NGANI JAKULIJIGANYA 36
NYIMBO NA. 103 Ŵakuchinga Ali Mituka mwa Achalume
“Ŵaŵilanje Achakulungwa ŵa Mumpingo”
“Jwelejo ŵaŵilanje achakulungwa ŵa mumpingo.”—YAK. 5:14.
CHAKULINGA CHA NGANIJI
Chitukambilane ligongo lyakwe kwaŵenda achakulungwa ŵa mumpingo kuti atukamuchisye kuli kwakusosekwa mnope.
1. Ana Yehofa akusalosya chamti uli kuti ŵakutumichila ŵakwe ali ŵakusosekwa mnope kwa jwalakwe?
YEHOFA akusiŵawona ŵakutumichila ŵakwe kuŵa ŵakusosekwa mnope. Yili myoyo ligongo lyakuti jwalakwe ŵasumile jemanjaji ni myasi ja Yesu. Mwamti ŵasalile achakulungwa ŵa mumpingo kuti ŵasamalileje jemanjaji. (Mase. 20:28) Mlungu akusasaka kuti ŵakutumichila ŵakwe asamalidweje mwachinonyelo. Mwamti achakulungwa ŵa mumpingo akusakuya malangiso ga Yesu pakwakamuchisya jemanjaji kuti apitilisye kuŵa paunasi wambone ni Yehofa.—Yes. 32:1, 2.
2. Ana Yehofa akusatenda chidwi mnope ni ŵani? (Esekiyele 34:15, 16)
2 Yehofa akusiŵaganichisyaga ŵakutumichila ŵakwe wosope. Nambope, jwalakwe akusiŵasamalilaga mwapadela ŵakutumichila ŵakwe ŵele unasi wawo ni jwalakwejo utandite kusokonechela. Mwamti kupitila mwa achakulungwa ŵa mumpingo, jwalakwe akusiŵasamalilaga ŵandu ŵatandite kulwala mwausimu. (Aŵalanje Esekiyele 34:15, 16.) Nambotu Yehofa akusasaka kuti tutandeje m’weji kusosasosa chikamuchisyo patukusosechela. Mwamti kupwatika pa kumŵenda Yehofa kuti atukamuchisye, jwalakwe akusasakasoni kuti tuŵendeje chikamuchisyo kwa “abusa soni ŵakwiganya” mumpingo.—Aef. 4:11, 12.
3. Ana kuganichisya udindo wakwete achakulungwa ŵa mumpingo mpaka kutukamuchisye chamti uli?
3 Mungani ajino, chitulijiganye dongosolo jaŵalinganyisye Yehofa kuti achakulungwa ŵa mumpingo atukamuchisyeje, unasi wetu ni jwalakwe pautandite kusokonechela. Myoyo, nganiji chijijanje yiwusyo ayi: Ana ni ndaŵi japi jatukusasosekwa kuŵenda chikamuchisyo kwa achakulungwa ŵa mumpingo? Ligongo chichi tukusasosekwa kutenda yeleyi? Soni ana jemanjaji akusatukamuchisya chamti uli? Chinga apano unasi wetu ni Yehofa uli chenene, kwanga kwa yiwusyoyi mpaka kutukamuchisye kuti tuyamichileje mnope dongosolo jaŵalinganyisye Yehofaji. Mwamti nganiji chijitukamuchisye kumanyilila yampaka tutende patuchisosekwa chikamuchisyo cha achakulungwaŵa.
ANA NI PANDAŴI JAPI JATUKUSASOSEKWA ‘KWAŴILANGA ACHAKULUNGWA ŴA MUMPINGO’?
4. Ana tukumanyilila chamti uli kuti yayili pa Yakobo 5:14-16, 19, 20 yikusasala ya mundu jwakulwala mwausimu? (Alolesoni yiwulili.)
