Yesu Akulalicila Utenga wa Ucimwene

Paŵagambile kubatiswa, Yesu ŵatandite kulalicila kuti, ‘Ucimwene wa Mlungu uŵandicile.’ Ŵakulijiganya ŵakwe ŵamkuyaga paŵalalicilaga mu Galileya soni Yudeya. Yesu ali awujile ku tawuni ja kumangwakwe ku Nasaleti, ŵapite kunyumba jakulambilila ni ŵawunukwile mpukutu wa Yesaya. Ni ŵaŵalasile mwakwesya maloŵe kuti, ‘Yehofa ambele une msimu weswela kuti lalicile utenga wambone.’ Ana yeleyi yagopolelaga cici? Yagopolelaga kuti, atamose kuti ŵandu ŵasakaga kum’wona Yesu ali mkutenda yakusimonjesya, nambo cakulinga cekulungwa caŵapocelele Yesu msimu weswela caliji cakuti alalicile utenga wambone. Paŵamasile kuŵalanga kula, jwalakwe ŵasalile ŵanduwo kuti, ‘Lelo, yakulocesya yeleyi yikwanilicikwe.’

Kaneko, Yesu ŵapite ku Nyasa ja Galileya kuŵasimene ni acalume mcece ŵakuwulaga somba ŵaŵaŵele ŵakulijiganya ŵakwe. Jwalakwe ŵaŵilasile jemanjajo kuti, ‘Anguye akuno soni cinjatenda jemanja kuŵa ŵakutanjisya ŵandu.’ Jemanjaji ŵaliji Petulo, Andileya, Yakobo soni Yohane. Mwangacelewa jemanjaji ŵalesile masengo gawo gakuwulaga somba ni ŵamkuyiye Yesu. Jemanjaji ŵajesile mu Galileya mosope acilalicilaga yakwamba Ucimwene wa Yehofa. Ŵaliji mkulalicila m’nyumba syakulambilila, m’misika soni m’misewu. Ŵandu ŵajinji ŵaliji mkwakuya kulikose kuŵajawulaga. Ngani jakwamba Yesu jawandile palipose mpaka m’mikuli jakutalicila mnope ja ku Siliya.

Mkupita kwandaŵi, Yesu ŵapele ŵane mwa ŵakumkuya ŵakwe macili gakuposya ŵandu soni koposya misimu jakusakala. Ŵane mwa ŵakumkuyaŵa ŵajendaga yalumo ni Yesu paŵalalicilaga msinda ni msinda soni musi ni musi. Ŵane mwa acakongwe ŵakulupicika mpela Maliya Magadalena, Jowana, Susana soni ŵane, ŵamsamalilaga Yesu ni ŵakumkuya ŵakwe.

Pambesi pakwajiganya ŵakulijiganyawo, Yesu ŵatumisye kukulalicila. Paŵajendaga mu Galileya, ŵandu ŵajinji ŵaŵele ŵakulijiganya soni ŵabatiswe. Ŵandu ŵajinji ŵasakaga kuŵa ŵakulijiganya, mwamti Yesu ŵalandanyisye jemanjajo ni mgunda wawukusosekwa kugowola. Jwalakwe jwatite, ‘Am’ŵende Yehofa kuti atumisye ŵamasengo ŵajinji kukugowola mbeju.’ Kaneko jwalakwe jwasagwile ŵakulijiganya ŵakwe ŵakwana 70 ni ŵatumisye ŵaŵiliŵaŵili kukulalicila mu Yudeya mosope. Jemanjaji ŵaliji mkwiganya ŵandu ŵakulekanganalekangana pakwamba ya Ucimwene wa Mlungu. Paŵawujile kwa Yesu, jemanjaji ŵaliji ŵakusacilila kumsalila yaŵasimene nayo. Yaliji yangakomboleka kuti Satana alekasye masengo gakulalicilago.

Yesu ŵaliji jwakusimicisya kuti ŵakulijiganya ŵakwe cajendelecele kamula masengo gakusosekwa mnopega atamose jwalakwe pacacijawula kwinani. Jwalakwe jwasalile kuti, ‘Mlalicile utenga wambone pacilambo cosope capasi. Mwajiganye ŵandu Maloŵe ga Mlungu ni kwabatisya.’