Ana Akosechele Yakusawusya Yachachisimana Nayo Pachachibatisidwa?

1-2. Ana ni yindu yapi yampaka atende kuti akosechele yakusawusya yampaka asimane nayo palijiganyisye yisyesyene? Apeleche chisyasyo.

M’CHILAMBO cha Satanachi, tujembecheyeje kusimana ni yakusawusya. Mwamti Yesu jwakalamwisye ŵakumkuya ŵakwe kuti, “Yisyene yakuŵasya chiyiyicheje.” (Mat. 18:7) Myoyo, mwakamulana ni maloŵe ga Yesuga, tukusosekwa kukosechela yakusawusya yampaka tusimane nayo kupwatikapo yakutyochela kwa abale ni alongo ŵetu.

² Aganichisye ayi. Ŵandu ŵa Yehofa akusalimbikasidwa kuti akosecheleje ngosi syachilengedwe. Ana tukusatenda yeleyi chamti uli? Chandanda, tukusasosekwa kumanyilila ngosi syachilengedwe syampaka sitendekwe mu dela jetu. Mwamtitu yikusaŵa yakusosekwa mnope kutenda yeleyi naga tugambile kwika kwene mu delajo. Panyuma pakumanyilila ngosi syampaka sitendekwe, tukusasosekwasoni kulola yampaka tutende pakukosechela ngosisyo. (Mis. 21:5) Mwakulandanamo, tukusasosekwa kumanyilila yakusawusya yampaka tusimane nayo patulijiganisye yisyesyene soni kumanyilila yampaka tutende patusimene ni yakusawusyayo. Kutenda yeleyi mpaka kutukamuchisye kuti chitupilile patuchisimana ni yakusawusyayo soni kuti unasi wetu ni Yehofa ukasiwujonasika. (Sal. 17:5) Myoyo, kwende tukambilane yakusawusya yitatu yampaka tusimane nayo soni yampaka tutende pakukosechela kuti chitulimbane nayo.a

M’BALE KAPENA MLONGO PAŴAKUŴESYE

3. Ana ni chakusawusya chapi champaka tusimane nacho mumpingo?

³ Ana akukumbuchila muŵapikanile mu mtima paŵasimanikwe kandanda pa misongano ni kulola yakusatenda ŵandu ŵa Yehofa pakulosyana chinonyelo? Ana yiŵayiweniyi yakamuchisye kumanyilila kuti apatile yisyesyene? (Yoh. 13:35; Akolo. 3:12) Mwelemu ni muŵapikanile mlongo Blanca.b Nambope, jwalakwe paŵagambile kubatisidwa jwasimene ni chakusawusya changanachijembecheyaga. Jwalakwe jwatite, “Mlongo jwine jwandendele yindu yayambweteche mnope. Mwamti nayikopochelesoni kuti jwalakwe jwaŵechetaga yakusakala yakwamba ŵandu ŵane. Ligongo lyakuti nalijiganyisye kuti ŵa Mboni sya Yehofa akusalingalinga kuŵa ŵamtendele soni ŵachinonyelo, nganinjembecheyaga kuti yeleyi mpaka yitendekwe.” Yili yisyene kuti abale ni alongo ŵawo akusalingalinga kukola ndamo sya Chiklistu, nambope jemanjaji nganaŵa ŵamlama. (Aef. 4:​23, 24; 1 Yoh. 1:8) Myoyo, ndaŵi sine mpaka aŵechete kapena kutenda yindu yine yampaka yakuŵasye. (Yak. 3:8) Mwamti chakutesya chanasa chili chakuti, ŵane alesile kumtumichila Yehofa ligongo lya yeleyi.

4. Ana ni chichi champaka chakamuchisye kumanyilila yakusosekwa kutenda naga m’bale kapena mlongo jwakuŵesye? (Aefeso 4:32)

⁴ Ana ni chichi champaka chakamuchisye kumanyilila yakusosekwa kutenda naga m’bale kapena mlongo jwalemwechesye kapena kwakuŵasya? Ndaŵi syosope akamulichisyeje masengo malangiso gakusimanikwa pa Aefeso 4:32. (Aŵalanje.) Naga akutenda yakomboleka kuti akole ndamo ja chinonyelo soni jachanasa, yichakamuchisya kuti akagambaga kukangana ni ŵandu ŵane pa yindu yangali mate. Myoyo akusosekwa kukola chakulinga chakuti ŵakululuchileje ŵane paŵalemwechesye. Ana ni chichi champaka chakamuchisye kutenda yeleyi? Aganichisye yakusatenda wawojo pakumŵenda Yehofa ndaŵi ni ndaŵi kuti ŵakululuchile pamlemwechesye soni yakusatenda jwalakwe pakwakululuchila. (Mat. 6:12) Myoyo, naga ndaŵi syosope akuganichisya yakusatenda Yehofa pakwakululuchila, yichakamuchisya kuti ŵakululuchileje ŵane.