4 Ndumetume Yakobo jwalondesisye yakusatenda Yehofa pakwakamulichisya masengo achakulungwa ŵa mumpingo kuti atukamuchisyeje. Jwalakwe jwalembile kuti, “Ana pasikati penu pana jwalijose jwakulwala? Jwelejo ŵaŵilanje achakulungwa ŵa mumpingo.” (Aŵalanje Yakobo 5:14-16, 19, 20.) Yeleyitu yikulosya kuti Yakobo jwasalaga ya kulwala mwausimu. Mwachisyasyo, jwakulwalaju akumsalila kuti ŵaŵilanje achakulungwa ngaŵaga adokotala. Konjechesya pelepa, Yakobo akulondesyasoni kuti jwakulwalaju chalame naga yakulemwa yakwe yikululuchidwe. Nambope yindu yakusasosekwa kutenda mundu jwakulwala mwausimu kuti aŵe chenene yikusalandana ni yindu yakusasosekwa kutenda mundu jwakwete ulwele usyesyene kuti apole. Mwachisyasyo, kuti jwakulwala aŵe chenene akusasosekwa kuwonegana ni adokotala ni kwalondechesya chachikumpweteka. Kaneko akusasosekwa kupikanila malangiso gakutyochela kwa adokotalawo. Mwakulandana ni yeleyi, m’wejisoni patulwasile mwausimu tukusasosekwa kumlondechesya jwamkulungwa jwa mumpingo ya chakusawusya chetu. Kaneko tukusasosekwa kukuya malangiso gampaka atupe kutyochela m’Baibulo.
Patulwasile tukusajawula kwa dokotala; nambo patuwujile munyuma mwausimu tukusaŵenda chikamuchisyo kwa achakulungwa ŵa mumpingo (Alole ndime 4)
5. Ana mpaka tumanyilile chamti uli kuti unasi wetu ni Yehofa utandite kusokonechela?
5 Buku ja Yakobo chaputala 5, jikusatulimbikasya kuti twaŵendeje achakulungwa ŵa mumpingo kuti atukamuchisyeje patukuyiwona kuti unasi wetu ni Yehofa utandite kusokonechela. Mwamti mpaka luŵe lunda kuŵenda chikamuchisyochi unasi wetu ni Yehofa mkaniwusokonechele mnope. Baibulo jikusasala kuti mpaka tulilambusyeje munganisyo mwetu ni kuyiwonaga kuti unasi wetu ni Yehofa uli chenene. (Yak. 1:22) Yeleyi ni yayatendechelesoni Aklistu ŵa m’yaka 100 yandanda ŵa mumpingo wa ku Sade. Mwamti Yesu ŵasalile jemanjajo kuti yaŵatendagayo nganiyimsangalasyaga Yehofa. (Chiw. 3:1, 2) Chindu chimo champaka chitukamuchisye kumanyilila naga unasi wetu ni Yehofa uli chenene kapena iyayi chili kulandanya yatukuti pakulipeleka apano pakumtumichila Yehofa ni mwatwatendelaga munyumamu. (Chiw. 2:4, 5) Mpaka tuliwusye kuti, ‘Ana ngusasangalalaga panguŵalanga Baibulo soni kuganichisya mwakusokoka yanguŵalangayo mpela munatendelaga pandanda? Ana ngusayiwona kuŵa yakupesya kukosechela soni kwawula kumisongano? Ana ndesile kulipeleka pamasengo gakulalichila? Ana ngusamalilaga ndaŵi jejinji pakutenda yakusangalasya soni kuganichisya mnope yindu yangwete?’ Naga akwanga kuti elo pa chimo mwa yiwusyoyi, mpaka yilosye kuti unasi wawo ni Yehofa utandite kusokonechela, mwamti mpaka asosekwe kutendapo kandu mwachitema. Naga ngatukumanyilila yampaka tutende kapena naga tukasile kala mfundo sya m’Baibulo, nikuti mpaka tusosekwe kwaŵenda achakulungwa ŵa mumpingo kuti atukamuchisye.
6. Ana ŵandu ŵatesile ulemwa wekulungwa akusosekwa kutenda chichi?
6 Ŵandu ŵatesile ulemwa wekulungwa wampaka utendekasye kuti atyosyedwe mumpingo akusasosekwa kwasalila achakulungwa ŵa mumpingo. (1 Akoli. 5:11-13) Yili myoyo ligongo lyakuti mundu jwatesile ulemwa wekulungwa akusasosekwa kumkamuchisya kuti aŵesoni paunasi wambone ni Yehofa. Kuti Yehofa atukululuchile kupitila mu mbopesi jakutuwombola, tukusasosekwa kutenda “yindu yakulosya kugalawuka mtima.” (Mase. 26:20) Yindu yeleyi mpaka yipwatichepo kwasalila achakulungwa ŵa mumpingo patutesile ulemwa wekulungwa.
