Malayika Gakusala Yakupagwa kwa Yesu

Jwakulamulila mu ulamusi waciloma, Kayisala Augusito, jwalamwile kuti Ayuda wosope awujile kumangwawo kuti akalembesye mena gawo m’buku jakawundula. M’yoyo Yosefe ni Maliya ŵawujile ku Betelehemu, kuŵatyocele acinangolo ŵa Yosefe. Sambano ndaŵi jakuti Maliya aŵelece mwanace jaliji jili jisigele panandi.

Paŵayice ku Betelehemu, malo gaŵagasimene kuti mpaka atame galiji mwicinga. Mwicingamu ni muŵapagwile Yesu. Maliya ŵam’ŵijilile mwanacejo ni nguwo ni kumgoneka mu cakulila ng’ombe.

Ciŵandika ku Betelehemu, ŵakucinga ŵacesyaga cilo cilicose ali mkulolela yilango yawo. Mwakusupucisya, lilayika lyajimi ciŵandika jemanjajo soni lilanguka lya ucimbicimbi wa Yehofa lyasyungulile. Ŵakucingaŵa wakamwile mnope woga, nambo lilayikalyo lyatite, ‘Akatenda woga, ngwete utenga wakusangalasya. Lelo jupagwile Mesiya mu Betelehemu.’ Pandaŵiji, malayika gejinji gawonecele kwinani ni gatite, ‘Ucimbicimbi kwa Mlungu kwinani, soni mtendele pacilambo capasi.’ Kaneko malayika gala nganigawonekasoni. Ana ŵakucinga ŵatesile cici paŵapikene yeleyi?

Ŵakucinga ŵala ŵatite kwa jwine ni mjakwe, ‘Kwende tujawule sampano ku Betelehemu.’ Mwacitemacitema ŵapite ni ŵamsimene Yosefe ni Maliya ali mwicinga ni kamwanace kanapagwape.

Jwalijose ŵasimonjile paŵapikene yalyaŵecete lilayika kwa ŵakucinga ŵala. Maliya ŵaganicisye mnope maloŵe galyaŵecete lilayikalyo soni nganagaliŵalila kose. Ŵakucinga ŵala ŵawujile kuyaliji yilango yawo, kwineku ali kum’yamicila Yehofa payosope yaŵayiweni soni kuyipikana.