Kongolela Katende Ketu ka Undumetume—Kulemba ya Ŵandu ŵa Lung’wanu

“Mliloleleje cenene mwasyene, nambosoni pa yele yimkusajiganya.” (1 Tim. 4:16) Maloŵe ga ndumetume Paulo gelega gaŵamsalilaga Timoteyo gakulosya kuti cinga tutandite sampano kulalicila kapena twatandite kalakala tukusosekwa kwawula m’bujo mwamtawu. Pakusaka kutukamucisya kutenda yeleyi, ngani syakola mtwe wakuti “Kongolela Katende Ketu ka Undumetume” cisikopoceje mu Undumetume wa Ucimwene. Ngani jilijose jicisalaga yakamucisya pa kongolela mu undumetume, soni mwampaka tutendele yeleyo. Mkati mwa mwesi, jwalijose akusosekwa kuyikamulicisya masengo. Pambesi pa mwesi, pa Msongano wa Undumetume tucikolaga upile wakusala yindu yakamucisya, soni yatusimene nayo patwayikamulicisyaga masengo. Mwesi awuno akutulimbikasya kulemba ya ŵandu ŵa lung’wanu.

Ligongo Cici Kuli Kwakusosekwa?: Kuti tukwanilisye undumetume wetu, tukusosekwa kutenda yejinji ngaŵaga kulalicilape. Tukusasosekwa kuwujila kwa ŵandu ŵaŵalosisye lung’wanu ni kwajiganya, kwitilila mbeju sya usyesyene sitwapandile. (Mat. 28:19, 20; 1 Akoli. 3:6-9) Yeleyi yikusasaka kumsimanasoni mundujo ni kutagulilana najo mwayiŵelele yindu pa umi wakwe, soni kutagulilana najo yitwaŵecetene ulendo upite. M’yoyo, naga tumpatile mundu jwalung’wanu, kuli cenene kulemba ya mundujo.