7. Ana ŵani ŵakusasosekwasoni chikamuchisyo cha achakulungwa ŵa mumpingo?
7 Achakulungwa ŵa mumpingo ngakusagamba kwakamuchisya ŵandu ŵatesile ulemwa wekulungwape, nambo akusiŵakamuchisyasoni ŵandu ŵakulimbana ni kumbila yindu yakusakala. (Mase. 20:35) Mundu mpaka alajeje ni yeleyi mnopemnope naga mkanalijiganye yisyesyene ŵatendaga yakusakala mpela kukamulichisya masengo mitela jakusokonasya mtwe, kulolela yakuŵagula, kapena kutenda yachikululu. Naga wawojo akulaga ni yindu yeleyi, ngakusosekwa kulimbanaga nayo mwajika jawo. Mpaka asagule kumsalila jwamkulungwa jwa mumpingo jwakumwona kuti mpaka ŵapikanile chenene, soni jwampaka ŵape malangiso gakamuchisya. Nambosoni jwampaka ŵasimichisye kuti wawojo mpaka amsangalasye Yehofa naga akuŵambala kutenda yakusakalayo. (Jwak. 4:12) Ndaŵi sine mpaka atenguche ligongo lyakuti akulimbanape ni yakumbila yakusakala kwandaŵi jelewu. Payitendekwe yeleyi, achakulungwa ŵa mumpingo mpaka ŵakumbusye kuti yeleyo yikwamba kulosya kuti wawojo akusawuwona unasi wawo ni Yehofa kuŵa ŵakusosekwa mnope mwamti nganakola mtima wakulidalila.—1 Akoli. 10:12.
8. Ana tukusasosekwa kwasalila achakulungwa ŵa mumpingo chilichose chatulemwisye? Alondesye.
8 Ngatukusosekwa kwasalila achakulungwa ŵa mumpingo chilichose chatulemwisye. Mwachisyasyo, tujile kuti wawojo aŵechete yindu yayimtumbilikasisye m’bale kapena mlongo jwinejwakwe. Kapena mwine wawojo ni ŵatumbile mnope. Pangani mpela syelesi, akusosekwa kukamulichisya masengo yajwasasile Yesu pakwamba yakutamilikasya mtendele pasikati pa wawojo ni mlongo mjawojo, mmalo mwakuwutuchila kwasalila achakulungwa ŵa mumpingo. (Mat. 5:23, 24) Mwamti mpaka alinganye yakulijiganya m’mabuku getu yampaka atende kuti aŵe mundu jwakufasa, jwakuwusimana mtima soni jwakulilekasya. Nambope naga alepele kupikangana ni mjawojo mpaka asosekwe kwaŵenda achakulungwa ŵa mumpingo kuti ŵakamuchisye. Yakulandanayi ni yayamtendechele Yuodiya ni Suntuke. Jemanjaji ali alepele kukamulana pa yindu yaŵatindene nganisyo, ndumetume Paulo jwamŵendile jwamkulungwa jwine kuti ŵakamuchisye. Mwamti nombenawo achakulungwa ŵa mumpingo mwawo mpaka ŵakamuchisye.—Afil. 4:2, 3.
LIGONGO CHICHI TUKUSOSEKWA KWAŴILANGA ACHAKULUNGWA ŴA MUMPINGO?
