Atendeje Yindu Pakuya “Lilamusi lya Umbone Mtima”

LISAa jwasasile kuti, “Umbone mtima wa abale ni alongo wangamuchisye mnope.” Jwalakwe jwasalaga ya chindu chachamtendekasisye kuti alijiganye usyesyene. Yeleyi yikulandanasoni ni yayamtendekasisye Anne kuti alijiganye usyesyene. Jwalakwe jwatite, “Umbone mtima wa abale ni alongo wangamuchisye mnope kupunda yaŵajiganyaga.” Apano alongoŵa akusasangalala kuŵalanga Baibulo soni kuganichisya mwakusokoka yaŵalasileyo, nambope umbone mtima ni wawakamuchisye mnope.

Ana mpaka tulosye chamtuli umbone mtima kwa ŵandu ŵatuŵandikene nawo majumba? Kwende tukambilane matala gaŵili. Matala gakwe gali kaŵechete soni katende ketu ka yindu. Kaneko chitukambilene ya ŵandu ŵakutusosekwa kwalosya umbone mtima.

KULOSYA “UMBONE MTIMA” MU YINDU YATUKUSAŴECHETA

Jwamkongwe jwakumsala pa Misyungu chaputala  31 jwakamulichisyaga masengo “lilamusi lya umbone mtima.” (Mis. 31:26, NWT.) Jwalakwe jwakundile kuti ‘lilamusili’ limkamuchisyeje kumanyilila yakusaka kuŵecheta soni mwampaka ayiŵechetele. Nombe Achatati akusosekwa kukamulichisya masengo ‘lilamusili’ pakuŵecheta. Achinangolo ŵajinji akusamanyilila kuti kuŵecheta mwangaŵajilwa mpaka kwakuŵasye ŵanache ŵawo, soni mpaka yatendekasye ŵanachewo kuti akapikanilaga. Myoyo naga achinangolo akusalosya umbone mtima pakuŵecheta, yichakamuchisya ŵanache ŵawo kuti aŵe ŵakupikanila.

Chinga wawojo ali nangolo kapena iyayi, ana mpaka alosye chamtuli umbone mtima pakuŵecheta? Mbali jandanda ja lilemba lya Misyungu 31:26 jila likusalosya mwampaka tutendele yeleyi. Lilembali likusati, “Akusaŵecheta mwa lunda.” Yeleyi yikupwatikapo kusagula maloŵe mwalunda soni mwampaka tugaŵechetele. Mkanituŵechete yikusaŵa yakamuchisya kuliwusya kuti, ‘Ana yangusaka kuŵecheta chiyatumbilikasye ŵane kapena chiyiyikasye mtendele?’ (Mis. 15:1) Kusala yisyene luli lunda kutanda kuganisya mkanituŵechete.

Mwambi wine wa m’Baibulo ukusati, “Mundu jwakusaŵecheta mwangasamalila, maloŵe gakusasoma mpela upanga.” (Mis. 12:18) Naga tukuganichisya mnope ya maloŵe getu soni mwatukusaŵechetela yichitukamuchisya kumanyilila mwakupikanila ŵane pa maloŵe getu soni kongolela kaŵechete ketu. Kusala yisyene naga tukamulichisya masengo “lilamusi lya umbone mtima” tuchiŵambala kuŵecheta maloŵe gakukuŵasya soni gakupweteka. (Aef. 4:31, 32) Nambosoni tuchityosya nganisyo syakulemwecheka soni tuchitanda kuŵecheta maloŵe gambone mulitala lyakuŵajilwa. Yehofa ali chisyasyo chambone panganiji. Jwalakwe jwamkamuchisye Eliya pandaŵi jele jwakutumichila jwakweju jwakwete woga mnope. Lilayika lyalyajimilaga Yehofa lyaŵechete “maloŵe gakutuluka”gakutamika mtima pasi. (1 Ayi. 19:12, NWT.) Nambope, kuti tulosye umbone mtima yikusasaka yejinji kupunda kwamba kuŵecheta maloŵe gambone. Tukusosekwasoni kulosya umbone mtima mu yindu yatukusatenda. Ana mpaka tutende chamtuli yeleyi?

KULOSYA UMBONE MTIMA PA KATENDE KETU KA YINDU KUKUSALIMBIKASYA ŴANE

Tukusamsyasya Yehofa patukuŵecheta soni kwatendela ŵandu yindu yambone. (Aef. 4:32; 5:1, 2) Lisa jwatumkolasile jula ŵasasile ya umbone mtima uŵamlosisye ŵa Mboni sya Yehofa. Jwalakwe jwatite, “Liŵasa lyetu paŵalisalile kuti lisame mwangajembecheya, maŵasa gaŵili mumpingo mwetu gayiche kukutukamuchisya kusama. Pandaŵiji naliji mkanindande kulijiganya Baibulo.” Umbone mtima ugalosisye maŵasaga wamkamuchisye Lisa kulijiganya usyesyene.

Anne jwatumkolasilesoni kundanda jula jwayamichile umbone mtima uŵamlosisye ŵa Mboni sya Yehofa. Jwalakwe jwasasile kuti, “Ligongo lya yakusati ŵandu kuchilamboku pakwatendela yindu achimjawo, yasawusyaga mnope kuti nakulupilileje ŵandu.” Jwalakwe jwajonjechesye kuti, “Mwamti panasimene ni ŵa Mboni sya Yehofa nganindenda nawo chidwi. Nambope naliwusisye kuti, ‘Ligongo chichi jemanjaji akutenda chidwi ni uneji?’ Nambo umbone mtima uŵalosisye mundu juŵanjiganyaga Baibulo ni wawandendekasisye kuti ndande kumkulupilila.” Yeleyi yakwete yakuyichisya yambone. Jwalakwe ŵapilitisye kuti, “Kaneko natandite kuganichisya mnope yanalijiganyagayo.”

