Kongolela Katende Ketu ka Undumetume​—Kwakamucisya ‘Ŵandu Ŵakwete Nganisyo Syambone’ Kuti aŵe Ŵakulijiganya

LIGONGO CICI KULI KWAKUSOSEKWA: Yehofa akusakusya mbeju sya usyesyene m’mitima mwa “ŵandu ŵakwete nganisyo syambone kuti capocele umi wangamala.” (Mase. 13:48; 1 Akoli. 3:7, NW) Jwalakwe akusaŵa ni m’weji patukulimbicila kulalicila kwa ŵandu ŵakusakamulicisya masengo yakulijiganya. (1 Akoli. 9:​26) Ŵakulijiganya Baibulowo akusosekwa kumanyilila kuti ubatiso wa Ciklistu uli wakusosekwa kuti akakulupuce. (1 Pet. 3:​21) Tukusitwakamucisya jemanjajo kuti aŵe ŵakulijiganya mwakwajiganya kuti acenje umi wawo, mwampaka alalicilile soni kwiganya, nambosoni kupeleka umi wawo kwa Yehofa.​—Mat. 28:19, 20.

MWAMPAKA TUTENDELE:

• Twakumbusyeje ŵakulijiganya Baibulo kuti cakulinga ca lijiganyolyo cili kwakamucisya kuti ammanyilile Yehofa nambosoni kumsangalasya.​—Yoh. 17:3

• Twakamucisyeje kuti acenje umi wawo, mwa kuleka ndamo syakusakala nambosoni kuleka kunguluka ni ŵandu ŵakusakala

• Twalimbikasyeje mkanabatiswe nambosoni pabatiswe.​—Mase. 14:22

ALOLELE FIDIYO JAKUTI YEHOFA CACAKAMUCISYA, KANEKO AJANJE YIWUSYO YAKUYICISYAYI:

• Ana ni yindu yapi yampaka yimtendekasye mundu kogopa kulipeleka soni kubatiswa?

• Ana acakulungwa ŵa mumpingo mpaka ŵakamucisye camtuli ŵakulijiganya Baibulo kwawula pasogolo?

• Ana lilemba lya Yesaya 41:10, likutujiganya cici pakwamba ya Yehofa?

• Ana ni ndamo syapi syampaka situkamucisye kumtumicila cenene Yehofa atamose kuti tuli ŵangali umlama?