Ana Kola Canasa Kuli Kulemwa?

Ana pakwete palwasile kwakandaŵi? Komboleka kuti apano ŵaliŵalile cacatandisye ulwelewo. Nambo canasa cikusajigala ndaŵi jelewu kuti cimale. Mundu jwine jwakusakamucisya ŵandu ŵakulaga ni canasa lina lyakwe Dr. Alan Wolfelt ŵalembile pakwamba ya canasa. Ŵatite, “Canasa cikusajigala ndaŵi jelewu kuti ‘cimale.’” Ŵajonjecesye kuti, “Nambo ni cikamucisyo ca ŵane, cikusanandipa.”

Mwambone, kwende tulole mwaŵapikanile mumtima Abulahamu ŵamkwakwe paŵawile. Baibulo jikusati ‘Abulahamu ŵamlilile Sala.’ Maloŵega gakulosya kuti Abulahamu ŵakwete canasa kwa ndaŵi jelewu ligongo lya ciwa ca ŵamkwakwe.a Mundu jwine juŵakwete canasa kwa ndaŵi jelewu ali Yakobo. Yeleyi yatendekwe ŵanace ŵakwe ali amlambwisye kuti yinyama yim’wuleje mwanace jwakwe Yosefe. Yakobo ŵakwete canasa kwa “masiku gejinji,” mwati ŵamwiŵasa mwakwe yalemaga kumtondoya. Yakobo ŵakwetepe canasa atamose panyuma pa yaka yejinji.—Genesis 23:2; 37:34, 35; 42:36; 45:28.

Lelojinosoni mlongo mjetu pajasice tukusakola canasa kwa ndaŵi jelewu. Kwende tulole yisyasyo yiŵili ayi.

• “Ŵamkwangu Robert ŵawile pangosi pa July 9, 2008. Mwa masiku gosope, palisikuli, panyuma pa cakulya cakundaŵi, twakumbatilene soni kusalilana maloŵe gacinonyelo kaneko ŵanyakwice wa kumasengo. Ngosiji jatendekwe ali paulendowu. Apano papite yaka 6 nambo ciwa ca ŵamkwangu cikusambwetekape mumtima. Ngukayicila naga cinjiliŵalila ya ciwaci.”—Gail, jwa yaka 60.

• “Papite yaka 18 ciwile ŵamkwangu, nambo ngusinalilape. Ndaŵi sine pangwenda ni kuciwona cindu cakusalala, ngusaganisya kuti ŵamkwangu akaŵe apali akacinonyele mnope.”—Etienne, jwa yaka 84.

Kulila mpela kweleku, soni kola canasa kwa ndaŵi jelewu kuli kwacipagwa. Jwalijose akusalosya canasa mwakulekanganalekangana. M’yoyo, tukajimbaga magambo acimjetu pakulosya canasaci. Nambosoni, tukalijimbaga magambo naga yikutupwetekape mumtima mlongo mjetu pajasice. Nambo ana mpaka tumalane catuli ni canasa?