9. Ligongo chichi ngatukusosekwa kutenda sooni kwaŵilanga achakulungwa ŵa mumpingo patutesile chakulemwa? (Misyungu 28:13)
9 Patutesile ulemwa wekulungwa kapena patukulepela kumalana ni yakumbila yakusakala, tukusasosekwa kola chikulupi soni kulimba mtima kuti tukombole kwaŵenda achakulungwa ŵa mumpingo kuti atukamuchisye. Mwamti ngatukusosekwa kutenda sooni kwasalila achakulungwa ŵa mumpingo. Tukuŵecheta yeleyi ligongo lyakuti Yehofa atupele achakulungwaŵa kuti atukamuchisyeje kupitilisya kulimbisya unasi wetu ni jwalakwejo. Myoyo patukwasalila jemanjaji tukusalosya kuti tukusamkulupilila soni kumpikanila Yehofa. Nambosoni tukusamanyilila kuti tukusasosechela chikamuchisyo chakwe kuti tupitilisye kutenda yakuŵajilwa. (Sal. 94:18) Myoyo patutesile chakulemwa, Yehofa mpaka atukululuchile naga tukusala chakulemwacho kwa achakulungwa ŵa mumpingo soni naga tukuleka kutendasoni chakusakalacho.—Aŵalanje Misyungu 28:13.
10. Ana chichi champaka chitendekwe naga tukusisa ulemwa wetu?
10 Mpaka tupate upile naga tukwaŵenda achakulungwa kuti atukamuchisye pa ulemwa watutesile. Nambo yindu nganiyiŵa yitujendele chenene naga tukulinga kusisa yakulemwa yetuyo.Yeleyi ni yayamtendechelesoni Mwenye Daudi. Jwalakwe pajwalingaga kusisa yakulemwa yakwe, jwalasile mnope. (Sal. 32:3-5) Patulwasile ni kutama kwandaŵi jelewu mkanitupate chikamuchisyo cha mtela, ulwele wetuwo ukusakula mnope. Mwakulandana ni yeleyi, naga tutesile ulemwa ni ngatukwasalila mwachitema achakulungwa ŵa mumpingo, unasi wetu ni Yehofa mpaka usokonechele. Yehofa jwangasakaga kuti yeleyi yitutendechele. Ni ligongo lyakwe jwalakwe akusatulimbikasya kuti twaŵendeje achakulungwaŵa kuti atukamuchisyeje kulinganya unasi wetu ni Yehofajo.—Yes. 1:5, 6, 18.
11. Ana ŵane mpaka yakwaye chamti uli naga tukusisa ulemwa wekulungwa?
11 Naga tutesile ulemwa wekulungwa ni tukusisa, mpaka yakwayesoni ŵane. Kusisa ulemwa mpaka kutendekasye kuti msimu wa Yehofa uleche kukamula masengo mumpingo soni mpaka yisokonasye mtendele wa abale ni alongo. (Aef. 4:30) Myoyo naga tumanyilile kuti mundu jwine atesile chakulemwa chekulungwa, tukusosekwa kumlimbikasya kuti akasalile achakulungwa ŵa mumpingo. Nambo naga jwalakwejo ngajukwasalila, m’weji tukusosekwa kuja kukwasalila jemanjajo. Ligongo naga nombe m’weji tukusisa ulemwa wa mjetuwo nikuti tuchikola magambo. (Lef. 5:1) Kumnonyela Yehofa mpaka kututendekasye kuti tukasale kwa achakulungwa jwine patesile chakulemwa chekulungwa. Pakututenda myoyo, tukusaŵa kuti tukwachenjela abale ni alongo mumpingo soni kumkamuchisya mundu jwatesile chakulemwajo kuti aŵesoni paunasi wambone ni Yehofa.
YAKUSATENDA ACHAKULUNGWA ŴA MUMPINGO PAKUTUKAMUCHISYA
12. Ana achakulungwa ŵa mumpingo akusiŵakamuchisya chamti uli ŵandu ŵele unasi wawo ni Yehofa usokonechele?
12 Baibulo jikusijasalila achakulungwa ŵa mumpingo kuti ŵakamuchisyeje ŵandu ŵakusosekwa kulinganyasoni unasi wawo ni Yehofa. (1 Ates. 5:14) Wawojo patesile ulemwa, achakulungwaŵa mpaka ŵawusye yiwusyo kuti amanyilile nganisyo syawo soni mwakupikanila mumtima. (Mis. 20:5) Kwalondechesya mwagopoka achakulungwaŵa mpaka kwakamuchisye mnope. Akusosekwa kutenda yeleyi atamose yili mkuti wawojo akutenda sooni kulondesya nganijo. Pakwalondechesya achakulungwa, wawojo ngakusosekwa kutenda woga kuti maloŵe gawo chigaŵe “gangaŵajilwa.” (Yob. 6:3) Mwamti achakulungwawo ngasawutuchila kwapa malangiso mkanaŵe kujipikanichisya ngani josopejo. (Mis. 18:13) Jemanjaji akusamanyilila kuti kwasamalila ŵakutumichila ŵa Yehofa kukusasaka ndaŵi jakwanila. Mwamti achakulungwaŵa ŵangajembecheyaga kuti mpaka amkamuchisye mundu pagambile kuŵechetana najo kampepe basi.
