LIJIGANYO 17

Ana Ŵakulolela Ŵakwendela Akusatukamucisya Catuli?

Jwakulolela mkuli akutendesya msongano wa undumetume wa mumgunda — Likuga lya undumetume

Jwakulolela mkuli akulalicila yalumo ni mpingo — Undumetume wa mumgunda

Msongano wa Jwakulolela mkuli ni acakulungwa ŵa mumpingo — Msongano wa acakulungwa ŵa mumpingo

M’mabuku ga m’Baibulo ga Cigiliki gakusasalaga mwakuwilisyawilisya ya Banaba, soni Paulo. Acalumeŵa ŵatumicilaga mpela ŵakulolela ŵakwendela, acijendelaga mipingo jandanda. Ana ligongo cici? Jemanjaji ŵakolaga nganisyo mnope pakwamba ya usimu wa Aklistu acimjawo. Paulo ŵaŵecete kuti ŵasakaga ‘kwawula kukwajendela acimjakwe’ kuti akalole mwayikwajendela yindu. Jwalakwe ŵaliji jwakusacilila kwenda makilomita gejinji kuti akalimbikasye. (Masengo 15:36) Nombe ŵakulolela ŵakwendela lelo jino, akusaŵa ŵakusacilila kwajendela ŵane.

Akusayika kukutulimbikasya. Jwakulolela mkuli akusajendela ciŵandika mipingo 20, akusatama ni mpingo kwa mlungu umo.Yeleyi yikusatendekwa kaŵili pacaka. Jwakulolela upande akusajendela mikuli ciŵandika 10, acijendelaga mipingo, soni akusatumicila mpela ceyamani jwa msongano wamkuli kamo pacaka cilicose. Kumanyilila yindu kwa ŵakulolela ŵakwendela yalumo ni aciŵamkwawo mpaka kutukamucisye mnope. Jemanjaji akusalingalinga kwamanyilila acakulungwa ni ŵanace, soni akusasacililaga kwendela nawo yimpepe mu undumetume wa mumgunda soni kwa Ŵakulijiganya Baibulo ŵetu. Ŵakulolela ŵakwendelaŵa akusatendagasoni maulendo gakucinga yimpepe ni acakulungwa ŵa mumpingo, soni akusatulimbikasya pakuŵeceta ngani pamisongano ja mpingo, soni pamisongano jekulungwa.—Masengo 15:35.

Akusakolaga lung’wanu kwa wosope. Ŵakulolela ŵakwendela akusakola mnope lung’wanu ni ndamo ja usimu ja mipingo. Jemanjaji akusacinganganaga ni acakulungwa ŵa mumpingo, soni ŵakutumicila ŵakamucisya kuti alole mwawukwendela mpingo ni kwakamucisya pamasengo gakutenda. Akusakamucisyasoni apayiniya kuti undumetume wawo ujendeje cenene, soni akusasangalala kwamanyilila ŵacasambano ni kupikana kwawula pasogolo mwausimu kwakutenda jemanjaji. Ŵakulolela ŵakwendeleŵa akusalipeleka jika mpela ‘acimjetu ŵakupanganya nowe masengo kukwetu.’ (2 Akolinto 8:23) Tukusosekwa kuya cikulupi cawo, soni kulipeleka kwawo kwa Mlungu.—Ahebeli 13:7.

Ana ŵakulolela ŵakwendela akusajendela mipingo ligongo cici?
Ana umbone wapi wampaka tupate pakutujendela?