Ana Akumanyilila?

Ana Aloma ŵakundaga kutenda mwambo wa malilo ga mundu jwamwuleje mwakumkomela pachitela mpela muŵamwulajile Yesu?

ŴANDU ŵajinji akusamanyilila chenene ngani jakuti Yesu ŵawulajidwe mwakumkomela pachitela yalumo ni ŵachiswamba ŵaŵili. (Mat. 27:35-38) Nambope, ŵandu ŵane akusakulupilila kuti Baibulo jikusasala yaunami pakwamba yakuti chilu cha Yesu chalinganyidwe ni kuŵichidwa m’malembe.—Maliko. 15:42-46.

Ŵandu ŵakusasisya mabuku ga ngani syambone aŵele ali mkukayichila naga yakombolekaga kutenda mwambo wa malilo soni kuŵika m’malembe chilu cha mundu jwawulajidwe mwakumkomela pachitela. Mmalomwakwe, ŵakusisyaŵa ŵakulupililaga kuti mtembo wa mundu jweleju ŵawuŵikaga mwakulekangana ni mitembo jine. Jwakulemba ngani jwine (Ariel Sabar) jwalembile m’magasini jine ligongo lyakwe ŵandu ŵane ŵaganisyaga yeleyi. Jwalakwe jwatite, “Kukomeledwa pachitela chaŵaga chilango chaŵapaga ŵandu ŵakusakala mnope, soni ŵalijiganye ŵane ŵasalaga kuti chaliji chipongwe kuganisya kuti Aloma ŵakundaga kuti mitembo ja ŵandu ŵakomeledwe pachitela jiŵichidweje m’malembe.” Aloma ŵasakaga kuti mitembo ja ŵandu ŵaŵakomeledwe pachitela jikasamalidwaga ni chakulinga chakuti yinyama ya mwitinji yilye mitembojo. Kaneko yakusigalila ya mitembojo ŵayijigalaga nikuja kuyisilila kumalembe ga ŵandu wamba.

Nambope yaŵapatile ŵakuwukula ya m’masame pakwamba ya Ayuda ŵane ŵaŵawulajidwe yikulekangana ni yeleyi. Mu 1968, ŵakuwukulaŵa ŵapatile mawupa ga mundu jwine juŵawulajidwe m’yaka 100 yandanda. Mawupaga ŵagapatile mu lilembe line lya mundu jwa Chiyuda lyalyaliji chiŵandika Yelusalemu. Mawupaga ŵagasimene gali m’libokosi line lyakwe lyakusunjila mawupa. Pa mawupago papalisoni liwupa lya chindende. Liwupali ŵalikomele ku chitela ni msomali wawulewu mayinchesi 4.5. Jwakulemba ngani jwatumkolasile jula jwasasile kuti, “Kusimanikwa kwa chindende chelechi chachaliji cha mundu jwine lina lyakwe Yehochanan, kwapeleche umboni wakulosya kuti yasikusasala ngani syambone yakuti Yesu ŵaŵichidwe m’malembe mpaka yiŵe yisyesye.” Kusala yisyene, “Kusimanikwa kwa chindende cha Yehochanan chili chisyasyo chimo chakulosya kuti Aloma ŵakundaga kuti mtembo wamundu juŵawulajidwe mwakumkomela pachitela uŵichidwe m’malembe.”

Kusimanikwa kwa chindendechi kukutendekasya kuti ŵandu aganisyeje yakulekanganalekangana pakwamba yaŵatite pakumkomela Yesu pachitela. Nambo yisyesyene yakwe yili yakuti ŵandu ŵane ŵaŵawulajidwe mwakwakomela pachitela, mitembo jawo nganagambaga kujiponya m’malembe ga ŵandu ŵamba, nambo ŵajiŵikaga mwaulemu m’malembe. Kusala yisyene, yajikusasala Baibulo pakwamba yakuti mtembo wa Yesu waŵichidwe m’malembe yili yakuwona. Umboni welewu ukukamulana ni yajikusasala Baibulo kuti mtembo wa Yesu walinganyidwe ni kuŵichidwa m’malembe.

Chakusosekwa mnope chili chakuti Yehofa jwaliji ali asasile chile yakuti Yesu chachiŵichidwa m’malembe ga ŵandu ŵakusichila, sonitu pangali jwampaka alepelekasye yasasile Mlungu.—Yes. 53:9; 55:11.