5. Ana ni mfundo japi ja m’Baibulo jampaka jitukamuchisye naga jwine atukuŵesye? (Misyungu 19:11) (Alolesoni yiwulili.)

⁵ Aŵalanje Misyungu 19:11. Baibulo jikusasala kuti naga mundu jwine atukuŵesye, lundac mpaka lutukamuchisye kunandiya ukali wetu. Mfundo jeleji jamkamuchisye mlongo Rima jwabatisidwe mu yaka yapachangakaŵapa. Jwalakwe jwatite, “Abale ni alongo panguŵesye kapena kulemwechesya, chandanda, ngusakumbuchila yayili pa lilemba lya Misyungu 19:11. Ngusaganichisyasoni yiyatendechele munyumamu soni mwayiŵelele yindu pa umi wawo. Kaneko ngusaganichisya ligongo lyakwe atesile yindu mu litala lyelelyo. Nambosoni ngusatenda yakomboleka kuti njinjileje nawo mu utumiki. Yeleyi yikusangamuchisya kuti namanyilileje chenene jemanjaji.” Kutendatu yeleyi kuli kwakamuchisya. Yili yakombolekatu kwamanyilila chenene abale ni alongo ŵetu apano. Patukwamanyilila chenene jemanjaji, yichitukamuchisya kuti twakululuchileje patukuŵesye.

6. Ana ni chichi champaka chitukamuchisye kuti tukamulaneje mnope ni abale ni alongo?

⁶ Ana akusosekwa kutenda chichi kuti akamulaneje ni abale ni alongo mumpingo mwawo? Pakukunguluka ni jemanjaji, agambeje kulola ndamo syambone syakwete. (Alole Misyungu 10:12; Alo. 12:10; Afil. 2:​2, 3) Yeleyi ni yayamkamuchisye Mark jwabatisidwe pachangakaŵapa. Jwalakwe piŵakungulukaga mnope ni abale ni alongo ŵa mumpingo mwakwe, jwatandite kumanyilila yakulepela yawo. Ana ni chichi chichamkamuchisye Mark kuti yakulepela ya jemanjaji yikamkuŵasyaga? Jwalakwe jwatite, “Nayikopochele kuti yindu yakusalemwesyaga abale ni alongo, yili yamwana pakuyilandanya ni yindu yakusakala yakusatenda ŵandu kuchilamboku. Myoyo, nasagwile yakuti ngatamilaga ganichisya yakulepela ya abale ni alongo. Mmalomwakwe natandite kuganichisya ya ndamo syambone syakwete jemanjaji.” Myoyo, naga wawojosoni akutenda yeleyi, chachiŵa pa unasi wambone ni abale ni alongo ŵawo.

NAGA ATANDITE KUMBILA YINDU YIŴAYILESILE MUNYUMA

7. Ana ni chichi champaka chitutendekasye kuti tuyikumbileje yindu yatwayilesile munyuma?

⁷ Paŵagambile kulijiganya yisyesyene, ngatukukayichila kuti ŵasangalele kuchileka chilambo chakusakalachi. Mwine ŵaliwusyaga kuti, ‘Ŵani ŵampaka asache kuwujilasoni ku yakutendekwa yakuchilamboku?’ Nambope, pandaŵi jasimene ni yakusawusya mpaka atande kuganichisya yindu yaŵatendaga mkanatande kumtumichila Yehofa, mwamti mpaka akumbileje kutendasoni yindu yeleyi. (Alole Numeli 11:​4-6.) Mwachisyasyo, komboleka kuti abale ŵane ŵalesile masengo gagaliji gapenani mnope. Sonitu ŵane paŵagambile kutanda kulijiganya Baibulo, achimjawo ŵaŵakungulukaga nawo pandanda ŵalesile kukunguluka nawo. Pele ŵane ŵayikene pakuleka ndamo syakusakala ni chakulinga chakuti amsangalasyeje Yehofa. Kusala yisyene, mpaka yiŵetu yakutesya chanasa kwa Mklistu naga akutenda yindu yaŵayilesile kalakala yampaka yimtendekasye kuleka kumtumichila Yehofa. Ana mpaka atende chichi kuti akakunda chindu chilichose kwatendekasya kutenda yindu yaŵayilesile kalakala?

