Akamulicisyeje Masengo Webusayiti Jetu mu Undumetume—“Kwanga kwa Yiwusyo ya m’Baibulo”

Pa Webusayiti jetu ja jw.org pa mtwe wakuti “Yijiganyo ya m’Baibulo” panasoni mbali jakuti “Kwanga kwa Yiwusyo ya m’Baibulo.” Naga tukuyimanyilila yiwusyo yakusawusya ŵandu ndema syejinji, mpaka tumsalile msyenenyumbajo kuti awungunye pa Webusayiti jetu kuti apate kwanga kwa m’Malemba. Yiwusyo yeleyi mpaka tuyikamulicisyesoni masengo pakutanda kuŵecetana ni ŵandu patuli mu undumetume. Mpaka tusagule ciwusyo cacili cakutesya lung’wanu kwa ŵandu ŵa mu mkuli wetu, kaneko kum’wusya msyenenyumbajo kuti asale nganisyo syakwe, pambesi pakwe mpaka tumsalile yajikusasala Baibulo pakamulicisya masengo yatuŵalasile pa Webusayiti pala. Kaneko, mpaka tumsalile kapena kumlosya kwatujigele yatumsalileyo. Litala line lili kwamba kumsalila kuti aŵalanje jika kwanga kwakwe pa Webusayiti papopo. Ŵamkwakwe jwakulolela mkuli jwine kuti yindu yimjendele cenene pakulalicila akusatanda ni maloŵe gakuti: “Ŵandu ŵajinji akusaliwusya kuti, ‘Ana Mlungu ni jwakusatendekasya kuti tusimaneje ni yipwetesi?’ Ana mpaka asace kupikana kwanga kwakwe pa ndaŵi jakwana masekandi 51 basi?” Kaneko jwalakwe akusawugula tabuleti jakwe nikutanda kupikanila ni mundujo kwanga kwakwe kwaŵakujigele pa Webusayiti jetu. Pambesi pakwe akusamsalila mundujo mtwe 11 wa m’buku ja Baibulo Jikusajiganya Cici.