Yesu Akuwonecela kwa Ŵakuwulaga Somba

Ndaŵi jine Yesu ali awonecele kwa ŵandumetume ŵakwe, Petulo ŵajawile kukuwulaga somba ku Nyasa ja Galileya. Jwalakwe ŵajawile yalumo ni Tomasi, Yakobo, Yohane, ni ŵakulijiganya ŵane. Jemanjaji ŵacesisye cilo cosope kuponya makoka, nambo nganapata cilicose.

Kundaŵi kwakwe, ŵam’weni mundu ali ajimi mungulugulu nyasa. Jwalakwe ŵawusisye kuti, ‘Ana mpatile cilicose?’ Jemanjajo ŵatite, “Iyayi!” Kaneko mundu jula ŵatite, “Mponye likoka lyenulyo cakumlyo kwa libotilyo.” Jemanjaji ali aponyisye, likokalyo lyagumbele ni somba syejinji, mwamti nganapakombola kuliwutila m’libotimo. Kaneko Yohane ŵayimanyi kuti mundu jula jwaliji Yesu ni ŵatite, “Ali Ambuje!” Ndaŵi jijojo, Petulo jwaliponyisye m’mesi ni jwang’ambile acijawulaga kungulugulu nyasa kula. Nambo ŵakulijiganya ŵanewo ŵamkuyaga pa liboti.

Ali ayice paciko pala, jemanjaji ŵawuweni mkate ni somba sili pamoto. Yesu ŵasalile jemanjajo kuti ajigale somba sine kuti ajonjecesye pa yakulyayo. Kaneko jwalakwe jwatite, ‘Kwende tulye yakulyayi.’

Paŵalile yakulyayo, Yesu ŵam’wusisye Petulo kuti, ‘Ana mkusanonyela une kupunda kuwulaga somba?’ Petulo jwajanjile kuti, ‘Elo Ambuje, akumanyilila kuti ngusanonyela.’ Kaneko Yesu ŵatite, ‘Lisyani tuŵanace twangu twangondolo.’ Yesu ŵam’wusisyesoni kuti, ‘Petulo, ana mkusanonyela une?’ Petulo ŵajanjile kuti, ‘Ambuje, akumanyilila kuti ngusanonyela.’ Yesu ŵatite, “Cingani tungondolo twangu.” Yesu ŵam’wusisyesoni katatu. Nambo Petulo jwalitendele canasa. Ni jwatite, ‘Ambuje, wawo akumanyilila yosope. Akumanyilila kuti ngusanonyela.’ Yesu ŵatite, “Lisyani tuŵanace twangu twangondolo.” Kaneko Yesu ŵamsalile Petulo kuti, “Mjendelecele kunguya une.”