YIPWETESI Ana Yili Chilango Chakutyochela kwa Mlungu?

LUZIA ALI JWAMLEMALE LUKONGOLO LWAKUMCHIJI. Jwalakwe paŵaliji mwanache jwalwasile ulwele wapoliyo wawakwayiye tumitasi twam’chilu twakamula masengo mpela ututu. Luzia ali akwete yaka 16, abwana ŵakwe ŵakongwe ŵamsalile kuti, “Mlungu ampele chilango ligongo nganimwapikanilaga mama ŵenu.” Pamasile yaka sambano Luzia ali mkukumbuchilape maloŵe gakupwetekaga.

DAMARIS PAŴASIMANIKWE NI KANSA JA MU UTUTU babagwe ŵam’wusisye kuti, “Ana mtesile chichi kuti yeleyi yimtendechele? Pana chinechakwe chimtesile chakulemwecheka. Ni ligongo lyakwe Mlungu akumpa chilango.” Maloŵe gelega gampweteche mnope Damaris.

Kwa yaka yejinji ŵandu aŵele ali mkukulupilila kuti yilwele yili chilango chakutyochela kwa Mlungu. Buku jine (Manners and Customs of Bible Lands) jikusasala kuti ŵandu ŵajinji mundaŵi ja Yesu ŵakulupililaga kuti “yilwele yayikaga ligongo lya ulemwa wa mundu jwakulwalajo kapena ŵachibale ŵakwe. Yeleyi ŵayiwonaga kuti chili chilango cha ulemwawo.” Buku jine (Medieval Medicine and the Plague) jasasile kuti pali pamasile yaka yejinji chiwile Yesu, “ŵandu ŵane ŵakulupililaga kuti Mlungu jwayikasisye yilwele ligongo lya yakulemwa yaŵatesile ŵanduwo.” Ana ŵandu ŵajinji ŵaŵawile pandaŵi jeleji ku Europe ligongo lya yilwele, nikuti Mlungu ŵapaga chilango? Kapena ŵawile ligongo lya tulombo twakutandisya yilwele mpela mwakusaŵechetela ŵakuwunganya? Ŵandu ŵanesoni akusasimonga naga Mlungu akusapa ŵandu chilango ligongo lya yakulemwa yawo.a

AGANICHISYE AYI: Yikaŵe kuti yilwele soni yipwetesi yili chilango chakutyochela kwa Mlungu, ana Yesu akaposisyesoni ŵandu ŵakulwala? Ana kwaposyaku nganiwuŵa umboni wamachili wakulosya Mlungu ali jwachilungamo? (Mateyu 4:23, 24) Yesu nganatendaga yindu yakusisyana ni Mlungu. Jwalakwe jwatite, “Ndaŵi syosope ngusatenda yindu yakumsangalasya jwalakwe” soni “ngusatenda chilichose mpela mwaŵandumile Atati kuti ndende.”—Yohane 8:29; 14:31.

Baibulo jikusatusimichisya kuti Yehofa Mlungu “ngakusatenda yangalungama.” (Detulonomo 32:4) Mwambone, Mlungu nganaŵa atendekasisye ngosi ja ndege ni kuwulagasya ŵandu ŵajinji ŵangalemwa ligongo lyakusaka kumpa chilango mundu jumo. Mwakamulana ni chilungamo cha Mlungu, Abulahamu jwaŵechete kuti Mlungu nganaŵa ‘ajonasile ŵakulungama yimpepe ni ŵakusakala.’ Jwasasilesoni kuti yili “yangakomboleka” Mlungu kutenda yeleyo. (Genesesi 18:23, 25) Baibulo jikusasalasoni kuti, “Mlungu jwangatenda yakusakala,” kapena ‘kutenda yakulemwecheka.’—Yobu 34:10-12.

YAJIKUSATUJIGANYA BAIBULO PAKWAMBA YA YIPWETESI

Patusimene ni yipwetesi ngaŵa kuti Mlungu akutupa chilango pa yakulemwa yetu. Yesu ŵasimichisye yeleyi kwa ŵakulijiganya ŵakwe paŵasimene ni mundu juŵaliji jwangalola chipagwile. “Ŵakulijiganya ŵakwe ŵam’wusisye kuti, ‘Mwalimu ana ŵani ŵaŵalemwisye kuti munduju apagwe jwangalola, msyene kapena achinangolo ŵakwe?’ Yesu ŵajanjile kuti, ‘Munduju kapena achinangolo ŵakwe nganalemwa nambo yeleyi yatendekwe kuti masengo ga Mlungu gawonechele.’”—Yohane 9:1-3.

Ligongo lya nganisyo syakulemwecheka siŵakwete ŵakulijiganya ŵa Yesu, jemanjaji ŵasimonjile kupikana kuti munduju soni achinangolo ŵakwe nganatenda chakulemwa chilichose. Yesu paŵamposisye jwangalolaju yakamuchisye kumasya chikulupi chakuti yipwetesi yatukusasimana nayo chili chilango chakutyochela kwa Mlungu. (Yohane 9:6, 7) Kumanyilila kuti Mlungu ngakusatendekasya yipwetesi kuli kwakamuchisyasoni kwa ŵandu wosope ŵakulaga ni yilwele yekulungwa masiku agano.

Malemba gakusatusimichisya kuti:

• “Mlungu ngaŵa mkulinjidwa ni yindu yakusakala, soni jwalakwe jwangamlinga jwalijose.” (YAKOBO 1:13) Kusala yisyene, “yindu yakusakala” yayiŵele mkwalagasya ŵandu kwa yaka yejinji mpela yilwele, yipwetesi soni chiwa chiyimale pachangakaŵapa.

• Yesu Klistu “jwaposisye ŵandu wosope ŵakulwala.” (MATEYU 8:16) Yesu paŵaposisye ŵandu wosope ŵaŵayiche kwa jwalakwe jwalosisye yawuchitenda Uchimwene wa Mlungu pachilambo chosope.

• “Jwalakwe [Mlungu] chachipukuta misosi josope mmeso mwawo, soni chiwa ngasichipagwasoni. Ngasipapagwasoni kulila, kuwuwula kapena kupikana kupweteka. Yindu yakala yichiŵa yimasile.”​—CHIWUNUKUKO 21:4.

ANA ŴANI ŴAKUSATENDEKASYA YIPWETESI?

Ligongo chichi ŵandu akusimana ni yipwetesi yejinji? Ŵandu aŵele ali mkuliwusya chiwusyo chelechi kwa yaka yejinji. Naga Mlungu jwangatendekasya yipwetesi nambi ana ŵani ŵakusayitendekasya? Kwanga kwa yiwusyo yeleyi chitukupate mungani jakuyichisya.