Ana Chichi Champaka Chakamuchisye Kola Sogolo Jambone?

Mungani sipite sila tuyiweni kuti ŵandu akusakulupilila kuti majiganyo, chipanje soni kuŵa mundu jwambone mpaka yakamuchisye kola sogolo jambone. Akusakulupililasoni kuti pana machili ganegakwe gangawoneka gagakusalongolela sogolo jawo. Nambo kukulupilila yeleyi kuli mpela kukamulichisya masengo mapu gesokonechele kuti ukayiche kumalo ganegakwe. Nambotu yeleyi ngayikugopolela kuti nganitukola sogolo jambone.

YAMPAKA YITUKAMUCHISYE

Patukusaka kusagula yindu tukusajawula kwa ŵandu ŵalunda soni ŵachikulile kutupunda m’weji kuti atukamuchisye. Mwakulandana ni yeleyi kuti tumanyilile yampaka tutende kuti tukole sogolo jambone, tukusosekwa kwawula kwa mundu jwalunda soni jwachikulile kutupunda m’weji. Yaŵasasile munduju yikusimanikwa m’Baibulo, buku jajalembedwe yaka 3,500 yipiteyo.

Ligongo chichi tukusosekwa kujikulupilila Baibulo? Ligongo juŵalembile ali jwamkulungwa soni jwalunda mnope pa chilambo chosope. Jwalakwe ali “jwa chitamile mpaka kalakala” soni “ali Mlungu kutandilila kwa yaka mpaka yaka yosope.” (Daniele 7:9; Salimo 90:2) Jwalakwe ni ‘juŵapanganyisye ya kwinani . . . ali Mlungu juŵagumbile ni kupanganya chilambo chapasi.’ (Yesaya 45:18) Sonitu akusatusalila kuti lina lyakwe ali Yehofa.—Salimo 83:18, NWT.

Baibulo jangasala kuti mtundu wine wa ŵandu uli wakusosekwa kupunda wine. Yili myoyo ligongo lyakuti juŵalembile ali Mlungu juŵapanganyisye ŵandu wosope. Soni yajikusasala yili yakamuchisya kwa ŵandu wosope. Baibulo jili buku jajikusasimanikwa mnope pa chilambo chosope kupundana ni buku jilijose soni jikusasimanikwa m’yiŵecheto yejinji.a Yeleyi yikulosya kuti jwalijose pachilambopa mpaka aŵalanje Baibulo ni kukuyaga yajikusasala. Yeleyi yikukamulana ni yajikusasala Baibulo.

“Mlungu jwangali lusagu. Jwalijose jwakusamjogopa jwalakwe ni kutenda yambone akumpochela, pangalolela kuti akutyochela mtundu wapi.”—MASENGO 10:34, 35.

Yehofa Mlungu ali mpela nangolo jwachinonyelo jwakusiŵakamuchisya ŵanache ŵakwe. Jwalakwe akusatukamuchisya kupitila m’Maloŵe gakwe Baibulo. (2 Timoteo 3:16) Mpaka agakulupilile Maloŵe gakwe. Yili myoyo ligongo Mlungu ni juŵatupanganyisye soni akusamanyilila yindu yampaka yitukamuchisye kuti tuŵeje ŵakusangalala.

AJIKULUPILILEJE BAIBULO

Mpaka tujikulupilile Baibulo ligongo jasasile yindu yayikutendekwa masiku agano yaka 2,000 yipiteyo.

BAIBULO JASASILE YINDU YAYICHITENDEKWA MASIKU GA MBESI

“Mitundu ja ŵandu jakulekanganalekangana tijichimenyana ngondo, chilambo tichichijimuchilana ni chilambo chine, soni uchimwene tiwuchimenyana ni Uchimwene ujakwe. Tikuchiŵa kwana yisichinya, sala, ni yilwele ku malo gakulekanganalekangana.”—Luka 21:10, 11.

BAIBULO JASASILE YACHACHITENDAGA ŴANDU MASIKU GAMBESI

“Masiku gambesi tijichiyika ndaŵi ja yakusawusya. Ŵandu tachiŵa ŵakulinonyela achimsyene, ŵakunonyela mbiya, wakulikwesya, ŵakulalata ni mbwinya, ŵangapikanila achinangolo ŵawo, ŵangatogolela, soni ŵakusakasya yindu ya Mlungu. Tachiŵa ŵangali chanasa, ŵangapikana pepani ni kwalambuchisya yindu achimjawo. Tachiŵa ŵandewo soni ŵakogoya, ni ŵanganonyela yambone, ŵakwapeleka achimjawo kwa amagongo ŵawo. Tachiŵa ŵangajogopa chilichose, ŵakulikwesya soni ŵakunonyela yakusangalasya m’malo mwakumnonyela Mlungu.”—2 TIMOTEO 3:1-4.

