Ana Ŵani Ŵakusatendekasya Yipwetesi?

Naga yipwetesi ngakusatendekasya Mlungu, nambi ŵani ŵakutendekasya sala jakogoya, usawuchi, ngondo, yilwele nambosoni ngosi syachilengedwe? Baibulo jikusasalaga yindu yitatu yekulungwakulungwa yayikusatendekasya kuti ŵandu asimaneje ni yipwetesi:

1. Kulinonyela, Kutunduka, soni Uŵengani. “Mundu ampweteche mjakwe mwakumlamulila.” (Jwakulalichila 8:9) Ndaŵi ni katema ŵandu akusasimana ni yakusawusya ligongo lya ungali umlama, kulinonyela, kapena ŵandu ŵa ngalwe.

2. Ndaŵi ni Yakutendekwa Yangayijembecheya. Ŵandu ndaŵi syejinji tukusalaga ‘ligongo lyakuti ndaŵi ni yakutendekwa yangayijembecheya yikusatutendechela.’ (Jwakulalichila 9:11) Yeleyi yikusatendekwa naga ŵandu ali pamalo gakulemwecheka soni pandaŵi jakulemwecheka, nambosoni naga ŵandu ngakusamala, kapena akulemwesya katende ka yindu yine.

3. Jwakulamulila Jwakusakala jwa Chilambochi. Baibulo jikusasala mwakupikanika chenene chindu chekulungwa chachikusatandikasya kuti ŵandu asimaneje ni yipwetesi. Jikusati, “Chilambo chosope chili m’miyala mwa jwakusakalajo.” (1 Yohane 5:19) “Jwakusakalajo” ali Satana jwele pandanda jwaliji lilayika lya Mlungu, nambo “nganatamilichika mu usyesyene.” (Yohane 8:44) Malayika gane gaŵele ku mbali ja Satana pakumjimuchila Mlungu ligongo lyakulinonyela kwawo. Yeleyi yatendekasisye kuti gaŵe yiŵanda. (Genesesi 6:1-5) Kutandila pandaŵi jiŵajimuchile, Satana ni yiŵanda yakwe atendekasisye kuti pachilambopa paŵe yangasa yejinji. Yeleyi ni yayikutendekwa mnopemnope mundaŵi jetu jino. Apano Satana atumbile mnope soni ‘akusokonasya chilambo chosope kwali ŵandu.’ Nambosoni atendekasisye kuti paŵe “likungu pachilambo chapasi.” (Chiwunukuko 12:9, 12) Kusala yisyene, Satana ali jwakulamulila jwangasa mnope. Jwalakwe akusasangalala ŵandu pakulaga ni yipwetesi. Myoyo Satana ni jwakusatendekasya yipwetesi ngaŵaga Mlungu.

AGANICHISYE AYI: Mundu jwangali chanasa, jwakusakala mnope ni jwampaka atendekasye yipwetesi kwa ŵandu ŵangalemwa. Mwakulekangana ni yeleyi, Baibulo jikusasala kuti, “Mlungu ali chinonyelo.” (1 Yohane 4:8) Mwakamulana ni chinonyelo chakwechi “yili yangakomboleka kwa Mlungu kutenda yakusakala, soni Jwamachiligose ngaŵa mkutenda yakulemwecheka.”—Yobu 34:10.

Nambope mwine mpaka aliwusye kuti, ‘Ana Mlungu jwamachiligose amkundile Satana kuti alamulile mpaka chakachi?’ Mwatuyiwonele munganiji, yikulosya kuti Mlungu akusaŵengana ni yakusakala soni yikusampweteka pakutukusimana ni yipwetesi. Konjechesya pelepa, Baibulo jikusati, “Atule pa jwalakwe yayikwalagasya nganisyo, pakuŵa jwalakwe akusiŵaganichisyaga.” (1 Petulo 5:7) Mlungu akusatunonyela soni akwete machili gakumasya yipwetesi yosope nambosoni yindu yangali chilungamo yatukusimana nayo. Chitulijiganye yeleyi mungani jakuyichisya.a