13. Ana achakulungwa ŵa mumpingo mpaka atukamuchisye chamti uli kupitila m’mapopelo gawo soni malangiso ga m’Baibulo gampaka atupe? (Alolesoni chiwulili.)
13 Wawojo paŵendile kuti achakulungwa ŵa mumpingo ŵakamuchisye, jemanjaji ngasiŵatendekasya kuti alijimbeje mnope magambo. Mmalomwakwe achakulungwaŵa chachapopelela. Mwamti mpaka asangalale kumanyilila kuti lipopelo lyakusapeleka jemanjaji “likusaŵa lyamachili” mnope. Chikamuchisyo champaka ŵape mpaka chipwatichepo ‘kwapakasya [wawojo] mawuta m’lina lya Yehofa.’ (Yak. 5:14-16) Mwamti “mawuta” gelega gakusajimila yisyesyene ya m’Maloŵe ga Mlungu. Myoyo achakulungwaŵa chachikamulichisya masengo mwalunda Baibulo pakusaka kwalimbikasya soni kwakamuchisya wawojo kuti aŵesoni paunasi wambone ni Yehofa. (Yes. 57:18) Malangiso ga m’Baibulo gampaka ŵape achakulungwaŵa mpaka galimbikasye kuti apitilisye kutenda yakuŵajilwa. Mwamti kupitila mwa jemanjaji, mpaka apikane maloŵe ga Yehofa gali mkwasalila kuti, “Litala ni ali, mjende mwelemu.”—Yes. 30:21.
Achakulungwa ŵa mumpingo akumlimbikasya mundu jwawujile munyuma (Alole ndime 13-14)
14. Mwakamulana ni Agalatiya 6:1, ana achakulungwa ŵa mumpingo akusamkamuchisya chamti uli mundu jwajigele “litala lyakulemwecheka”? (Alolesoni yiwulili.)
14 Aŵalanje Agalatiya 6:1. Mklistu jwajigele “litala lyakulemwecheka” akusaŵa kuti akutenda yindu yangakamulana ni ndamo syakulungama sya Mlungu. Mpaka yiŵe kuti mwine jwalakwe asagwile yindu mwangali lunda kapena atesile ulemwa wekulungwa. Payitendekwe yeleyi, achakulungwa ŵa mumpingo ‘ŵele msimu weswela ukwalongolela chachilingalinga kumkamuchisya mundujo ni mtima wakufasa.’ Liloŵe lya Chigiliki liŵaligopolele kuti “kumkamuchisya” mpaka ligopolelesoni kuwuchisya liwupa mmalo mwakwe pakusaka kumkamuchisya mundu kuti akalemala. Dokotala akusawuchisya liwupa mmalomwakwe kwineku ali mkulingalinga kuti mundujo akapikana kupweteka mnope. Mwakulandana ni yeleyi, nombenawo achakulungwa ŵa mumpingo akusalingalinga kumkamuchisya mundu kwineku ali mkuŵambala kumtendekasya kulijimba mnope magambo. Mwamti Baibulo jikusijasalila jemanjaji kuti aŵeje ‘ŵakusamala pakutenda yeleyi.’ Achakulungwaŵa pakutukamuchisya kulinganya unasi wetu ni Yehofa, akusamanyililaga kuti nombenawo ali ŵangali umlama mwamti mpaka atende ulemwa. Myoyo, mmalo mwakuyiwona kuti jemanjaji nganaŵa alemwisye, soni kuliwona kuti ali ŵakulungama, achakulungwaŵa akusalingalinga kuŵa ŵachanasa.—1 Pet. 3:8.