8. Ana tukulijiganya chichi kutyochela kwa Abulahamu ni Sala?

⁸ M’Baibulo mwana yisyasyo ya ŵakutumichila ŵakulupichika ŵele yikaŵele yakomboleka kutanda kuyikumbila yindu yaŵayilesile munyuma. Mwachisyasyo, Abulahamu ni Sala ŵapikanile yiŵasalile Yehofa mwakutyoka mu msinda wakusichila wa Uli ni kutanda kutama m’matenti. (Aheb. 11:​8, 9) Ngatukukayichila kuti ndaŵi sine yikaliji yangasawusya kwa jemanjaji kukumbuchila yindu yaŵayilesile ku Uli. Mwamti “yikaŵe kuti jemanjaji ŵatamilaga kuganichisya” ya munyuma, yikatendekasisye kukola nganisyo syakuwujila. Nambo jemanjaji ŵaganichisyaga yindu yaŵasalile Mlungu kuti chachatendela.—Aheb. 11:​15, 16.

9. Ana ndumetume Paulo jwayiwonaga uli yindu yiŵayilesile munyuma? (Afilipi 3:​7, 8, 13)

⁹ Ndumetume Paulo jwalesile yindu yine ni chakulinga chakuti amtumichileje Yehofa. Mwachisyasyo, mkanaŵe kuŵa Mklistu, jwalakwe jwalijiganyisye Chilamusi cha Ayuda kutyochela kwa mtichala jwakumanyika mnope lina lyakwe Gamaliyele. (Mase. 22:3) Mwamti mkupita kwa ndaŵi, Paulo akaŵele pa udindo wakusosekwa mnope mu dini ja Chiyuda. (Agal. 1:​13, 14) Nambope, pajwagambile kulijiganya ngani syambone, jwalakwe jwalesile yajwatendagayi. Ana Paulo nganasimanaga ni yakusawusya panyuma pakuleka yinduyi? Yakusawusya yapali nditu. Mwachisyasyo, jwalakwe jwaputidwaga, kuŵichidwa mu ndende soni kuŵenjedwa ni Ayuda achimjakwe. (2 Akoli. 11:​23-26) Yikaŵe kuti jwalakwe jwagambaga ganichisya muwaŵelele umi wakwe mkanaŵe kuŵa Mklistu, komboleka yikamtendekasisye kuganisya kuti nganatenda chenene kusagula yakuŵa jwakumkuya jwa Klistu. Nambope, Paulo jwaganichisyaga ya upile wajwakwete wakuŵa jwakumkuya jwa Yesu soni yindu yambone yachachipata kusogolo. Jwalakwe jwaliji jwakusimichisya kuti kuŵa jwakumkuya jwa Yesu, chaliji chindu chakusosekwa mnope kupunda yindu yaŵayilesile.—Aŵalanje Afilipi 3:​7, 8, 13.

10. Ana ndaŵi syosope tukusosekwa kuganichisyaga ya chichi? (Maliko 10:​29, 30) (Alolesoni yiwulili.)

¹⁰ Ana tukulijiganya chichi pelepa? Naga atandite kukumbuchila yindu yiŵayilesile ni chakulinga chakuti aŵe Mklistu, akusosekwa kuganichisya yindu yayatendekasisye kuti ayileche yinduyo. (Jwak. 7:10) Akusosekwa kulandanya yindu yambone yapatile ligongo lyakulijiganya yisyesyene ni yindu yaŵayilesile munyuma. Apano ali pa unasi wambone mnope ni Yehofa. (Mis. 3:32) Sonitu ali mu liŵasa lya usimu lyalikusanonyelana mnope. (Aŵalanje Maliko 10:​29, 30.) Konjechesya pelepa, akwete sogolo jambone. (Yes. 65:​21-23) Myoyo, naga akusaganichisya ya upile wakupata apano ligongo lyakumtumichila Yehofa, yichakamuchisya kuti akatamilaga kuganichisya yindu yaŵayilesile munyuma.

