NGANI JA PANDANDA
Jwakunonyelwa Jwetu Pawile
“Basi . . . mkalila . . . Mlungu ni jwasacile kuti yeleyi yitendekwe.”
Mundu jwine ŵasasile maloŵe gelega pakumtondoya jwamkongwe jwine lina lyakwe Bebe. Kwaliji kumalilo ga babagwe ŵaŵawile pangosi ja galimoto.
Bebe ŵanonyelaga mnope babagwe. Mundu juŵamtondoyaga jula ŵaliji mjakwe jwapamtima. Nambo kwa Bebe, maloŵega galiji gakupweteka mnope. Bebe ŵagambaga kuŵeceta jika kuti, “Mlungu ngaŵa mkusaka kuti yeleyi yitendekwe.” Pali papite yaka, Bebe ŵalembile buku jakutagulila ya ciwa ca babagwe ŵala. Yaŵalembile yalosisye kuti ŵakwetepe canasa ligongo lya ciwa ca babagwewo.
Mpela mwatuyiwonele ni Bebe, ndaŵi sine mundu jwatukusamnonyela pawile pakusajigala ndaŵi kuti mtima utame pasi. Ni ligongo lyakwe Baibulo jikusasala kuti ciwa cili “mmagongo jwakumalicisya.” (1 Akolinto 15:26) Pangali mundu jwampaka acilekasye ciwa. Cikusajigala ŵakunonyelwa ŵetu mwakusisimucisya soni cili cangasyoŵeleceka. Ligongo lya yeleyi tukusosekwa kumanyilila yampaka yitutamice mtima pasi jwakunonyelwa jwetu pawile.
Mwine mpaka aliwusye kuti: ‘Ana pakusajigala ndaŵi jelewu wuli kuti canasa cimale? Cici campaka cingamucisye kumalana ni canasaci? Ana mpaka natondoye catuli ŵandu ŵele jwacinasi jwawo ajasice? Ana pana cembeceyo cilicose kwa ŵakunonyelwa ŵetu ŵawile?’