Yampaka Atende Kuti Akole Sogolo Jambone

Yaka 3,500 yipiteyo, Yehofa Mlungu ŵasalile ŵandu ŵaŵamtumichilaga yampaka atende kuti akole sogolo jambone. Jwalakwe jwatite, “Ngumpa lipesa lyakuti msagule pasikati pa umi ni chiwa, soni pasikati pa upile wa Mlungu ni malweso ga Mlungu.  . . . Myoyo ngumsalila kuti msagule umi.”​—Detulonomo 30:19.

Jemanjaji kuti akole sogolo jambone ŵasosekwaga kusagula chenene. M’wejisoni tukwete ufulu wakusagula. Baibulo jikusati, “Mwanonyele AMBUJE Mlungu jwenu, mwapikanileje.” Yeleyi ni yatukusosekwa kutenda kuti tukole sogolo jambone.​—Detulonomo 30:20.

ANA MPAKA ALOSYE ULI KUTI AKUSAMNONYELA SONI KUMPIKANILA YEHOFA?

ALIJIGANYEJE BAIBULO: Kuti amnonyeleje Mlungu, chandanda akusosekwa kulijiganya ya jwalakwe kupitila m’Baibulo. Pakulijiganya chachimanyilila kuti Mlungu ali jwachinonyelo soni akusasaka kuti wawojo yindu yajendeleje chenene. Mlungu akusasaka kuti apopeleje kwa jwalakwe ligongo ni ‘jwakusiŵasamalila wawojo.’ (1 Petulo 5:7) Baibulo jikusati naga akulingalinga kuti aŵe paunasi ni Mlungu ‘jwalakwe tachaŵandichila.’—Yakobo 4:8.

AKAMULICHISYEJE MASENGO YAKULIJIGANYA: Mpaka tulosye kuti tukusampikanila Mlungu naga tukukuya yakusatusalila jwalakwejo kupitila m’Baibulo. Pakutenda yeleyi “tachisichila ni kupunda kwakwe.”—Yoswa 1:8.