵanache kapena kukola ŵanache, akusosekwa kusimichisya kuti mfundo sya Yehofa sili syakusosekwa mnope kupunda ndamo soni misyungu ja ku malo kwakusatama.

Collage: 1. Achinangolo ali yimpepe ni mwanache jwawo jwamlume pa misongano ja mpingo. Mwanacheju ajimiche mkono kuti apeleche ndemanga. 2. Liŵasa likulalichila yimpepe. Baba akwenda ni mwanache jwakwe jwamkongwe pele mayi akwenda ni ŵanache ŵaŵili ŵachinandipile. — Kwasamalila ŵanache mwa usimu kukusasaka ndaŵi soni kulimbichila

Naga asagwile yakuti akakola ŵanache ŵajinji, akusosekwa kukulupilila yakuti Yehofa chachakamuchisya pachachikalambalapo. Akajigalikaga ni yakuŵecheta ya ŵandu kuti ŵawoneje ŵanache ŵawo mpela mpamba wa msogolo. Nambope, ngakusosekwa kogopa kuti yichamalila uli msogolo. Mwamti Yehofa jwasasile kuti chachasamalila. Sonitu ndaŵi syosope jwalakwe akusakwanilisya yilanga yakwe.—Yos. 23:14.

Mfundo sya m’Baibulo: “Mumkulupilileje Yehofa ni mtima wenu wosope, soni mkaliwonaga kuti mli ŵakupikanichisya yindu. Mumkumbuchileje jwalakwe mu yosope yamkutenda, soni jwalakwe chachijongola matala genu.”—Mis. 3:5, 6.

“Une naliji mwanache nambo apano ngusile, nambo nganinamwoneje mundu jwakulungama ali amjasile, kapena ŵanache ŵakwe alimkuŵendaŵenda yakulya.”—Sal. 37:25.

“Mpitilisye kusosasosa chandanda Uchimwene ni chilungamo chakwe, ni kaneko jwalakwe chachimpa jemanja yindu yine yosopeyi.”—Mat. 6:33.

Ŵanache ali mituka jele Yehofa ŵapele achinangolo. Mwamti Yehofa akusaŵa jwakusangalala pakwawona achinangolo ali mkulosya kuyamichila mtukawu. Jemanajaji akusasetanda yeleyi pakuganichisya ya winji wa ŵanache ŵakusosekwa kukola, pakuŵika pandanda mfundo sya Yehofa mmalo mwakulongosya ndamo soni misyungu ja ku dela jakutama, nambosoni pakwakamuchisya ŵanache ŵawo mwa kuchilu soni mwa usimu. Achinangolo pakutenda yeleyi akusalosya kuti ŵanache wawowo ali “mtuka wakutyochela kwa Yehofa.”

Ngakusaligamba Ata Panandi

Ana achinangolo akusasimana ni akusawusya naga asagwile yakuti akole ŵanache ŵamnono? Chiwusyo chelechi ni champaka aliwusyeje achinangolo ŵakusatyochela m’yilambo yakulaga. Alole yaŵaŵechete achinangolo ŵane ŵakutyochela m’yilamboyi pangani jeleji.

Ana ŵane ŵasalilaga kuti akole ŵanache ŵajinji?

“Elo, atamosesoni ŵane mu mpingo ŵaŵechetaga myoyo. Liŵasa line lyatuwusisye kuti, ‘Ligongo chichi mgambile kola mwanache jumo? Ku Africa kuno, kukola mwanache jumo yikusaŵa mpela kuti nganiwukola. Nambo naga mkwete ŵanache ŵaŵili, yikusaŵa mpela ukwete mwanache jumo.’ Mwamti patwakwete mwanache jwaŵili, ŵandu ŵapitilisyagape kuŵecheta.”—Jeremias

Ana pakwete pasimene ni yakusawusya ligongo lyakuti ŵasagwile yakuti akole ŵanache ŵamnono?

