Akamulichisyeje Masengo Chenene Ligalasi

Yakobo jwasasile kuti Baibulo jili mpela ligalasi lyalikusatukamuchisya kulola umundu wetu wa mkati. (Yak. 1:​22-25) Ana mpaka tukamulichisye masengo chamti uli Baibulo mpela ligalasi?

Ajiŵalanjeje mwakusamala. Naga tukulilolela paligalasi mwakuwutuka, mpaka tulepele kulola yindu yine yanganiyiŵa chenene. Mwakulandana ni yeleyi, naga tukuŵalanga Baibulo mwakuwutuka, nganituŵa tukombwele kulola mbali sine sya umundu wetu syatukusosekwa kuchenga. Nambo kuti tukombole kutenda yeleyi, tukusosekwa kuŵalangaga Baibulo mwakusamala.

Aloleje yakusosekwa kulinganya wawojo mmalo mwakulola ya ŵane. Ndaŵi sine, mundu pawukulilolela paligalasi mpaka ukombole kulola yakulemwecheka yayili pangope ja mundu jwine jwali chiŵandika ni ugwejo. Mwakulandana ni yeleyi, mpaka yikombolechesoni kukamulichisya masengo Baibulo pakulola yakulepela ya ŵane. Nambope, kutenda yeleyi nganikuŵa kutukamuchisye kulinganya yakulepela yetu.

Aŵeje ŵaganisya chenene. Ndaŵi sine mpaka tutenguche patukulinganya yakulepela yetu yatuyiweni kupitila paligalasi. Myoyo, tukusasosekwa kuŵa ŵaganisya chenene patukuŵalanga Baibulo kuti tuŵambaleje kuganisya kuti mpaka tutende yejinji kupunda yakusajembecheya Yehofa kwa m’weji.—Sal. 103:14.