Yesu Akuswejesya M’nyumba ja Mlungu

Mundaŵi ja cawu, m’caka ca 30 C.E.a, Yesu ŵapite ku Yelusalemu. Pandaŵiji ŵandu ŵajinji ŵayice kweleko kukutenda cindimba ca Pasaka. Mpela mbali ja cindimba, ŵanduwo ŵapelekaga mbopesi sya nyama ku nyumba ja Mlunguko. Ŵandu ŵane ŵajigalaga yinyama pakwawula ku Yelusalemu, nambo ŵane ŵasumaga yinyamayo kukoko.

Yesu ali ayice kunyumba ja Mlungu, ŵaweni ŵandu ali mkusumisya yinyama. Ŵanduwo ŵatendelaga malonda m’nyumba jakulambilila Yehofa. Ana Yesu ŵatesile cici? Jwalakwe jwapanganyisye cikoti ca ngonji ni ŵasitopolele kusa ngondolo ni ng’ombe. Kaneko ni ŵayingalamwile matebulo ga ŵakucenga mbiya soni ŵakusulile pasi mbiya sya ŵanduwo. Yesu ŵasalile ŵakusumisya ngunda kuti, ‘Mkoposye yeleyi amuno! Mkajitenda nyumba ja Atati ŵangu kuŵa malo gakutendela malonda!’

Ŵanduwo ŵatumbile mnope ni yaŵatesile Yesuyi. Ŵakulijiganya ŵakwe ŵakumbucile yakulocesya yakwamba Mesiya yakuti, ‘Cinjiŵa jwa mtawu mnope pa nyumba ja Yehofa.’

Mkupita kwandaŵi m’caka ca 33 C.E., Yesu ŵaswejesyesoni m’nyumba ja Mlungu. Jwalakwe nganakundaga kuti ŵandu atendeje yindu yangacimbicisya nyumba ja Atatigwe.