“Paulo Jwamyamicile Mlungu Soni Jwalimbile Mtima”

Mpingo wa ku Loma pawapikene kuti Paulo akwika, likuga lya abale lyajesile mkuli wa makilomita 64 kukumcingamila. Ana cinonyelo cawo cakulipeleka camkwayiye camtuli Paulo? ‘Paulo paŵayiweni yeleyi, jwatogolele [jwayamicile] Mlungu ni jwalimbile mtima.’ (Mase. 28:15) Atamose kuti Paulo jwamanyikaga kuti jwaliji jwakulimbikasya ku mpingo wawawujendele pandaŵiji, nambo pandaŵi jaŵaliji mkayidi jwalakwejo ni jwaŵalimbikasidwe.—2 Akoli. 13:10.

Masiku agano, ŵakulolela mikuli akusajenda mpingo ni mpingo kuti ŵalimbikasye abale ni alongo. Mwakulandana ni ŵakutumicila wosope ŵa Mlungu, ndaŵi sine jemanjaji akusapela, kulagasika nganisyo, soni kutenguka. Ana pacaciyika jwakulolela mkuli ni ŵamkwakwe ku mpingo wawo, cacitenda yamtuli pakusaka kwakamucisya kuti aŵe ŵakulimba, ni cakulinga cakuti paŵe “kulimbikasyana”?—Alo. 1:11, 12, NW.

• 

  Tusimanikweje nawo pamsongano wakosecela undumetume. Jwakulolela mkuli akusalimbikasidwa pakwawona ŵakulacila ali mkujigala nawo mbali pa yakutendekwa ya pa cijuma capajika. (1 Ates. 1:2, 3; 2:20) Komboleka kutenda nawo upayiniya wakamucisya pa mwesi ŵacaciyika jwakulolela mkuli. Ana mpaka alipelece kuti cajende mu undumetume ni jwalakwejo kapena ŵamkwakwe, kapena kwajigala ku lijiganyo lyawo lya Baibulo? Jemanjanji akusasangalala pakwenda ni ŵakulalicila ŵakulekanganalekangana, kupwatikapo ŵandu ŵanganakola umanyilisi wejinji mu undumetume.

• 

  Twapoceleje cenene. Ana nganaŵa akombwele kwapa malo gagona kapena yakulya? Naga tukutenda yeleyi tucalosya kuti tukusitwanonyela. Jemanjaji ŵangasakaga yindu yejinji.—Luk. 10:38-42.

• 

  Twapikanileje soni kamulicisya masengo yakusatusalila. Jwakulolela mkuli akusatukamucisya mwacinonyelo pa yindu yatukusosekwa kongolela patukumtumicila Yehofa. Ndaŵi sine mpaka atupe camuko camacili. (1 Akoli. 5:1-5) Patukupikanila soni kutenda yatusalileyo, jwalakwe akusaŵa jwakusangalala.—Aheb. 13:17

• 

  Twayamicileje. Tumsalileje jwakulolela mkuli ni ŵamkwakwe yatupindwile ligongo lya kulipeleka kwawo. Mpaka tutende yeleyi mwakwasalila pameso ni pameso, kapena mwakwalembela cikalata.—Akolo. 3:15.