“Iyayi, nganitusimaneje ni yakusawusya yiliyose. Ligongo lyakuti twasagwile yakuti tukole ŵanache ŵamnono, yakamuchisye kuti tukomboleje kwasamalila ŵanache ŵetu mwakuchilu nambosoni chakusosekwa mnope chaliji mwa usimu. Nakulile mu liŵasa lya ŵanache ŵajinji, mwamti nayiwonaga yakusawusya yaŵasimanaga nayo achinangolo ŵangu pakusaka kutusamalila mwakuchilu soni kutujawusya kusukulu.”—Jeremias

Ana ŵanache ŵawo akusapikana uli mu mtima pakuganichisya yaŵasagwile jemanja?

“Ŵanache ŵetu ali ŵakusangalala ligongo nganasimana ni yakusawusya yaŵasimene nayo ŵanache ŵane ŵele achinangolo ŵawo ŵalagaga kwasamalila ligongo lyakuti ŵakwete ŵanache ŵajinji.”—Filipe

“Ŵanache ŵetu paŵakulaga, ŵaliji ŵakusangalala ligongo lyakuti ŵaliwonaga kuti akusamalilidwa soni kunonyeledwa. Twanonyelaga kunguluka ni abale ni alongo ŵakulimba mwa usimu, mwamti jemanjaji ŵatukamuchisye kuti tuliŵichile yakulinga ya usimu. Mwamti, apano ŵanache ŵetu akumtumichila Yehofa mpela jemanjajo.”—Carlos

Ana ni maumbone gapi gapatile ligongo lyakusagula kuti akakola ŵanache ŵajinji?

“Ligongo lyakuti twasagwile kuti tukakola ŵanache ŵajinji, yikamuchisye kuti tukomboleje kwasamalila. Yaka yitatu yipiteyi masengo gambone ganakamulaga gamalile. Myoyo, ligongo lyakuti nganitukola ŵanache ŵajinji, kuchengaku nganikuŵa kwakupweteka mnope ligongo yakombolekagape kulisamalila liŵasa lyangu.”—Jeremias

“Ligongo lyakuti twasagwile kuti tukakola ŵanache ŵajinji, yikamuchisye kuti tukomboleje kwasamalila ŵanache ŵetu mwakuchilu soni mwa usimu. Mwamti tuŵele tuli mkutumichila ku madela kukwasosechelaga ŵakulalichila ŵajinji. Nambosoni yiŵele yangasawusya kumkamuchisya mwanache jwalijose pajika. Apano, ŵanache ŵetu wosope akumtumichila Yehofa soni akwete yakulinga yambone ya usimu.”—Lenadi

Ana ni maloŵe gapi gakusaka kwasalila achinangolo achimjawo?

“Nakuweni kukwanilichikwa kwa lilemba lya Salimo 34:10b, lyalikusati, ‘Ŵandu ŵakusamsosasosa Yehofa ngasasoŵa chilichose chambone.’ Mwamti Yehofa aŵele ali mkutupa yiliyose yatwasosechelaga pa liŵasa lyetu.”—Rafael

a Ŵalombane ni ŵakusosekwa kusagula ya winji wa ŵanache ŵakusosekwa kukola, ndaŵi jachachikola ŵanachewo soni kusagula litala lyakulela lyangatyosya chitumbo. Pangali mundu jwalijose jwakusosekwa kwawelusya pa yindu yampaka asagule. (Alo. 14:4, 10-13) Konjechesya pelepa, Aklistu ŵalombele akusosekwa kukumbuchilaga malangiso gakusimanikwa pa 1 Akolinto 7:3-5.

b Atamose kuti ŵanache ŵakwasala m’Baibuloŵa ali ŵandu ŵele Yohane ŵajiganyisye yisyesyene, nambope achinangolo mpaka alijiganye kanakakwe pa maloŵe gajwaŵechete Yohanega.