Ana yakomboleche uli Baibulo kusala yayikutendekwa masiku agano? Mwangakayichila mpaka akamulane ni yaŵaŵechete jwamlume jwine jwa ku Hong Kong. Jwalakwe jwatite, “Yakulochesya yeleyi yalembedwe kalakala. Yili yangakomboleka kuti mundu asale yindu ni kutendekwa. Yeleyi yikulosya kuti juŵalembile Baibulo ali jwalunda kutupunda m’weji.”

M’Baibulo mwana yakulochesya yejinji yayatendekwe.b Yeleyi yikulosya kuti Baibulo gali Maloŵe ga Mlungu. Yehofa jwasasile kuti, “Mlungu ndili jika, pangali soni jwine. . . Naŵechete chile ya kumbesi kutyochela pandanda pene.” (Yesaya 46:9, 10) Yeleyi mpaka yitutendekasye kulupilila yajasasile Baibulo kuti yichitendekwa msogolo.

YINDU YAMPAKA YAKAMUCHISYE MPAKA KALAKALA

Pakukamulichisya masengo yindu yayikusasimanikwa m’Maloŵe ga Mlungu yindu yikusiyajendela chenene. Kwende tulole yindu yine yajikusasala Baibulo.

YAJIKUSASALA BAIBULO PANGANI JA MBIYA SONI MASENGO

‘Kuli kwambone kutama ni umi wa mtendele kulekangana ni kupichisikwa [kapena kuti kutanganidwa] ndaŵi syosyope ni kwamba kulisawusya.’—JWAKULALICHILA 4:6.

YAMPAKA ATENDE KUTI AKOLE LIŴASA LYAKUSANGALALA

“Jwamlume jwalijose amnonyeleje jwamkongwe jwakwe mpela mwakusalinonyelela jwalakwe msyene, nipo soni jwamkongwe jwalijose amchimbichisyeje jwamlume jwakwe.”—AEFESO 5:33.

YAMPAKA ATENDE KUTI AKAMULANEJE NI ŴANE

“Mkapya mtima ni kutumbila; mkatenda kose yeleyi, pakuŵa ngiyimpindulila kandu.”—SALIMO 37:8.

Naga akukuya yajikusasala Baibulo chachiŵa ŵakusangalala soni chachikola sogolo jambone. M’Baibulo mwana yindu yambone yaŵasasile Mlungu kuti chachitutendela kusogolo. Yindu yakwe yili mpela

ŴANDU CHACHIŴA PAMBONE SONI PAMTENDELE

‘Ŵakulitulusya tachipochela chilambo kuti chiŵe chawo, ni tachiŵa pa mtendele wakupundanganya.’—SALIMO 37:11.

JWALIJOSE TACHIKOLA CHAKULYA CHAKWANILA SONI MALO GAKUTAMA

“Ŵandu ŵangu tachitaŵa nyumba nipo tachitamamo, tachipanda migunda ja mipeleya, tachilya yisogosi yakwe.”—YESAYA 65:21.

NGASIKUPAGWA YILWELE SONI CHIWA

“Ngasipapagwa chiwa, chanasa kulila, kapena kupikana yipwetesi.”—CHIWUNUKUKO 21:4.

Ana akusosekwa kutenda chichi kuti chasangalale ni yindu yeleyi msogolo? Ngani jakuyichisya chijijanje chiwusyochi.

a Kuti amanyilile yejinji pakwamba ya kugopolela Baibulo soni kujiwandisya ajawule pa www.jw.org palembile kuti ZIMENE BAIBULO LIMAPHUNZITSA > MBIRI KOMANSO BAIBULO.

b Kuti amanyilile yejinji alole mtwe 9 m’buku jakuti Baibulo—Kodi Ndilo Mawu a Mulungu Kapena a Munthu? jakuwandisidwa ni ŵa Mboni sya Yehofa. Bukuji jikusimanikwa pa www.jw.org. Pa mbali jakuti LAIBULALE > MABUKU.