Yesu Akuwujila Kwinani

Yesu ŵacingangene ni ŵakumkuya ŵakwe ku Galileya. Ŵapele lilamusi lyakusosekwa mnope lyakuti, ‘Mjawule mkajiganye ŵandu ŵa mitundu josope kuti aŵe ŵakulijiganya ŵangu. Mwajiganye yindu yanamjiganyisye jemanja, ni kwabatisya.’ Kaneko ŵasimicisye kuti, ‘M’manyilile ayi, cinjiŵa ni jemanja ndaŵi syosope.’

Mkati mwamasiku 40 cijimucile ku ŵawe, Yesu ŵawonecele kwa ŵakulijiganya ŵakwe ŵajinji mu Galileya soni mu Yelusalemu. Jwalakwe ŵajiganyisye jemanjajo majiganyo gakusosekwa soni ŵatesile yakusimonjesya yejinji. Kaneko Yesu ŵasimene ni ŵakulijiganya ŵakwe kakumalisya, pa Litumbi lya Maolifi. Jwalakwe jwatite, ‘Akasatyoka mu Yelusalemu. Ajendelecele kwembeceya yilanga ya Atati.’

Ŵandumetume ŵakwe nganapikanicisya ngopolelo ja yaŵaŵecetaga Yesuyi. Ni ŵam’wusisye jwalakwe kuti, ‘Ana sambano caŵe Mwenye jwa Ayisalayeli?’ Yesu jwatite, ‘Ndaŵi ja Yehofa nganijikwane kuti une mbe Mwenye. Pangakaŵapa capocele macili ga msimu weswela, ni caciŵa mboni syangu. Ajawule akalalicile mu Yelusalemu, Yudeya, Samaliya, soni ku mikuli jine jakwakutalika ja cilambo capasi.’

Yesu paŵajigalidwaga kwawula kwinani, mawunde gam’wunicile. Ŵakulijiganya ŵakwe ŵaliji mkulolape mwinani, nambo Yesu ŵaliji ali apite.

Kaneko ŵandumetume ŵala ŵatyosile ku Litumbi lya Maolifi ni kwawulaga ku Yelusalemu. Jemanjaji ndaŵi syosope ŵasonganaga mu cipinda ca mwinani ni kupopelaga. Jemanjaji ŵamjembeceyaga Yesu kuti ŵape yindu yine yakwakamucisya.