Jwamkongwe Pacisima

Pali papite ndaŵi citendele cindimba ca Pasaka, Yesu ni ŵakulijiganya ŵakwe ŵawujilaga ku Galileya acipitilaga ku Samaliya. Ali ayice ciŵandika msinda wa Sukali, Yesu ŵajimi pamalo gakolanjidwa cisima ca Yakobo. Paŵaliji mkupumula pamaloga, ŵakulijiganya ŵakwe ŵapite ku msinda kukusuma yakulya.

Kaneko jwamkongwe jwayice pacisimaco kukuteka mesi. Yesu ŵatite kwa jwalakwe, “Mungayile mesi gakumwa.” Ni jwamkongwejo jwatite, ‘Ligongo cici akuŵeceta ni une? Unetu ndili jwamkongwe jwa Cisamaliya. Ayuda ŵangaŵecetana ni Asamaliya.’ Nambo Yesu ŵamsalile jwamkongwejo kuti, ‘Mkayimanye kuti une ndili ŵani, mkamendile mesi gakumwa, ni ngampele mesi gakupeleka umi.’ Ni jwamkongwejo jwawusisye kuti, ‘Akugopolela cici? Soni wawojo nganakola cakutecela mesi.’ Yesu ŵatite, ‘Jwalijose jwakusamwa mesi gangupeleka ngasijimkolasoni njota.’ Jwamkongwejo jwatite, “Ambuje, ambe mesi gelego.”

Yesu ŵamsalile jwamkongwejo kuti, ‘Mjawule mkajigale ŵamkwenu.’ Nambo jwamkongwejo jwatite, ‘Nganingola ŵalume.’ Ni Yesu ŵatite, ‘Msasile yisyene. Mlombedwe kakwana kasanu, soni apano mkutama ni jwamlume jwanganimlombana najo.’ Jwamkongwejo jwatite, ‘Sambano nayimanyi kuti wawo ali jwakulocesya. Ŵandu ŵa mtundu wangu akusakulupilila kuti m’weji mpaka tumlambile Mlungu m’litumbi ali, nambo Ayuda akusati mpaka tumlambile mu Yelusalemupe. Ngangukayicila kuti pacaciyika Mesiya, cacitujiganya mwampaka tumlambilile Mlungu.’ Kaneko Yesu ŵasasile cindu canganamsalileje jwalijose citandilile. Jwalakwe jwatite, ‘Une ndili Mesiya.’

Jwamkongwejo ŵawutucile mumsinda wa kumangwawo ni ŵasalile ŵandu ŵa mtundu wakwe kuti, ‘Namsimene Mesiya. Jwalakwe akumanyilila cilicose cakwamba une. Kwende akamlole!’ Jemanjajo ŵalongene najo kucisima kula. Ali ayice ŵaliji mkupikanila yaŵajiganyaga Yesu.

Ŵandu ŵacisamaliya ŵala, ŵam’ŵendile Yesu kuti atame mumsinda wawo. Jwalakwe ŵatemi mumsindamo kwa masiku gaŵili, ni ŵaliji mkwajiganya ŵanduwo. Kaneko ŵandu ŵajinji ŵakulupilile mwa jwalakwe. Jemanjajo ŵamsalile jwamkongwe jwacisamaliyajo kuti, ‘Pambesi pakupikanila yaŵecete munduju, tukumanyilila kuti jwalakwe ali yisyene mkulupusyo jwacilambo capasi.’