11. Ana alijiganyisye chichi kutyochela pa yindu yaŵasimene nayo Mlongo Rosemary?

¹¹ Mlongo jwine lina lyakwe Rosemary jwabatisidwe ali akwete yaka ya mma 50. Kwende tulole yajwatesile kuti akagambaga kuganichisya yindu yaŵayilesile munyuma. Jwalakwe jwatite, “Panagambile kuŵa jwa Mboni sya Yehofa, nadandawulaga mnope pajiyiche ndaŵi ja Kilisimasi, ligongo pandaŵiji nakolaga ndaŵi jakukunguluka ni ŵa m’liŵasa lyangu. Nasangalalagasoni kupeleka mituka kwa ŵandu ŵa mwiŵasa mwangu. Mwamti ŵanache ni yisukulu yangu ŵasangalalaga papochele mituka janapaga. Yeleyi yandendekakasyaga kuŵa jwakusangalala.” Ana ni chichi chichamkamuchisye mlongoju? Jwalakwe jwatite, “Napatile chakutenda chine mmalo mwa Kilisimasi. Myoyo chaka chilichose, nambo ngaŵa palisiku lya Kilisimasi, ngusinasonganganya ŵandu ŵa m’liŵasa lyangu ni kwapa mituka soni kwasalila ligongo lyakwe ngusinanonyela.” Mlongo Rosemary jwasimenesoni ni chakusawusya chine. Jwalakwe jwatite, “Panagambile kulijiganya yisyesyene, achimjangu ŵalesile kunguluka ni une. Mwamti ndaŵi sine, natendaga lipowo soni nasoŵaga jemanjaji.”d Ana ni chichi chichamkamuchisye jwalakwe? Jwalakwe jwalinganyisye yakuti ajinjileje mu utumiki ni alongo ŵakulekanganalekangana. Jwalakwe jwatite, “Kutenda yeleyi kungamuchisye kuti ngole achimjangu ŵasambano ŵangusinanonyela mnope.” Ana mpaka alijiganye chichi kwa mlongoju? Komboleka mpaka atande kuyisoŵa yindu yaŵatendaga munyuma mkanaŵe kulijiganya yisyesyene. Nambope mpaka akombole kupata chindu chine champaka atendeje mmalo mwa yindu yakuyisoŵayo. (Afil. 4:​8, 9) Myoyo akumbuchileje kuti Yehofa chiŵapeje yindu yejinji kulekangana ni yindu yaŵayilesile.

NAGA ŴANE ALESILE KUMTUMICHILA YEHOFA

12. Ana ni chakusawusya chapi champaka asimane nacho mumpingo champaka chiŵe chakusawusya kuchipilila?

¹² Ngatukukayichila kuti paŵagambile kulijiganya yisyesyene, ŵaliji ŵakusangalala kuchileka chilambo chakusakalachi ni kuŵa mu gulu ja ŵandu ŵakusajiganyaga yisyesyene soni ŵakusalingalinga kutenda yindu yambone. (Yes. 65:14) Nambope, ndaŵi sine mpaka apikane kuti mundu jwine mumpingo atesile ulemwa, kapenasoni kwika pakutyosyedwa kwene. (1 Akoli. 5:13) Alole muyamkwayile yeleyi mlongo Samar. Jwalakwe jwatite, “Ndili ngambile kubatisidwa kwene, jwamkulungwa jwa mumpingo jwatesile ulemwa mpaka kwika pakumtyosya. Yeleyi yangwayiye mnope ligongo nganinganichisyaga kuti jwamkulungwa jwa mumpingo mpaka amlemwechesye Yehofa soni kwakuŵasya abale ni alongo.” Yili yisyene kuti ndaŵi syosope tukusasosekwa kulupilila kuti abale ni alongo ŵetu akusamnonyela Yehofa soni kuti akusalingalinga kuŵa ŵakulupichika kwa jwalakwe. (1 Akoli. 13:​4, 7) Nambope, tukusasosekwa kumanyilila kuti chaka chilichose ŵandu akusatyosyedwaga mumpingo. Soni yikusaŵa yakupweteka mnope naga mundu jwatyosyedwejo ali mundu jwatukusamnonyela mnope soni kumdalila.

13. Ana mpaka tutende chichi apano kuti tukasituwujila munyuma naga jwachibale jwetu ali alesile kumtumichila Yehofa?

¹³ Ana mpaka tutende chichi apano kuti tukasituwujila munyuma naga jwachibale jwetu ali alesile kumtumichila Yehofa? Akusosekwa kupitilisya kulimbisya unasi wawo ni Yehofa. (Yak. 4:8) Ngakusosekwa kukunda kuti chikulupi chawo chijegamileje pa mundu jwine. Mwachisyasyo, yili yisyene kuti ndaŵi syejinji tukusatenda yindu ya usimu pampepe ni mpingo soni liŵasa lyetu. Nambope, tukusasosekwasoni kupopelaga soni kuŵalanga Baibulo pajika.—Sal. 1:2; 62:8.

