Ana Mlungu Akusatumanyisya Chamtuli Yindu Yakusaka Kututendela?

Kutandila kalakala Mlungu aŵele mkuŵecheta ni ŵandu kupitila mwa malayika soni atumiki ŵakwe. Konjechesya pelepa jwalakwe jwasasile yindu yambone yachachitenda msogolo soni jwakundile kuti yilembedwe m’Maloŵe gakwe. Yindu yeleyi mpaka yakamuchisyesoni wawojo kuti chaŵe ŵakusangalala kusogolo. Ana yindu yamboneyi mpaka ayipate kwapi masiku agano?

Yindu yamboneyi mpaka ayipate m’Maloŵe ga Mlungu. (2 Timoteo 3:16) Ana Mlungu ŵakamulichisye chamtuli atumiki ŵakwe kulemba Maloŵe gakwe? (2 Petulo 1:21) Jwalakwe jwaŵisile nganisyo syakwe mwa atumiki ŵakwe kuti asilembe. Yeleyi yili yakulandana ni yagakusatenda mabwana masiku agano. Mwachisyasyo, bwana mpaka amkamulichisye masengo mundu jwine kuti amlembele chikalata chakwe. Atamose kuti chikalatacho mpaka chilembedwe ni mundu jwine, msyene chikalatacho ali bwanajo. Mwakulandana ni yeleyi, atamose kuti Mlungu ŵakamulichisye masengo atumiki ŵakwe kuti alembe maloŵe gakwe, msyene maloŵego ali Mlungujo.

MALOŴE GA MLUNGU GAKUSIMANIKWA PACHILAMBO CHOSOPE

Maloŵe ga Mlungu gali gakusosekwa mnope mwamti jwalakwe akusasaka kuti ŵandu wosope agaŵalanjeje soni agapikanichisyeje. Masiku agano “ngani syambone syangamala” sikusimanikwa “kwa ŵandu ŵa mtundu uliwose, ŵa lukosyo lululose ni ŵachiŵecheto chilichose.” (Chiwunukuko 14:6) Ni chikamuchisyo cha Mlungu, Maloŵe ga Mlungu gakusimanikwa m’buku jamtundu kapena mbali ja bukujo mu yiŵecheto 3,000. Pangalisoni mabuku gane gampaka gasimanikwe muyiŵecheto yejinji myiyi.