Tuyiweni kuti kutenda yindu mwachinonyelo soni umbone mtima waŵalosisye abale ni alongo mumpingo, ni yayamkachisye Lisa soni Anne kuti alijiganye usyesyene. Umbone mtima uŵalosisye abale mumpingo wakamuchisye jemanjaji kutanda kumnonyela Yehofa soni ŵandu ŵakwe.

AMSYASYEJE MLUNGU MWAKWALOSYA ŴANE UMBONE MTIMA

Ŵandu ŵane yangasawusyaga kumwetulila soni kuŵecheta maloŵe gambone ligongo lya ndamo jakwakusatama. Tukusayamichila mnope ŵandu ŵakusakombola kutenda yeleyi ligongo lya umundu wawo kapena ndamo jakumangwawoko. Nambo naga tukusagamba kuŵecheta maloŵe gambone ligongo lya umundu wetu kapena ndamo jakwatukutama nikuti ngatukukombola kusyasya umbone mtima wa Mlungu.—Alole Masengo 28:2.

Umbone mtima usyesyene uli ndamo jaukusakoposya msimu weswela wa Mlungu. (Agal. 5:22, 23) Myoyo kuti tukombole kulosya umbone mtima usyesyene tukusosekwa kukunda kuti msimu ŵa Mlungu utulongoleleje pa kaganisye soni kwatende ketu ka yindu. Naga tukutenda yeleyi tuchiŵa tuli mkumsyasya Yehofa soni Yesu. Kusala yisyene m’weji mpela Aklistu, tukusosekwa kutendaga chidwi ni achimjetu. Tukusakombola kutenda yeleyi ligongo lyakumnonyela Yehofa Mlungu soni ŵakulupilila achimjetu. Myoyo umbone mtima wetu usyesyene ukusaŵa wakutyochela mumtima soni wakusaujitichisya Mlungu.

ANA ŴANI ŴATUKUSOSEKWA KWALOSYA UMBONE MTIMA?

Yili yangasawusya kwalosya umbone mtima ŵandu ŵakusatutendela yambone kapena ŵatukwamanyilila. (2 Sam. 2:6) Tukusalosya umbone mtima kwa jemanjaji patukwayamichila. (Akolo. 3:15) Nambi uli naga tukuyiwona kuti mundu jwine ngakusosekwa kumlosya umbone mtima?

Kwende tuganichisye chisyasyo achi: Yehofa ŵatupele chisyasyo chambone mnope pangani jakulosya umbone mtima wekulungwa. Nambosoni kupitila m’maloŵe gakwe akusatujiganya mwampaka tulochesye ndamo ja umbone mtimaji. Liloŵe lyakuti umbone mtima wekulungwa ŵalikamulichisye masengo maulendo gejinji mu Malemba ga Chigiliki ga Chiklistu. Ana Mlungu akusatulosya chamtuli umbone mtima?

Yehofa aŵele mkwalosya ŵandu mamiliyoni gejinji umbone mtima ŵakwe mwakwakamuchisya kupata yakusosechela paumi wawo. (Mat. 5:45) Atamose pandaŵi jatwaliji mkanituŵe kummanyilila Yehofa, jwalakwe jwatulosyagape umbone mtima wakwe. (Aef. 2:4, 5, 8) Mwachisyasyo, Mlungu jwapeleche Mwanache jwakwe jumo pejo pakusaka kwawombola ŵandu wosope. Ndumetume Paulo jwalembile kuti Yehofa jwapeleche mbopesi “ligongo lya umbone mtima [wakwe] waukulungwa.” (Aef. 1:7) Nambosoni atamose kuti tukusalemwa soni kumkuŵasya Yehofa, jwalakwe akupitilisyape kutulongolela soni kutujiganya. Malangiso soni maloŵe gakwe gali mpela “ula ja mawawa.” (Det. 32:2) M’weji nganituŵa tukombwele kumwuchisya yosope yakusatutendela jwalakwe ligongo lya umbone mtima wakwe. Kusala yisyene yikaŵe kuti Yehofa nganatulosya umbone mtima wekulungwa tukaliji ŵangali chembecheyo.—Alole 1 Petulo 1:13.

Ngatukukayichila kuti umbone mtima wa Yehofa ukusatukamuchisya soni kutulimbikasya. Yeleyi yikusatutendekasya kuti twalosyeje umbone mtima ŵandu wosope soni tumsyasyeje Yehofa mwakulingalinga kulosya umbone mtima lisiku lililyose. (1 Ates. 5:15) Naga tukulosya umbone mtima ndaŵi syosope tukusaŵa mpela moto pandaŵi jakusisima. Nambosoni tukusalimbikasya ŵandu ŵa mwiŵasa mwetu, abale ni alongo, achimjetu ŵakumasengo, ŵakusukulu soni ŵandu ŵatuŵandikene nawo majumba.

Aganichisye ya ŵandu ŵa mwiŵasa mwawo kapena kumpingo ŵampaka apindule ni kaŵechete soni katende kawo ka yindu. Komboleka kuti mpaka asimanikwe mundu jwine mumpingo mwawo jwakusosechela kumkamuchisya chinga masengo ga panyumba, kumigunda kapena kuja kumsumila yindu kumsika. Konjechesya pelepa, mpaka asimanesoni ni mundu jwine mu utumiki jwakusosechela kumkamuchisya, naga yili yakomboleka akusosekwa kumkamuchisya.

Ndaŵi syosope tukusosekwa kulongoleledwa ni “lilamusi lya umbone mtima” patukumsyasya Yehofa kupitila mu kaŵechete soni katende ketu ka yindu.