14. Ana tukulijiganya chichi kutyochela kwa ndumetume Petulo? (Yohane 6:​66-68)

¹⁴ Yaŵatesile ndumetume Petulo pandaŵi jele ŵakulijiganya ŵane ŵalesile kumkuya Yesu mpaka yitujiganye kanekakwe. Kombolekatu yaŵatesile ŵanduŵa yikamsokonasisye jwalakwe. Nambo alole yajwaŵechete pa Yohane 6:​66-68. (Aŵalanje.) Mmalo mwakuti aganichisyeje yindu yiŵatendaga ŵane, jwalakwe jwaŵikaga nganisyo syakwe pa yindu yisyesyene yiŵapikene kutyochela kwa Yesu. Mwamti yiŵatendaga ŵaneyi nganiyimkuŵasya jwalakwe. Mwakulandanamo, akakundaga kuti yakutenda ya ŵane yatendekasyeje kukayichila yindu yaŵalijiganyisye mu gulu ja Yehofaji. Mmalomwakwe, apitilisyeje kuyamichila yisyesyene yaŵalijiganyisye. Mlongo Samar jwatumkolasile kundanda jula jwatite, “Ndaŵi syosope ngusalikumbusya kuti naga mundu jumo alemwisye ngayikusagopolela kuti mpingo wosope ulemwisye kapena kuti yalikusajiganya likugali yili ya unami.”

15. Ana alijiganyisye chichi kutyochela pa yindu yayamtendechele Emily?

¹⁵ Aganichisye chisyasyo cha Emily. Pali pagambile kumala wiki jimo kutyochela pajwabatisidwe, mamagwe ŵalilesile liŵasa lyawo soni ŵatyosisye mumpingo. Emily jwatite, “Nganinganichisyaga kuti yeleyi mpaka yitendekwe. Yeleyitu yili yakusawusya mnope kwa une, mwamti nasoŵile mnope mamaŵa.” Ana ni chichi chichamkamuchisye Emily? Jwalakwe jwatite, “Nganimba jika. Baba ŵangu soni abale ni alongo mumpingo aŵele ali mkungamuchisya, mwamti jemanjaji ali mpela ŵa mwiŵasa mwangu. Jwalijose akusasimana ni yakusawusya. Ni ligongo lyakwe yili yakusosekwa kuti tuŵeje ŵakamulana soni kulimbikasyana jwine ni mjakwe.” (1 Pet. 5:9) Myoyo akajembecheyaga kuti asimane kaje ni yakusawusya ni kutanda kulimbisya unasi wawo ni abale ni alongo. Mwamti ndaŵi jambone jakutendela yeleyi jili ajino. Sonitu yeleyi, yichakamuchisya kuti akasatenda lipowo pachachisimana ni yakusawusya.

16. Ana tukusosekwa kukumbuchilaga chichi? (Alolesoni chiwulili.)

¹⁶ Akumbuchileje kuti Yehofa akusiŵajamuka ŵandu ŵakusiŵanonyela. (Aheb. 12:6) Jwalakwe akusasaka kuti wosope ŵaŵatyosisye mumpingo awujilesoni. (2 Pet. 3:9) Myoyo, naga jwachinasi jwawo jwatyosyedwe mumpingo, mpaka aŵe ŵakusimichisya kuti achakulungwa ŵa mumpingo chatende yiliyose yakomboleka pakumkamuchisya kuti awujilesoni kwa Yehofa.—2 Tim. 2:​24, 25.

17. Ana akusosekwa kusimichisya ya chichi?

¹⁷ Pelepatu tugambile kukambilana yakusawusya yamnonope yampaka asimane nayo panyuma pakubatisidwa. Yili yisyene kuti yakusawusya yine mpaka yiŵe yekulungwa, nambo ngakusosekwa kutenda woga. Mwamti pana yejinji yampaka atende pakukosechela. Nambosoni, ngakusosekwa kuliŵalila kuti Yehofa ali kumbali jawo. Jwalakwe ŵakamuchisye kala wawojo, mwamti chiŵakamuchisyejepe mpaka kalakala. (1 Pet. 5:10) Jwalakwe chapitilisye kwapa machili gakwakamuchisya kuti akomboleje kupilila yakusawusya yampaka asimane nayo. Myoyo, naga akukunda kuti Yehofa jwakamuchisyeje, nikuti pangali chakusawusya chilichose champaka chatendekasye kuti aleche kumtumichila jwalakwe.—Sal. 119:165; Alo. 8:​38, 39.