15. Ana mpaka tutende chichi naga tukwete chakusawusya?
15 Tukusosekwa twakulupilileje achakulungwa ŵa mumpingo. Yili myoyo ligongo lyakuti achakulungwaŵa ŵalijiganyisye kuti akasalilaga ŵane ngani syamtemela syakwamba mundu jwine. Ŵalijiganyisyesoni kuti akakamulichisyaga masengo ya mumtwe mwawo pakumkamuchisya mundu, mmalomwakwe akamulichisyeje masengo Baibulo. Nambosoni akusamanyilila kuti akusasosekwa kupitilisya kutukamuchisya kulimbana ni yakusawusya yetu. (Mis. 11:13; Agal. 6:2) Atamose kuti achakulungwaŵa akusaŵa ŵakulekangana umundu soni yakusamanyilila, nambope mpaka tusagule kumsalila chakusawusya chetu jwamkulungwa jwalijose. Nambo tuŵambaleje kuŵenda malangiso kwa achakulungwa ŵakulekanganalekanga pakwamba kusaka kupata jwampaka akamulane ni nganisyo syetu. Ligongo naga tukutenda yeleyi, tuchiŵa mpela ŵandu ŵakusajembecheya ‘kupikana yakusaka’ mmalo mwakulijiganya “yijiganyo yisyesyene” yakutyochela m’Maloŵe ga Mlungu. (2 Tim. 4:3) Naga tukumsalila jwamkulungwa jwa mumpingo chakusawusya chetu, jwalakwejo mpaka atuwusye naga nganijo twasalile kala achakulungwa ŵane. Mwamti mpaka asachesoni kumanyilila malangiso gaŵatupele jemanjajo. Kulinandiya kuchimtendekasya jwalakwejo kuŵenda malangiso kwa jwamkulungwa mjakwe mkanaŵe kutukamuchisya.—Mis. 13:10.
UDINDO WATUKUSAKOLA
16. Ana wosopewe tukwete udindo wamti uli?
16 Achakulungwa ŵa mumpingo akusatupa malangiso soni kutukamuchisya patusimene ni yakusawusya. Nambo jemanjaji nganakola udindo wakutusagulila yakutenda. M’weji ni ŵatukwete udindo wakutenda yindu mwakamulana ni yakusasaka Mlungu. Mwamti tuchijanga jika magambo pa yindu yatukusaŵecheta soni kutenda. Nambope Yehofa mpaka atukamuchisye kuti tupitilisye kuŵa ŵakulupichika kwa jwalakwe. (Alo. 14:12) Myoyo, mmalo mwakutusagulila yakutenda, achakulungwaŵa chachitusalila nganisyo sya Mlungu syasikusasimanikwa m’Baibulo. Mwamti patukukuya malangiso ga m’Baibulo gampaka atupe achakulungwaŵa, tuchikombola ‘kukamulichisya masengo machili getu gakuganisya’ pakusagula yindu mwalunda.—Aheb. 5:14.
17. Ana ndaŵi syosope tukusosekwa kulingalinga kutenda chichi?
17 Kusala yisyene, tukwete upile wekulungwa wakuŵa ŵakutumichila ŵa Yehofa. Jwalakwe jwatumisye “m’busa jwambone,” jwali Yesu kuti apeleche mbopesi jakutuwombola ni chakulinga chakuti tupate upile wakola umi wangamala. (Yoh. 10:11) Mwamti kupitila mwa achakulungwa ŵa mumpingo, Yehofa akukwanilisya maloŵe gakwe gakuti, “Tinjimpa ŵakuchinga ŵakusambikanila une. Jemanjajo tachimlongolela mwa lunda ni mwa umanyilisi wosope.” (Yel. 3:15) Myoyo, patuyikopochele kuti chikulupi chetu chitandite kunandipa, kapena patutesile ulemwa, twaŵilanjeje mwachitema achakulungwa ŵa mumpingo kuti atukamuchisye. Kwende ndaŵi syosope tulinjelinjeje kwaŵenda achakulungwa ŵa mumpingo kuti atukamuchisyeje ligongo Yehofa akwakamulichisya masengo jemanjaji.
NYIMBO NA. 31 Ajendeje ni Mlungu!