Ana Yehofa Akusambona Kuti Ndili Mundu Jwatuli?

1. Ana Baibulo jikulandana catuli ni ligalasi?

¹ Ana wawojo palisiku akusalilolelaga kalingwa paligalasi? Wosopewe tukusalilolela paligalasi lisiku lililyose ligongo likusatukamucisya kumanyilila mwatukuwonecela, soni yatukusosekwa kucenga pacilu cetu. Baibulo akusajiwanicisya ni ligalasi. Kuŵalanga Maloŵe ga Mlungu kukusatukamucisya kumanyilila umundu wetu wam’kati, wele Yehofa akusawuwonaga. (1 Sam. 16:7; Yak. 1:22-24) Maloŵe ga Mlungu mpaka gatukamucisye “kumanyilila citemape nganisyo ni lisosa lya mtima.” (Ahe. 4:12) Ana kuŵalanga ni ganicisya yatuŵalasile m’Baibulo mpaka kutukamucisye catuli kulola mbali syatukusosekwa kucenga kuti tuŵe ŵakulalicila ŵambone?—Sal. 1:1-3.

2. Ana Baibulo mpaka jitukamucisye catuli kuliwungunya?

² Akamulicisyeje Masengo Baibulo Mpela Ligalasi: Ngani sya m’Baibulo syakwamba ya ŵakutumicila ŵakulupicika ŵa Yehofa sikusatujiganya ndamo syasikusamsangalasya jwalakwe. Mwambone, Daudi jwaliji jwakusacilila kulicenjela lina lya Mlungu kuti ŵandu akalisakasya. (1 Sam. 17:45, 46) Yesaya ŵalosisye kulimba mtima pakulipeleka kuti akalalicile kumkuli wakusawusya. (Yes. 6:8, 9) Yesu ŵakuwonaga kulalicila kuŵa kwakusangalasya ngaŵaga kwakusitopesya ligongo jwalakwe ŵanonyelaga mnope Atati ŵakwe ŵakwinani. (Yoh. 4:34) Aklistu ŵandanda ŵalalicilaga mwamtawu, ŵajegamilaga Yehofa, soni nganasakaga cilicose kwalepelekasye kutenda yeleyi. (Mase. 5:41, 42; 2 Akoli. 4:1; 2 Tim. 4:17) Kuganicisya yisyasyo mpela yeleyi mpaka kutukamucisye kuti tumtumicileje Mlungu mwakuŵajilwa.

3. Ligongo cici ngatukusosekwa kucelewa kucenga naga pana yineyakwe yakulemweceka?

³ Atendeje Yalijiganyisye: Nganiluŵa lunda naga mundu alilolele paligalasi ni kumanyilila kuti pana yine yakusosekwa kucenga nambo ni ngatenda cilicose. Tukusosekwa kum’wenda Yehofa kuti atukamucisye kuliwungunya cenene ni kucenga yindu yine yatukusosecela kucenga. (Sal. 139:23, 24; Luk. 11:13) Pakuŵa ndaŵi jajisigeleji jinandipe, soni kuti tukusosekwa kulupusya umi wetu, ngatukusosekwa kucelewa kucenga yine ni yine paumi wetu.—1 Akoli. 7:29; 1 Tim. 4:16.

4. Ana cici cacikusamtendecela mundu jwakusalijiganya Maloŵe ga Mlungu ni kutendaga yalijiganyicisyeyo?

⁴ Yehofa akusalola umundu wetu ŵam’kati ŵawuli ŵakusosekwa mnope kupunda mwatukusawonecela kusa. (1 Pet. 3:3, 4) Ana cici cacikusamtendecela mundu jwakusalijiganya Maloŵe ga Mlungu ni kutendaga yalijiganyicisyeyo? Mundu jweleju ‘ngakusaŵa jwagamba kugapikanape ni kuliŵalila, nambo Mlungu akusampa upile mu yitendo yakwe yosope.’ (Yak. 1:25) Tuciŵa ŵakusangalala, soni ŵakulalicila mwakamula mtima, ligongo mpaka ‘tucilosya ucimbicimbi wa Yehofa mpela ligalasi lyakulolela.’—2 Akoli. 3:18.